Vân Indona

By:- Mr. J Chawngsang

Vân Indona ti hi ziek hran hran a mi bêsan ziek a ni a. A bul ṭanna ding le a tawpna ding hmun khawm hrietthiem an tak a, a thei dân ang anga maikhâwma ziek a ni leiin hriet dân le hril dân khawm an ang naw nuoi ding a ni ti a chieng a. Chuleiin, tiemtu hai po povin hrietthiemna bâwma thlâka a ngâinuom um zâwnga lo thlir hrâm hrâm dingin aw!

Lucifer, Sîkhawvar, Zingtieng nâupa ti ni bawk, Vâna mi lien pâwl tak, ropuitak le thilthawtheitak niin Pathien-in mâwi êm êma an dinthar Leihnuoi enkawltu dinga a ruot a ni a. Pathien-in Hnuoi lê Vân a siem le an din chu mâwi le ropuitaka a cheimâwi a nih.

Lucifer chun a ngirhmu ropuitak, insângtak chu hmusitin Pathien tluka ropui a um chu a tum tlat a. Ama chu Vâna um, Vantirko hai lâia chunghnungtak le an châwisâng, ngîrhmun thu a chun, Pathien nâupa dawttu niin hmêl nêl-um le hmêl hlim sieu, sawisêl bova piengnal, inzâ-umna le ropuina rieu nei, Vantirko danghai nêkin a hmel var dân chu a eng inno-in a mâwi bîk rieu bawk. Pathien nâupa Krista ropuina le mâwina ruok chu a tluk naw hle a. Krista chu Vantirko hai um hmâ daia Pathien kuoma lo um ta hrim a nih.

Pathien, thil iengkim siemtu chun, Nâupa chu Vantirko hai po po nêka insang le thuneitu a ni zie le, Krista, a Nâupa le chun pumkhat, intluktlâng a ni a, nâupa umna taphawt chu a umna a ni thu le, Pa thu an zâwm ang bawkin Naupa thu khawm an zâwm ding a nih, ti hai, Vânmihai chunga thuneina chu nâupa kuoma inhlân a nih, ti le, Hnuoi le a s<nga um ding thil tinreng hai siem ding thu Pathien-in a ngâituo mêk chu Pa le Nâupa chun ngâituo hmunkhat an ta, Pa thu le a tumna chu Nâupa’n sukpuitling pei a ta, ama thu ngawt chun iengkhawm thaw naw nih. Pa thu taphawt chu Nâupa’n a sukfamkim pei ding a ni thu, Vânmi, Vantirko hai po po kuoma chun an hriettir a.

Lucifer chun, Krista ama nêka dawmsânga a um chu a îtsîk ta hle a, a lungril îtsîknaa sip le lungni lo tak, suklang si lo chun Pathien hmaa inthawk chun a fe suok a. Vantirko hai chu ko khâwmin, a lungriltak phawrlang hmasa si lovin, a pawimaw zie, a ṭhahnemngâi zie le a thaw nasat zie hai chu hril dap dapin, uor deutakin Pathien-in ama nêka Nâupa Krista a chawisâng thu le thleibîk nei a nih, tia hrilin, an chunga rorêltu, an inza êm êm dinga Krista chu siein a um ta leiin Vantirko hai zalênna khawm sukbovin a um tah, tiin a ṭawngkam thiemna le thuneina râwl nem-in-no mâwitak siin a hang hril dap dap a. Chu le inzawm chun Krista hmaa a kûn nâwk ta naw ding thu le ama chanpuol châwimâwina le ropuina Krista kuoma inhlân a nina thuah theitâwp suoa a beilêt ding thu le a tâwp chena thlawptu hai chu ditsakna leh an râwi pei ding thu thiemtak le thlumtaka hrilin a puong ta a. Chuleiin, ama, Lucifer ṭantu pâwl le Nâupa Krista ṭantu pâwl hung umin, Lucifer leiin Vân a chun, buoina chu a hung inṭan ta nih.

Pathien rorêlna laka hel chu bawsietna po po laia râpthlâktak le lientak a nih.  Chapo luot leia hung um a nih.Lucifer le a râwi hai chun Vân inhning dur dur hiel khawpin hel tumin an inpuocha mup mup a. Vantirko hai chu a pâwl pâwlin an inthlier hrang sung sung a. Chuonga vantirko hai indo dinga ineptuo hai chu an ngirhmun sukchieng dingin Pathien hma a chun ko khâwmin an um ta a. Lucifer khawm chu ṭhang ve in, a lungâwi nâwna thu hrilin chapo hmeltak putin Krista, ama nêka insâng lem daia Pa’n a dawmsângna chu thil indik a ni thei naw zie thu chu uortakin a hril ta piep piep a. Pa le Nâupa Krista chu iengkima ama râwn ve ding an ni zie thu le thil iengkim a hriet ve chu a chanvo a ni zie thu hai chu uortakin a hril bawk a.

Chuongchun, Vân mipui hai chun, ‘Pathien chun Nâupa kuoma chau a thiltum chu inhriettir a ta, Vâna chêng po po le Lucifer ngêi khawmin a thu sêl lovin an zâwm el ding a nih’, tiin Lucifer chu kâwkin nasatakin an zilhâu a.

Chun, Pathin-in Lucifer chu a helna leiin Vâna hmun a nei ta naw thu a hril zui nghâl bawk a. Chuphing chun, Lucifer chun a râwihai, ama kuom tienga ṭhang Vantirko zâtve tling hiel âwma inlang hai tieng chu nghain, “Hieng hai hi ka kuom tienga mi an ni naw am a nih? Anni hai po po khawm hi Vân hmun a inthawk hnawtsuokin an hmun hluo hai po po hi i sukruok vawng el ding a ni?” ti’n Pa chu suosalin, Krista thuneina dodâl dingin ienglâi khawma an pei zing thu le a thilthawtheina tinrêng hmanga beirak a tum zie le, Vâna a ngirhmun chu ṭhataka vêng a, hum tlat a tum thu a hril ta phier phier hnung chun Lucifer chapo zie le a thu hril hai lei chun Vantirko ringum hai chu an ṭap ta thlawk thlawk a.

Van a chun indona chu hung inṭan ta a. Pathien Nâupa Krista le Vantirko ringum hai chu khingtieng ṭhangin, a khing tieng chun Lucifer le a hnungzuitu hai ṭhangin an ineptuo ta rên râwn a. Van indona an ṭan phut-hlim hin Krista chu a la ṭhang ve nawh. Vantirko Michael le Gabriel inrâwina hnuoiah Pathien chun indo dingin a tirsuoka, ropuitakin Vantirko ringum hai chun an bei ta hum hum a. Nâupa ṭantu pâwl a ni bawka an thothang a ṭhain an inbei ni hmasataka chun Lucifer le a thilthawtheina hai chu nasataka sukkhawhlo-in a um a. Lucifer chu a beisei phak bâka châu le sawisaka a um lei chun beidawng takin a um a, a rawihai chu ko khâwmin, hmalâk dan ding ral rêlin thawdan ṭha lem le thlarâu suol hmangruo ṭha le changkângtak tak chitinrêng lakhawma nawrzui pei dingin thu an rêl thlûk a.

A ni hnina a chun a hma mi nêka nasa lema beipui thlâkin nasatakin an inbei ta mup mup a. Hi ṭum hin chu Michael le Gabriel khawm an buoi phihli nasa hle el. Michael le Gabriel le Vantirko ringum pâwl hai chun an theina po po sawmkhawmin beipui an hei thlâka, tlâng dam suktâwla an hang bei taktak chun Lucifer le a thilthawtheina hai le a hmangruo hai chu nasataka suksie-in an sukchâu ta a. Hi hin buoina le indona chu a la tâwp el nawh.

A ni thumni chun Pa Pathien iengkim thawthei chun a Nâupa Messiah chu a tir suok ve ta a. Hnena khawm chu Naupa ta dinga khêk a ni hrim a. Naupa Messiah chun Pa thilthawtheina leh inthuomin a hnung zuitu hai le chun mei tawlâilîr leh Van inrûm nasatak le chun an do ta a. Messiah inrâwina hnuoi a beipui an hang thlâk chun leh! Lucifer le a hnungzuitu hai chu an ṭit leia inthin hâwpin, a châng ngam le a châng thei khawm an um ta nawh. Chuongchun, Lucifer le a ṭhuoihruoi hai, helna lungril put hai chu an umna ding hrima buotsai Hremhmun, khukhurum mawng neilo tieng pan chun an hnaw phei pei a, Van sam inth<ktak tieng chun hnâwdê peiin an hnawtthla ta hum hum el a. Chuonglâichun, Lucifer le a ṭhuoihruoi hai, helna lungril put hai po po chu an lungril chiâi-in, ṭitna le buoina namên lovin a tuom lei chun mumal khawm an nei thei ta nawh. Vansam, khurkhuoruom mawngneilo, Hremhmuna chun an tlal<t  chum chum el ta a, an rêng chun hnawlthlakin an um vawng ta a nih. Nâupa Messiah le Vantirko ringum hai chu hnena ropuitak leh Pa kuom tieng chun hnena hlado le chun an inlâwi ta a nih.

Lucifer le a hnungzuitu hai chu Hremhmuna hnawt-luta an um thu le Naupa essiah chu hnena ropui le a kir nâwk thu an hriet chun, Vân a vânmipui umhai po po chun, Felna le indiknaa sip Pathien chu an châwimâwi ta a. Chun helna hnuhma hrim hrim khawm an lang nâwk ta nawh.