Thuhriltu Editorial (Vol. XLVIII|No.12|December|2020)

“chu hnunga chun Herodin mivarhai chu arukin a ko a, arasi inlang hun chu nguntakin anni ân dawn a.” Mat.2:7

Kristmas hung tlung ding hi thildang po po nekin ei hlimin ei lawm tlang tak niin an lang, ei lawm ding khawm a ni hrim a nih. Ei sandamtu hung pieng lawm dinga ei in buotsai mup mup lai hin hmelmapa Diebol khawm hi theitawp in a lo inbuotsai ve hlak niin an lang. Ringtu haiin lungril a kuom tieng hawng inla; rothil dang reng ngai tanaw nih, ei ti ding hi ei hmelma pa hin a phal ngainaw a. Chuleiin, khawvel tieng ngaituona lungril po po pei thlaa Lal hung pieng chibai buk dinga ei inbuotsaina le ringtuhai in hlimtaka Kristmas ei hmang ding hi Setanin min ruk pek hi a lo tum zing hlak a nih.

Khawvel mila herrem a tum: Thlarau le titakzeta Lal hung pieng chibai buk dinga ei inbuotsai laiin khawvel mi hai Birthday hmang ang a hmang dingin mi herrempui a tum hlak a nih. Sandamtu hung pieng Krista theinghil rak khawp in a bebawm thil ngaituona in ei thlarau nun a sukbuoi hlak.

Pathien suklungawina nekin Kohran hai lawmna le lungawina ei zawng nuom hlak. Kristmas hi hlimna le lawmna ni a ni ang reng in Kohran mipui hlim le lawm taka a nuor a pheng um lova Kristmas ei hmang theina dingin ṭhuoitu hai chun theitawp ei suo hlak a. Kohran hai suklawmna le an hlimna ngaituo in ei Pathien lawmzawnga hun hmang ding hi theinghil pal a awl khawp el. Chuleiin, ringtu haiin Lal Isu hung pieng hi Thlarau le titakzeta chibai ei buk ding mi dang tum in nu le pa, ṭhalai le naupang chenin  ei lungril robawm hawng ding min theinghiltir tum in ei hmelma pa Setan hin ṭhang a lak zing a nih.  Thlarau tienga Kohran hai Lal Isu hmabula bawkkhup a chibai ei buk ding hi tisa tieng ngaituonaa hem hmanga, khawvel mi hai Kristmas hmang anga min hmangtir hi Setan thiltum tlat hlak a nih. Herodin mivarhai chu a ruka kova, chipchier taka thil umdan a ngaituo zing anga Setan hin ṭhang a lak a ni leiin ringtu hai fimkhur takin Bethlehem chenin feng ei ta, LAL hung pieng hi chibai buk ei tiu.