Rinumna A’nthawk Lalpa Hmangaina

By: Tv. JC Lallawmsang, Pune

Atheist – Pathien um dinga ringlo pawi hai chun ringtuhai sêlkalna dingin “Khawvêlah hieng lawma rinumna, harsatna, suolna etc. a tam êm lei hin Pathien um ka ring thei nawh. A lo um ani khawma hieng thil ṭhalo sukmit theilo/Sukmit nuomlo Pathien chu Pathien annaw ane’l.” tiin Hieng thu hai hi ṭhangsanin zawna dang dang hai an siem hlak; “‘Hmangaina a sip Pathien’ inti si chun, iengleia suolna neilo naute cancer an vawitir am a na? ṭhangpui ka ngai huna iem a ti a to ṭawk ṭawka? Hmangai Pathien ni si chun, ieng leia suolna hi a pung pei am an le?” hieng ang zawna po po hai hi siemin Pathien an ringnawna thiem an inchangtir hlak. Hi ang zawna hi Athiest hai chau hin an indawn nawa, eini ringtu inti hai ngêi khawma ei lungril chang a um hlak a nih. Chuleichun, hi thuziek tawite hin ei thei ang angin “Rinumna an’thawk Lalpa hmangaina” ti hai hi ei zuk khaikhawm tum ding a nih.

Eini Kristien inti hai ngei khawm hi zuk indap chieng tak tak inla chuh, a ruka Atheist ei tam hle ring a um. “Pathien hi a um tak tak di’m aw?” tia buoi pawl, “zuk thi reng inla ieng khawm, a tak lo ninaw sien, ei risk suol der ding” ti pawl leh. Hieng ang ngirhmuna ngir ei lo ni chun risk suol annaw, awinawna suol ani lem ding a nih. Pathienin an puongna chieng takin a mi’n hriettira; ei awi nuomnaw tina a nih. Ei article a thiltum tak khawm, hieng ang zawna nei pawl hai khawma an buoina hrethiem a, Pathiena ringna an inhrat thei ei beiseina lei a nih.

Rinumna le Pathien hmangaina ei hril lût hmain, a hmasa lem ding “ieng leia rinumna hi a um am a na?” ti zawna hi ei Bible besanin tawite’n zuk hril ei tih.

Rinumna umna san:

1. Inţanna 3: Mihriem haiin Pathienthu zawm loa, suola a tluk ra a nih.
2. Dan Pahnina 28: Pathien hnam thlang haiin a thupêk an zawm naw hunah rinnumna an tuor hlak.
3. Job: Rinumna le tuorna chun Pathien hrietchiengna le Ama le inlaichinna ṭha lem a mi siempêk.
4. Hebraihai 11: Ringtuhai chu an ringna hringsuokpui a, Lalpa ta dinga mi ringum anni hrietna dingin rinumna an tuor rawp hlak.
5. Luka 13:1-4: Pathienin suol sima a kuom tieng an kir (Repentance) theina dingin an tuor a phal.
6. Rom 8:28-30: Ringtu chuh, Krista nungchang a phursuok peina dingin rinumna a tuor a ţul.
7. Philippi 3:10: Ringtu chun, Krista a hrietchieng zuol pei theina ding khawma a tuor a ţul châng hun a um, etc.

Suol le ṭhain Pathien a um ti kawkhmu

Hieng a chunga Bible-in a mi hril hai ei tarlang ang hin rinumna, natna hai hin san tamtak a lo nei a nih ti ei hmuh. Natna um lei le, hieng thilhai a ṭhanaw ei ti leia Pathien a um dinga ringlo ti chu suonlam a tling nawh. Hieng thil po po hi a suol le a ṭhanawa ei ngai si chun, iemani chu a ṭha ti ei nei tina a nih. Apologist Ravi Zacharia chun hieng ang hin hrilfienna a lo siem: A ṭha le a suol ei ṭhehrang si chun, a ṭhehrangna chu iem a na? khawlam a na? ṭha le suol kar indâidanna chu iem an le? Pathien um ringloa ṭha le suol a um ei ring a ni si chun, dân-petu a um a ṭul a nih. Mihriemin mani ngaidân a’ndik ei ti ringawt khan mi ngaidanah a’ndiknaw thei. Eg; I ruobuk mawi le ţha I ti em em kha, I ramrie/tuolbawmpa ta ding chun, a hna ţilhai kha hmunhnawk le hnawksakum a lo ni ve thei. I ta dingin a ṭha sienkhawm, I inkawlpa ta ding chun ṭha der lo a nih. Chuleichun, suol le ṭha inkhina ding dân ei pawimaw. Chu ṭha le suol ṭhehranna dân petu chu Pathien a nih. Dân inṭhutnabulpui nei loin mihriem in “ka danin” ti hmang seng inla khawvêl hi a fe thei naw ding a nih.

Natna, Rinumna haiin Pathien hmangaina a tarlang

Inpakna hlabu 100:5 Pathien zainemna chu chatuon. Rom 8:28: “Pathien hmangaituhai amain a ruot anga a kohai ta ding chun, an ṭhatna dingin iengkimin a thawpêk hlak.”

• Pathienin a mi hmangai luot leiin, robot a mi siem el loin Ama angpuia mi siemin dittlangna a mi pêk, sienkhawm mihriemin a hmang suol leiin rinnumna a mi’n tlun.

• Pathienin a mi hmangai luot leiin, innghatna, hadamna anizie a mi’n hriettir: khawvel thila innghata bohmang el ding nekin, Ama-ah ei innghat theina dingin rinumna hmangin a mi ko.

• Pathienin a mi hmangai luot leiin, sukdamtu a ni ami hril hriet: rinum tuora; ei hliem ding a phal, sukdamtu a ni ti ei hriet theina dingin natna nei a ṭul.

• Pathienin a mi hmangai leiin suola inhmang sawng loin a hnungzui dân a mi’n chuktir: rinumna a mi’n temtir, Pathien angin, hratnaw le chauhai ṭhangpuitu eini theina dingin.

• Pathienin a mi hmangai êm leiin thinain a mi hne a phal: vânram lût phal khawpin a mi hmangai, hnuoi taksa in ei lût thei sinaw leiin.

• Pathienin a mi hmangai êm leiin hnuoi hi naa inrûm a phal: rinum loin leihnuoi inhawi sien ch^wlna Lalpa ei ṭulzie ei hrietnaw ding. Hnuoi rinumin vân a mi’n ngaitir hlak.

Pathienin a mi hmangai em leiin mihriemhai hi thinain a’n hnetir, nang lei kei suola sip haiin damna ei chang theina dingin. A nau pakhat meu khawm rinum tuorin a’n thitir. Thina um naw sien, ei dam thei ta awm si naw a. Adam le Eve meu khawm mihriemhai sandam ei la hung ni theina dingin, Lalpa’n Hringna theira an fak ding vengin, Huona inthawk a tirsuok a nih. An suol leia a dehawn ni loin; a la sandam nuom leia a veng him lem a nih. Lalpa hmangaina a ropui ie!

Thukharna:

Rinumna, harsatna hai leiin Atheist-in Pathien um an ringnawna thiem inching tum hai sien khawm, rinumna hai tak tak hin Pathien um a sukchieng lem a nih. Pathien a um a tarlang el khelah, a hmangaina, a ngilneina, a ṭhatnahai khawm a tarlang nawk zuol a nih. Nat um lo na hmun ei ngai a ni chun, vanram ngai ei nih. Chu hmuna lût ding chun Pathienin rinumna hai meu hmangin a mi ko a nih. Apologetics inlâr CS Lewis chun, “natna hi khawvel nasêt ko harna dinga Pathien mic a nih” a lo ti a. S^m ziektu chun, Sukrinuma ka lo um hi ka ta chun malsawmna a lo tih. Rinumna meu khawma a ko har zolo chu iengti anga ko am ei la’n beisei ding a na? Natna leia chierin Pathien inphat thei ding ei ni nawh, Natna leia pan hnai ding eini lem. Lalpa meu hmana natna rinum tuormuolsuoa a mi’n tlanhai ei nih. Natna hi a tak a ni chun, a dam theina a um ding a nih. Chu damna chu Lal Krista Kraws thisen ngei a nih.