THONAWK TAKSA ROPUI (1 Korinth 15:50-53)

Rev. Zakapthuom, Kolasib, Mizoram

‘Hi hmawnthei hin hmawntheilo a sil ding a na, hi thithei khawm hin thitheinawna a sil bawk ding a nih.’

Kan unau laia naupangtak (L) LARAMCHULLO in 22nd November, 2009 khan a mi lo thisan ta a. Tukum 2021 a thicham a hung tlung hin ka khuo a sâwt êm êm a. Chu nia ka lungrila Pathien Thu hung inlang THONAWKNA TAKSA ROPUI ti thupuia hmangin tâwitê ka hung ziek a nih.

Isu thina le a thonâwkna hin suol thina le thlan a hne chau ni lovin taksa thar thonâwkna taksa ropui chu a mi siempek a nih.

Pathien Thua inthawka ei hmu dânin thonâwk taksa chu sukdanglam taksa, Vân taksa a ni ding a nih, ti ei hmu a. Thonâwk taksa le tuta ei taksa hi an ang naw hle a. Tuta ei taksa hi chu hmawn thei, pila siem taksa a ni a, a na thei a, a thi thei bawk a, a tlo naw em em a. Suolin a la themin a la sukkhawlo thei a, natna le thina in a chungah ro a la rêl thei a. Châwimâwi tlak lo, pila siem a ni anga pila kirnâwk ding a nih. Thonâwkna taksa ruokchu siem dan a danglam a, hmawn thei lo, thlarau tieng taksa, suol le thina in a ngam ta lo taksa thar a nih.

Tuta ei taksa hi chu ei chengna khawvel mila siem a na, leilungah a chêng a, an milpui tâwk natna le lungngâina a tuok hlak a nih. Tisa po po hi tisa chikhat a ni naw a, vate tisa le nga tisa a dang a. Nga chu a taksa le tui inmila siem a ni leiin khawmuola chun a damsâwt thei nawh, khawmuol chu an milpui naw lei a nih. Chuong ang bawkin mihriem taksa khawm hi leilung le inmil dinga siem a ni leiin leilunga chêngin a khawsa ve el a nih.

Van khawpuia chêng thei ding chun sukdanglam a ngâi a, thonâwk taksa, van khawpui mila siem a ngai a nih. Suol le natna, lungngâina le mitthli tlâk nawna hmuna cheng dingin tuta ei taksa hi a tling naw a. Chuleiin, an milpui pilvutah a kîrnâwk ngêi ding a nih. Chupha chun, vân taksa, suolna le thina’n a them phak lo, thonâwkna taksa ropui a chang chau ding a nih. Chuleiin, ei thlakhla ngâwin ngâwi hi taksa hin Pathien ram a hluo naw ding a na, a hluo thei naw bawk ding a ni leiin leilunga hin a tâwp el ding a nih.

Vâna chatuon Pathien le chêng hmunkhat thei dingin ei taksa hi inthlâk danglam a mamaw a. Chu chu a hung nâwk huna Lalpa Isu’n a mi hung châwipêk ding a nih. Entirna dingin; Nunghâkin a hmangai em em a pasal ding le damsunga an umkawp theina ding chun a silfên hai chu dressing roomah a hlîp phawt a, chu hnungah chun MO thuomin an thuom a, a pasal ding le damsngkawp theina dingin vân taksa, thonâwkna taksa ropui chun a mi lân thuom ding a nih. A va ropui awm de!

Ringtuhai chu tuhin ṭapin lungngâi hlak inla khawm nakie pha leh ṭap le lungngâi um ta nawnaah ei la chêng ding a na. Suol le thina leia ei lungngâina hai hi kumkhuoa ei nei sawng ding a ni nawh. Lungngaina rama inrumna hih, ei Lalpa hmaa ei lawmna hla ding, a lo ni an nâwm. Ringtuhai ta ding chun hi hnuoi hi ei hremhmun nei ve sun a nih. Hi hnuoi rinum hi ei khêl pha chun vân taksa, thonâwk taksa ropui changin Lalpa leh ei hring kumkhuo ta ding a nih, Lalpa chu inpakin um rawseh. Lalpa’n a Thu mal sâwm raw seh.