Thuhriltu Editorial (Thuhriltu Vol.XLIX/No.01/January/2021)

Thuhriltu tiemtu hai po po kumthar 2021 chibai. Kum that kum nei ding le Pathien malsawmna dawng dingin ditsakna kan hlan cheu.

Nikum 2020 ei hmang dan kha kumthar laia ei beiseina leh an persan seng ring a um. Thla thum ei hmang liem dek dek a, hripui leiin Iengkim a buoi a, Pathien biek Inkhawm le fak zawngna an chat a, hun inthim a ni takzet. Thlirtu tamtak chun Kumthar ei hmang mek khawm hi nikum neka harsa lem dingin an la ring pei a nih. Nikum ei hmang dan anthawkin kumthar beiseina, inbuotsaina le thlir dan hai khawm anthim zawnga suongtuona nei tamtak an um mek.

Amiruokchu, Krista le chun anthim chuong naw a. I thu hi ka kehai ta dingin khawnvar a na, ka lampuia dingin var a nih. (Sam 119:105). Kumthar chu hun lawmum, beiseina thar, intanna thar ni lem a tih. Israel hai chu kum 70 zet el sal intangin hun inthim tak an hmang, Pathien an beiseina bo a, Zion hla takngiel khawm rem thei lovin an bei a dawng em em. Amiruokchu, Pathienin a thlathlam naw a, an ta dingin hun thar a hung ruot a. Lal Kura hmangin saltang suokna a puong a, an ram tieng kira Temple bawl ding le a bawlna dinga mamaw hai chen pek an nih (Ezra 1:2-3). Intanna thara tan ding an ni tah. Israel hai khan Temple bawla intan el lovin, Lalpa hmaah Maicham an indin hmasa phawt a nih. (Ezra 3:2-3). Maicham chu Pathienin a mi hai antuokpuina hmun a ni si a (Exo.29:42-43). Maichama inthawina inhlan zet naw chun misuol ta dingin Pathien le inpawlna, intanna indik a um thei naw a. Chu maicham chu simna le Pathien pawmtlaka insiemtharna hmun a nih. Israel hai chun sin thaw tan dinga maicham indintharin, Pathien le an inkar an siemthar phawt a, intanna thara intanin Temple bawlna sin an thaw a nih. Eini khawm intanna indik a pawi maw a nih.

Hun inthim ei hmang liem a, thil tamtak ei chan a, ei ngailai tamtakin thlanmuol an mi liem san a. Khawvel tieng thlira kumthar beiseina eng nei lo beidawng puma kumthar hmang dam. A then chu beiseina le hmabak phurtaka thlir khawm ei ni el thei. Ieng po khawm nisien, Israelhai Pathien Jehova ei Pathien chu a la pangngai zing a. Beidawngna, tisa ngaituona ram le khawvel thlirna ram hai siethlang ei ta. Kross maichama ei suolna le ei natna hai lo phurtu Isu Krista pan ei ta, Lalpa hmaah maicham indin tharin kumthar ei hmang tan meka hin Lalpa pawm tlaka intanna thara hmatieng pan dinga inbuotsai in. Mimal, sungtin, khawtlang le kohran hai, iengkhawm thaw ding ni inla, iengkhawm hung tlung ding ni sien la, Lalpa hmabula maicham siemin tlulut phawt ei el tiu. Ei hmaa ieng in am a mi lo hmuok ding ti hlak ei hriet si naw a, iengkim Lalpa leh ti pei thei dingin tanna tharin intan ei tiu.