Rawngbawlna Sin Hi Ringtu Tinhai Kuoma Pek a Nih

By:- Pastor Dr. Lalbiekthang Buhril

Tirko Peter kha mihriemna ram takah chu mihuoisen, inchuktirhai lai khawma a lusa deu, kâwlhnâma mi nakâwr khawm sâtthla ngam a nih. Nisienlakhawm a hotupa Isu mana a hang um meu khan chu nuhmeite hmabulah khawm Isu ka hriet ngai nawh ti in an phat duoi duoi nawk si a ni kha.

Natna le harsatna, ṭitumna hmuna um châng, hrilsietna le sawiselna, ditsak hlaw lo le hnengde deua uma ei inngai châng hin ei Lalpa Isu hi ei phatsan el hlak am? Vawi iengzat am I lo phatsan ta hlak a?

Vawi tam tak Lalpa rawngbawl dinga tlinglo le tlâk loa ei um san châng khawmin Lalpa’n a rama rawngbawl dingin a mi la dita, hmangai tak le dawthei takin a mi la ko zing a nih. Chu chu uksak loin vawi iengzat am I lo inbieksan tah a?

Lalpa’n a rama rawngbawl dinga a ko na che dawnsak lo I ni chun ṭap le harâwt chu I chan la ning a tih.

Isu thi hnungin Tirko Peter le a ruolhai chu thlaphâng le beidawng taka umin, an nitin fâk zawngna tiengah an lo kîr nawk hnungin an ni lai Lal Isu chu hung inlârin an fâk zawngna hai mal hung sâwmin Nga khawm tam tak an hung man thei pha ani kha.

Chuonga malsawmna tamtak an dawng laiin Lal Isu’n Simon Peter kuomah ‘’Hieng hai nêk hin nangin kei imi hmangai lem am?’’ ti in vawi thum lai zet a hei indawn el ta lei chun Simon Peter chu a lungngaia, Lalpa, iengkim I hrieta, ka ngaina che ti I hriet ti chauin a dawn ngam ṭâwk a ni kha.

Chuongsa khawm chun Lal Isu chun a Beram hai châwm le enkawltu dingin a la ti ta rawp a ni kha. Chuleiin, Krista kohranhai enkawlna sin hi ringtu taphawt haiin thiem le var lei ni lo, tlin le tlin naw lei khawm ni loa lunginsietna lei chaua pek ei nih ti hi hriet a pawimaw a, chu hre chieng tu hai chun Lalpa rawng an bawl naw ngam ngai naw a nih.

Lalpa malsawmna ei dawnga, tam takin ei hung hlâwka, ei lawm laiin, malsawmna mi petu Pathien neka a malsawmna hai ei hmangai lem hlak hi a pawi hle a nih.

Isu’n ka Beram hai châwm rawh tia buoisie pa kha mi zui rawh a la hang ti nawk lem khan chu um ngaina khawm a hriet ta naw deuthaw el a ni kha. Meimarâwl ding a zawng, Johan 21:20-22 a lem khan chu Peter khan Lalpa hi mipa hin ieng am thâwng a ta? a ti vel zâk el a ni kha tie. Isu’n a dawnna chu ‘’Nangin mi zui el rawh’’ ti a nih. Chuleiin unauhai, suonlam siem loa Lalpa zui el hi a lo ṭha tak a nih.

Ṭhenkhatin :-
1. Ka In la bâwl zo phawt ka ta,
2. Kawppui la nei zet ka ta,
3. Ka lekha inchûk la zo phawt ka ta,
4. Ka sumdâwngna hi a hlâwk la zuk intêl phawt ka ta,
5. Sin det-in-do deuin la nei phawt ka ta,
6. Ka insung la hei suk burip hmasa phawt ka ta tiin suonlam awm tak takin ei siem hlaka, hrilchier nei loa Lal Isu zui el kuhi ei thaw dingtak chu a ni el a nih.

Rawngbawlna sin hi Pastor, Kohran Upa le Missionary hai ta ding chaua pek a ni bîk nawh. Isu ringtu ka nih inti taphawt haiin ei thaw dinga Lalpa’n a mi pek a nih ti hrie thar ei tiua, chu thaw ding chun ei rengin Lalpa’n a mi phût tlat a nih. Amen!!