Thina Hlîm Varuom (Testimony)

By:- Rev. Huolthangsei Ṭhiek

Sam. 23:4. Thina hlim varuom hraw lang khawm thil ṭhanaw hrim hrim ṭi naw ning, nang ka kuomah i um sih a…

Covid hri leia thlakhat neka sawt hiel JNIMS, Imphala damdawi ina ka um sung khan ka hun hmasa tieng po kha chu ka hriet zingna a buoia, hril ding ka hriet rawn naw khawp el. Ka hung dam ṭan ta ding laia ka ngaituona a hung fîm deu khan ka natzie le ka hrat naw zie ka hung hriet suok thei ta a. Ka taksa a zur thla tah vawng niin ka hriet a, ka rikna kg.80 ni phâk hlak kha 60 khawm bûk zo ta lova ka hang um zet khan chu, dam suok dinga inringzona a um ta nawh. Thi dinga ka’n buotsai lai chun, ka lungril chun thil tamtak ka ngaituo suok zung zung a. Kohrana ka sin chelhai le, ka insung ka ngaituo a, thil tamtak ka lungrila a hung inlang zung zung a. Kei chu lo thi khawm ni lang khawm, ka fena ding ram ka ngaituoin phurna a hung um ṭana. Nisienlakhawm, kohran rama ka sin chel hai ka la sukpuitlingzo lo hai dam, le ka insung, tu le te, (a bîkin ka tu le te hai) ka ngaituo chun, la hung lien deu hai sien la, ka nauhai khawm Nuhmei pasal neizovin, khawsakna ding ngirhmun det la siem phawt hai sien, tiin ka ngaituo nawk ta pei a. Chuong lai chun ka taksa hratna ka en leh, damsuok zo ding hmel put phâkin kan hriet bawk si nawh. Kei a ta ding ringawt chun dam suok nawk nekin thi el chu thil thlâkhla um a lo ni ta a. Thina hlim varuoma um mêk niin ka’n hriet a nih. Nithum sung tak lem kha chu thi ngei dinga inhrietna ka nei a. Pathien kuoma ka ṭawngṭaia, Lalpa ka hringna hi a tawp el ta ding a ni chun, min hriettir la, ka lung a awi, ka dam suok nawk ding a ni khawmin, min hriettir rawh, iengkim i thu ni raw seh, tiin. Zanril dar 12 a pêl ta a, chuonga ka ṭawngṭai lai chun, damte a inhriettirna chu ka dawng ta a, damsuok dinga inhrietna feltakin ka lungrila sin a hung thaw ṭana. Ka taksa sungril tienga inthawkin maktakin hratna hung insieng ṭan niin ka hriet a. Pa Pathien thilmak thaw a hung inlang ṭan a nih. Lalpa’n ropuina chang raw sen..! Amiruokchu, ka ke hai ka bân hai ka hang them vela, ka ru hai chu vunin a tuom, ti ding ang chau an ni bawk si..! Ka hmabâk chu ân kho hlein ka hriet a. Ka ṭhat suok nâwkna ding khawm chun hun a lâk ding a nih ti le damdawi tamtak ka la fâk a ngai ding khawm chu ka hang ngaituo ringawt khawma hawphur um hi ka ti ṭan nawk ta khawp el a. Ka mimal ta ding ringawt chun dam suok nâwk ding nêk chun thi thleng law law chu thil zuomum lem a ni tahin ka hriet a nih. Amiruok chu Pathien mi siemna san, ka sin chel hai le naupanghai inrâwina sin chu Lalpa Pathien chun ṭul a la ti niin ka hung ngaituo suok nâwk ta peia. Inhawi ti taka dam ding nilovin, sin thaw dinga dam nâwk chu Lalpa remruot a lo ni lem chun, kei telul hin ieng am hril thei ka ta? Damsan ding ka neia, ka damsan chu ka pawm a ṭûl a nih, ti chu kan thlêmdamna a hung ni lem ta a.

Chulai zing chun, a mi hung enkawltu Doctor pakhat kuoma chun ka ngirhmun hi ip lovin mi hril rawh, Damsuok nawk thei dingin i mi ring am? ka tih a. Ama chun, Damsuok nâwk thei e damsuok nâwk thei ngirhmuna i um an tah hi, amiruok chu hun a la lâk deu ding a nih, a mi ti a. Chu phing chun, ka lungril chun damsuok nâwk ding zawng chun ka’n ngaituo ṭan nâwk tah chau a nih. Dam hi a hlu ning a tih.

Ei Pathien Thu lâksuok, Thina hlim varuom Lal David lo hril kha ka tawng ve chie nia inngâina chu ka neia. Thi dingin ka’n sie thlûk der tah. Nisienlakhawm, Lalpa Pathien kuta um ka ni zie le, Ama umpuina chun ieng po tuok ding ni inla khawm, thina chen khawm hi ṭi ding hi a lo ni naw zie, thina khawm hi ṭium taka ei lo ngai hlak kha, a lo ṭium tak tak naw ding zie, ka ngaituo ta a. Lalpa chun ieng hun lai khawm khan a mi lo thlathlam naw a. Ka ngaisak theinaw lai khawm khan ka kuomah a lo um zing niin ka hung hriet suok ta pei a.  Lalpa Pathien kuomah ka lawmna thu ka’n tlun ta lem a nih. Ei hringna thua hin lungkham bêk bêk ding hi a lo um naw zie le, Pathien chu ei hringna siemtu le cheltu, Ama remtina ang peia hring le dam ding ei nih, ti hi theinghil lo ding a nih. Lal David chu, do le ral kara a hringna thua thina hlim varuom a lo hraw a na, kei ruok chu covid hri leia thina hlim varuom hraw ka nih. Kan in ang naw deu khawmin, a tâwpna chu taksa thina ve ve a nih. Lungngâi um nisien khawm, chawl hadamna lampui a ni lema. Chun, kei ruok chu sung le kuo tamtak, Kohran le ruolṭha tamtakin an mi ṭwngṭâi pek zie dam, ka ngaituo chângin, le ka hung damsuok nâwkna dinga mi ṭwngṭâi pektu an tam zie ka ngaituoin, hmangaitu Pathien zâr ka zona vawng a nih, ti hi ka hrieta, lawmnain ka sip a nih. Chun, damsan Lalpan a mi ruot pek hi thaw dingin ka hung hrat zuol pei chu ka beisei a nih. Chuleiin, thina hlim varuom hraw hlak inlakhawm, Lalpa Pathien nauhai ta ding chun ṭi ding hi a um nawh, lâwmna ding ruok lem a lo nih. Thi thlamuongna hai chen khawm, a hun taka Lalpan a min neitir el ding a lo nih.

Ei ngaituo ding tak chu, khawvela hin Pathien remruotna hnuoia Damsan neia Lalpa mi siem le a mi sie, hring le dama um ei nih ti hi lo ngaituo ve ro. Lalpa’n Mal sâwm raw sen..!