By: Rev. Huolthangsei Thiek
Kum 2022 September thla Issue a khan Luka Bung 12: 29 – 31 le Matthai 6:31,32 thangsanin “Isu’n fak zawng a phal nawh,” ti ei lo insuo ta a. Chu sunzawmna ang elin tukum 2024 hin kum thupui “A ram le a felna zawng hmasa lem ro,” ti hi ei hung nei nawk a. Thupui le inzawm hin hieng ang hin hang ngaituo nawk ei tih.
Chuong a fak zawng chu khawvel hnam po po thaw dan a ni zie Lalpa Isu’n a hril a; chun, chuong ei fak ding le ei mamaw po po chu ‘in Pa vana min a hriet zing si a’ a ti nawk a. ‘Ama ram zawng lem ro, chuongchun, chuong thil khawm chu a pek sa ding cheu a nih’. ti a hril bawk a. Matthai 6:31-34 khawmin a hril bawk a.
Hieng thu hi ei ngaituo chet chet chun, Isun iem a hril tum tak ning a ti aw, tia ei ngaituo chun, hriet thiem harsa ei ti deu hlak a hawi. Asan chu, khawvel mi po po, ringtu hai thangin, ei reng el hin fak ding le dawn ding, sil le bil ding zawngin ei in lap rak rak seng el sih a. Pathien mi dit dan tak hi ei theinghil rawp niin an lang a nih. Ringtu, Pathien nauhai ta ding chun, ei lungkham tak ding chu fak le dawn zawng le inthuomna ding dam, insuk buripna ding hi a lo ni der naw niin an lang. Khawvela hin ei damsan tak theinghilin, ei lo buoi rak rak hlak a, lungkham lo ding hi ei lungkhawm rak rak a, ei sawl thlawn mei mei a lo ni hmel a nih. Khawvela ei umsunga ei thaw ding tak chu “A Ram Sin” hi a ni lem a nih. Mihriem hmasa tak Adam kuoma Pathien thupek kha ei en chun, thilsiem hai enkawlna sin a nih, fak ding zawnga thawsuok a fa dingin a hril der nawh. Eden huona ransa le thing le ruo hai po po enkawlna sin chu an thawtir a nih. Chu chu Pathienin Adam a sin dinga a lo pek chu a nih. Chuleiin Eden huona an umlaia khawsak dan le nun dan kha a mawiin, anhawi hle ding a nih, hnuoi paradis ti ding a nih. Suolnan hmun a chang nawh a, Pathien le mihriem inkara iengkhawm indaidanna a um bawk nawh. Eden huona Adam le Evi kha inhawi ti em em a, a umsa fa le dawn a, lungkhamna chikte khawm neilo an lo nih. Chuleiin, an hringnuna khan inkhik-in-khalna le thu inthup khawm um thaklo a khawsa, iengkim inpaw le felfai vawng, inringhlelna chite khawm neilo a khawsa an nih. Pathien le an inkara buoina a um naw a, anni le anni kara khawm inhriet thiemnawna um lo a nih. Thil inthup um loa khawsa an nih. Chu chu Pathien Lalram le a felna um dan chu a nih.
Chuong lai chun, Setan, rula inchangin Evi kha a hung thlem a, (a hlema), Pathienin an fak der lo ding a ti, “a suol le a tha hrietna thingra” chu an fak el ta a. Chu phing leh, an umdan pangngai chu a hung inthlakthleng ta vawng a, anni le anni meu khawm, inzak ngailo kha an inzak tah a, an saruokna inkhum dingin theichang hna an inbel ta a, Pathien an ngai em em hlak kha inbik san nuomna lungril an hung nei ta a. An nina suol kawplo kha suol, tawngsephur an hung ni pha tah a ni kha. Pathienin an suolna phutawkin tawngsie an phur a. “Thlansa phul kaia sin thawa fak hmu ta chau dinga tawngsie chu Adam chunga chun, inphurin an um a. Evi khawm a ditzawng chu a pasal tienga inthawka hmu ding le, nau hase tuora nau nei ding a lo ni ta a. Rul khawm chu bawk invaka pilvut bar rawp ta dingin le Nuhmei thla le indova, a lu sukthithling ding le, ama khawma nuhmei thla chu a kekhawng suk thithling dingin tawngsie an phur tah a nih. Chu chau chu an nawh, Eden huona inthawk hnawt suokin, hnuoi khawm an ni leia tawngsie phur a ni tak zie le, harsataka sin thaw naw chun hnuoiin ra an suo pek naw ding khawm hril pekin an um a nih.
Ei zuk hril tum tak chu, Inrim taka sinthawa fak hmu ding ti hi Pathien tawngsie a nih. Tu hin Pathien tawngsie chu ei la phur zing am a nih, hieng lawm lawma fak zawngna thua lungkham bek beka ei la um el hi..? ti a ni chu.
Adam le Evi Eden huona inthawka hnawt suok an ni phing khan, Eden huon chu mei kawlhnam inlep tuo zawk zawk leh Cherub hai chu vengtu dingin Pathienin a sie ta a. Eden huona hringna thingra kha lovin fa pal an ta, kumkhuoin dam rawi an tih, a ti a nih.
Chu le inzawm peii cherubhai lim chu tlhalera an umlai khan Lalpa Pathienin sahmul puona mawi taka kerin Temple hmun thienghlimtak pindan bang a khaiin a sung tieng tukhawm lut theilo dinga khar tlat a ni bawk a, hi cherub lim sahmul puona zep hi Eden huon vengtuhai entirna chu a lo nih. Isu Krista Kross lera hemdea a thi phing khan cherub hai lim inkerna pindan puon chu a sipa inthawkin a hnuoi tieng chen a tler suok vawng ta a. Chuleiin, Eden huon vengtu cherub hai an bang ta a, hringna thing khawm chu mi po po ta dingin hmu le chang thei ding kawt hawngin a um ta a. Isu Krista zarin pindan bang daidanna a um ta naw a, chu le inruol chun, Adam le Evi in tawngse an phur khawm a bo tah, Halleluijah, Lalpan Ropuina chang raw seh..! Chu le inruol chun, fak ding lungkham a ngai ta naw a, A Ram le a felna sin thawtu hai ta dingin, a tul ang pei chu Lalpa kuta inthawka dawng dingin a umsa a nih.
Hieng thu hi ringtuhai ta dingin a ropuiin, lawm a um a nih. Ei lungkham tak ding chu, A Ram le A Felna a ni lem ta ding a na, awl nun chu a ni der naw a nih. Lungkham thua Pathien Ram chu ei ngai pawimaw hmasak tak ding le ei invawi tak ding chu a nih. Invawi lo ding invawi hi hlawsamna le beidawngnan a tawp nuom hlak a. Invawi ding tak invawi chun, hlawtlingna le lawmna nasatak a um rawp hlak a nih. Ei sinthawna tirenga hin Pathien Lalram sin a um a, indikna dam, taimakna dam, hmangaina dam le inhnikna neia sin thaw chun, mi hai ta dinga malsawmna intluntu ei ni thei a nih.
A ram le a felnaa tan lova taimakna dam; a ram le a felna thang lova duam taka sin thaw dam; a ram le a felna ah tan lova thlan saphul kaia sin thaw chu Isun a mi khap pek ta a nih.
Chuleiin, A ram le a felna zawng hmasak chu fak hmuna le malsawmna hnar, tamtak huot dawkna lampui a lo ni lem a nih. “Chuon po po chu a pek belsa ding cheu a nih, a ti an nawm.
Lalpan mal sawm raw seh..
No responses yet