Hmarsak Pastorate -: Rev. Fimliensang, P.O.
Hmarsak Pastorate: Hmarsak Pastorate sunga hin khuo Unit 11 (Sawmpakhat) a um a. Beiruol hi Unit tina hmang a ni a. Hmang dan ruok chu an ang naw met met seng. Unit thenkhat in inkhawm hun pangngai po hieng: Nilaini zan, Inrinni zan le Pathienni zan hai po hi Biekinah hmangin, zan danghai po chu Groupa inthe in Inah hmang a nih. Chun, Unit thenkhathai ruok chun zantin Biekinah inkhawmin an hmang ve thung a. A tlangpuiin Beiruol hmang inhawi ti tlang a ni a. Kohranhai khawm an phurin Beiruol thawlawm pekna kawnga khawm kohran mipui hai kut a zang a, lawm a um takzet a nih.
Beiruol intuokkhawm hi EAC Muolvaiphei Unit ah an nghat a. Kohran mipui an fekhawm tha hle. Pastor Lalnunsang le Pro. Pastor David Zothanmawi haia inthawkin Pathien Thu hringtak le ngainuom umtakin ngaithlak a ni a.Pathienni zing inkhawm tin in Pathien Thua inpawl tlangna, titi lengkhawm nei a ni a. Rev. Huolthangsei |hiek le Rev. Zawllienmawi Evangelist-at-Large haiin titi lengkhawm an keithuoi a, indawnna le dawnna hun khawm hlimumtaka hmang a nih. Chun, Beiruol intuokkhawm sung hin Kristien |halai pawl hieng: Lamka KTP, Rengkai KTP, Muolvaiphei KTP le Muolhlum, Rengkai KTP haia inthawkin Pathien inpakna hlapawl ropui le mawitak tak ngathlak a ni bawk.
Simthlang Pastorate -: Rev. Roparlien Ralsun, P.O.
Simthlang Pastorate biel sunga hin Unit 16 a um a. Unit tinhai in Beiruol tluongtak le hlimtaka hmang a nih. A tlangpuiin Biekin le Intienga programme hmang a ni a. Kohran mipuihai khawm an tha a fan hle a. Pathien Thu a inpawlkhawmna tieng a khawm malsawmna tam tak dawngin hlimtakin hun hmng tlang a nih. Beiruol Target tlak ngei tumim Unit tin haiin thang nasatakin an lak tawla lawm a um hle.
Chun, Beiruol Intuokkhawm hi Tarik 21-22 September, 2024 in Kawnpuiah nei a ni a. Mikhuol 200 (zahni) chuong fekhawm a ni a. Parbung le Lungthulien Unit hai Biekin khar meuin Intuokhawmah an fe a inpak an umin lawm an um takzet. Beiruol intuokkhawm huna hin Pastor Joarthang, Pastor K. Lalhimthang le Pastor Wesley Pawlsiemsang haia inthawk Pathien Thu Sermon ropuitak tak ngaithlak a ni a. Mipui an lawmin malsawmna tamtak dawng a ni thu hriet a nih. Pathienni lengkhawm nei a ni a. Rev. Roparlien Ralsun le Pastor K. Lalhimthang haiin hnetakin an keithuoi a, inhawitaka hun hmang a nih. Chun, Beiruol intuokkhawm sung hin hla tienga in awitu hieng: Parbung KTP le Senvawn Lailak KTP hai a inthawk le Nk. Nancy Ramdinmawi haia inthawkin Pathien chawimawina hla hringtaka ngaithlak a ni bawk. Pathien thlarau malsawmna tamtak dawngin Beiruol Intuokkhawm hi tumtiek a nih.
Vangai Pastorate -: Rev. G. Diamondthang, P.O.
Khawvel buoina in mi chim zingin September Beiruol khawm hi ei hmangthei taktak ngut dim aw ti a kan thlir laiin Pathien thilthawtheina ropuitak mi hliekhu na in Unit tinin mani remchang dan ang peiin Biekin le In tienghai Beiruol hmang a ni a. A tlangpuiin Pathien Thu le hlaa kan hlawkpui vieu in kan hriet a. Beiruol Target thuah taksa khawsakna fak le dawn zawngna thu a khawm bieldang hai neka harsatna tamtak idelde in um inlang khawm Kohranhai an tha a fan a. “ Ei Lallukhum sukmawitu dingin thlarau bohmang pakhat bek man ding,” tiin nasatakin thang an lak a. Kan beiseina khel tieng dai thawsuok theiin kan um leiin kan lawm hle. Lalpa’n ropuina chang mawl raw seh.
Beiruol Intuokkhawm hi Sub-Hqtrs, Kangreng ah nei a ni a. Mikhuol khawm thahnemtak fe khawm a nih. Pathien Thu hril rawngbawlna Upa K. S. Vunga, Upa Challien le Upa Lalzarlien haia inthawkin hring le ropuitak tak ngaithlak a ni a. Kohran mipuihaiin an hlawkpui hle. Chun, Biekin puo tieng Pathien Thua inpawlkhawmna, titi lengkhawm nei a ni hlak a. Pastor Joseph Lalrolien, Pro Pastor Simeon Lalnghaklien le Mr. Fimthangvung haiin hnetakin an keithuoia inhawi kan ti tlang hle. Dittawk lo takin Beiruol chu hlimtakin kan tumtiek thei a kan lawm hle.
Hmarthlang Pastorate -: Rev. Paul Rozarlien, P.O.
Khawvel buoina’n nasatakin a mi chim mek zing laiin a kuthrata mithuoia September Beiruol tluongtaka min hmangtirtu ei Lalpa kuomah lawmthu um raw seh. Hmarthlang Pastorate hin State Pathum kan del a. Manipur, Cachar Assam le Mizoram, chutaka chun Unit pakuo (9) kan um a, chulaia Unit pahni (2) hai ruokchun hnam buoina leiin Biekin hluo theilovin an um a, sienkhawm a danghai po chun thatakin Beiruol hmang thei a nih. Biekin ah Inrinni zan le Pathienni zan po hmangin zan danghai po Intienga hmang a nih. Kohran mipuihai an tha a fan hle a, Beiruol hi a tawi taluo a hun kan dit khawp naw hiel a nih. Target khawm thei ang tawka thang la in kan beisei bak hiel kan thawsuok theia lawm a um takzet.
Beiruol Intuokkhawm hi hmun thumah nei a ni a. Manipur tieng po Savawmphai ah, Cachar tieng po Diger Compound ah, Mizoram tieng Kolasib ah hmang a nih. Chun, hi programme hmangpui ding hin Pastorhai le thawktuhai insemdar in hlimtaka hun hmang a nih. Hieng anga programme tluongtak le hlimtaka min hmangtirtu Lalpa kuomah lawmthu le ropuina um mawl raw seh.
Tripura Mission Field :-Rev. Buonghranglien, F/S.
Tripura Mission Field khawm September Beiruol thei ang angin hmang a ni a. Kohran mipuihai khawm ei thupui hril hi an phurin inhawi kan ti hle. Target khawm Unit tamlem haiin kan tlak theia lawm a um tak zet. Ringnaa naupang te te ni inlang khawm kohran hai huoisenna le an inpekna hai a ropui in lawm a um hle.
Beiruol Intuokkhawm hi Mualhui a nei a ni a, mikhuol beisei bak zet fekhawm a nih. Pro Pastor Rosiemlien, Pastor John Matthai le Rev. Buonghranglien haia inthawkin Pathien Thu thatak tak ngaithlak a ni a. Mipui nasakin an lawma malsawmna tamtak dawng a ni bawk. Chun, Pathien Thu a inpawl tlangna, titi lengkhawm hun hi Rev. T. Lawmthangin hnetakin a keithuoi a, kohranhaiin an hlawkpui hle. Tripura chu ram lum a ni ei hriet seng a. Beiruol Intuokkhawm lai khawm hin 36/37 Celsius Degree nisienkhawm mipuihai Pathien Thu ngaithlakna kawngah thahnemngai takin an thang tluonsuok vawng a nih. Hlimtak le dittawk lo takin Beituol intuokkhawm hi tumtiek a nih.
Provisional Urban Pastorate -: Rev. Ramchunghnung P.O.
Provisional Urban Pastorate hi Pastorate thar chau a ni ang hrimin tukum hi a hrana September Beiruol hmang tanna chau nisienkhawm Pathien thuoina zarin hlimtakin hun hmang thei a ni a lawm a um hle.
Khawpui a um umna kar hlatak tak an ni a, a bikin Guwahati lem chu zantin nilovin remchang lema ngaiin zan hni dana dam In tieng beiruol hmang a ni tlangpui a. Shillong tieng ruokchu In le Biekinah thataka programme hmangin hlimtakin hun hmang a nih.
Beiruol Intuokkhawm hi Shillonga hmang a nih a. Inrinni hi Sports a insukhlimnaa hmang a nih. Inruolsiekna chi hran hran neiin hlimtakin hmang a nih. Beiruol Intuokkhawm sung hin Rev. Robert Ramchunghnung le Rev. Lalruotsang haia inthawkin Pathien Thu ngaithlak a ni a. Thu le hlaa rawngbawlna a hringa Kohranhai inhawi an ti tlang hle. Hun ditkhawplo taka hmangin programme hmang tumtiek a nih.
No responses yet