Vanram Pana Ei Fe Laiin Sumhai Chu a Hung Zînga

By:- Rev. Laldinglien

Nikhat chuh ei khawvel khawsak dân ka ngaituo a, kumtin harsatna le buoina a zuol deu deu a, mihriem ngaituona le suongtuona hai a thlawn pei niin ka hriet hlak. Hripui leia nasataka mipui ei buoi a, natna, thina tamtakin an tuok zut zut laiin, ei dam khawsuok theina dingin Doctor thiem hai in hri vengna (Vaccine) an hung hmusuok a. Kum 18 chungtieng mi taphawt inkâp vawng ding, tia sorkar in thusuok a hung siem leiin mipui tamtak el a suk chi-âi a. Dam nuom leia injection pawl leh, nat le thi inlaua injection nuom naw pâwl leh ei kat nawk a. Hi damdâwi inkap hin ei Bible inchûktirna a kal a nih, ti nuom deu thawa lo hril ei um bawk. Mithiem haiin ei him tlângna dinga injection ding an ti laia kum 2 zova ei thi vawng ding a nih ti pâwl ei um bawk. Khawvel hi ei nghatna tieng tieng khaw-êng hmu ding a um nawh ti ding deuthaw in buoina ringawt naw chuh chanchinthar hriet ding a um nawh.

Chuong lai chun, E.E.Hewitt in “Vânram pana ei fe laiin; sûmhai chu a hung zîng a, sienkhawm, ei fekhel hnung phâ chun,  thimna hrim um ta naw nih,” ti hla a lo siem hi ka ngaituo suok ta a. Hnuoi ram a hin chanchin lawmum tam tak hriet ding um naw sienkhawm, ei khuolzin inlawina ding hmun chungtieng thlir chun beiseina êng ditum le mâwitak el iengtik lâi khawma hmu ding a lo um zing a nih. Hi khawvel zanthim taka hin mit invaiin, harsatna le beidawngna sûmhai zîng hlak sien khawm, ei khuolzinna khawvel hi ei suoksan hun la um ngei  a ta, hieng hripui leia harsatna le thina leia ṭapna hai ei fekhel pha chun thina hrim um ta naw nih. Thlipui le sûmpui ieng anga inthim khawm hung sien, chu sûmpui khela chun khaw-êng mawi tak el a um ang bawkin, ringtuhai hi, tuipuisen himtaka ṭhuoi kaia, thlaler ramṭawl inrûm vung vung ṭhuoi pêl a, A thilthawtheina mak taka Jordan vadung ṭhuoikaitu Pathien khan him takin a mi ṭhuoi ding a nih. 

Chuleiin, hmangaina leia ei aia an pek ang bawkin hmangaina nei in um ei tiu a Eph. 5:2, mikhuol le khuolfe el ei nih I Pet. 2:11, ei rinum nêp tak, hi mitkhap kâr chaua um ding hin ropuina nasatak, kumkhuoa dingin a mi siem pek nasa deu deu a nih II Kor. 4:17. Ringum le feltaka umin, nitin a rawng bawl ei ta, a ropuina chang ve dingin dam sungin thaw pei ei tiu. Ei hmaa lawmman hnawt peiin a mawina zawng ei ta; lungmantam khawtkhara lutin rangkachak tuol lêng ei tih. Amen !