Ra Insuo Ding Ei Nih

By: Rev. Ruolneisang Hrangchal

“Nangnîn in mi thlang nawh a, keiin ka thlang lem cheu a, va ra ding le in ra chu um zing dingin ka ruot bawk cheu a nih.” (Johan 15:16)

Lo neitu chun Lo a vâta, a raw a, Lo a chun Bu le thlâi chi dang dang hâi tû in, Nisapui le Ruopui hnuoiah a sûr a sâ hnuoiah ka sâwl ka kham khawm ti hleithei lovin inrimtakin sin a thaw hlak a. Asanchu, Lo a Bu le thlâi a chînghai kha a RA hlutak a la sîk ding a nih ti a hriet leiin, taimatakin sin a thaw hlak a nih. Amiruokchu, Lova thlâi a chînghai kha ra insuo lova a um chun a lâwm ngâi nawh. Fanghma/Dâwnkhaw/Vâimîm hâi kha a buk le kûng ṭha hlêp hlûp sienkhawm, a ra naw chun a peihâwn hlak a nih. Chuong ang bawk chun, Ringtuhâi hi  Isu Krista’n Sandamna  ringawt a tâwp el dingin a mi’n tlan/sandam an nawh a, a hiekhnung zuia a sinthaw hmabâk sunzawm ding le, tamtaka RA INSUO dinga suola inthawka a mi sandam hâi ei  nih.

Bible in Pathien lohma hâi in nih (1 Cor.3:9) a lo tih a. Loneitu khawm a lo  thlâi a ra naw chun a lâwm ngâinaw ang bawkin, eini khawm ra insuo lova ei um chun a mi neitu Lalpa ei chungah a lâwmnaw ding a nih, ti ei hriet a pawimaw hle bawk a nih. Ringtu Piengthar inti bawk si, ra nei ngâilo hrim hrim chu ringtu indik a ni thei nawh. Sandamna thu a chieng lo, ṭobul infûknaw an ni nuom vieu hlak. Chuleiin, ringtuhai chu ei nunah Pathienin  ra a zawng hlak a nih ti ei hriet zing a pawimaw hle. Chuong anga thlarau a ra ei insuo zing theina ding chun thil pawimaw tak pakhat a um a, chu chu mihriem hlui tisa hi a thi a ngâia, ei tisa a thi râwn po leh thlarau ah ei hring râwn el ding a n’a, ei hring râwn po leh ra ei insuo râwn el ding tina a lo ni chu! Ieng angin am ei lo ra ta hlaka, fâk thlâk lo kha takin am ei ra, annawleh mi ha ṭim zâwngin thûr takin am ei ra, mi fâkt hei zâwng thlumtakin am ei ra suok hlak am? ti inenfie seng a tûl a. Chuleiin, Ringtuhaiin ra ei insuona ding hâi a hnuoia ang hin tâwite te’n hang suklang inla:

1.Hmangaina-ah ra insuo ding ei nih:

Khawvel Sawrkâr tin le hnamtin hmalâk dân a inthawka ei khawvêl hmang mêk mizie le nungchang ei en chun, hmangaina hi nasatakin a deizo mêk tah. Inpâwngnêkna le mâni ṭânghmasiel na’n ei sip zo tah. Midanghai nêka chanvo ṭha chang bîk nuomna leiin rambung le rambung, hnam le hnam, chi le kuong inlâk hranna lungril le inpâwngnêkna in ei sipzo a, hmangaina a deizo tah. Ringtuhai lâi khawm a bâng bîk chuong nawh. Unau le unau inkâra inhmangaina, Mo le Tarpi /Tarpu in hmangaina a re zo tah. Pansak/Panthlang, Kohran le khawtlânga hâi hmangaina in hmun a chang zo ta nawh a, a mikhuol mêk tah. Ringnawtuhâi chu thuhran deu ah la zuk sie inla, Ringtuhâi bêk hi chu inhmangai tawn diel diela kârah  inlâichinna ṭha lema thlung nghet deu deu ding chu ni âwmtak ei nih. Bible in “Pathien chu hmangaina a nih” (1 John.4:8) a lo tih a, chun 1 Kor.13:1-13 ei tiem chun, hmangaina mizie le nungchang chieng takin a mi hril bawk a, thi hnunga vânram a fe ei tum seng bawk.

Vânram chu hmangaina khawpui a ni si a, Pathienthu hi thi hnunga hmang ding chau nilovin, damlâini ngêia hmang ding a nih, Hmangaina khawpuia lêng tlâng ding ei ni si chun, vawisûn hin in hmangai diel diela hringnun hmang a pawimaw hle a nih. Mâini mihriem chanpui hmangai thei dêr lo chun Pathien hmangai chu thil thei lo hulhuol a nih. Amiruokchu, hmangaina ti a hin suol chu suol a nizie hrezinga va lê zâwm ding tieng pang zâwng ruokchu an nawh. Suol chu suol a nih ti ngam ringtu ni a ṭûl. Pathien thlarau sinthaw indiktak chun mihriemhai suolna le an thiemnawna an hriettir hlak. Mihriema inthawka suok hmangaina nilovin, Pathien a inthawka hmangaina chi ei nia um hin in ṭhangpui intuona, in ṭawngṭaipek tuona haia in hmangaina kawng ah ra insuo a  pawimaw hle a nih.

2.Ringumna-ah ra insuo ding ei nih:

Ringumna hi a thlo a, amiruokchu, mi ringum ni hlaw suokna lampui hraw ruok hi chu a khawkrawk ve thung. Josef mi ringum in Aigupta ram Governor Lalṭhungpha a hluona dinga a thil tuok po po hâi le a lampui hraw kha a tluongpur naw hle a nih, ti hrilsei ngai lovin ei hriet. Nuhmei/Pasal thil a khawm ei hlutna ringumtaka ei  vawng thienghlim a pawimaw bawk a nih. Mihriemhaiin ei damsûng ni a hin sum ei mamaw a, fâk le dâwn ei zawngna le insûng khawsakna ding khawmin Sum ei mamaw hle a, Amiruokchu, kut tling lo le sum ringumnaw laka inthawkin ringumna ei vawng hring zing a pawimaw hle.

Indik lova sum hmuna le sum ringumnaw hâi hin mihriem lungril a suk hrisêlnaw a, chun mâni chan ding bâk inhnar tlatna hi suol ropuitak a nih. Bible-in Tangka sum ngâinat hi suol tinreng bul a nih  ( 1 Tim.6:10) a lo ti a nih. Pathien thutak-ah ei ringumna vawng nghet tlat a pawimaw a, mihriemhai hmanin mi ringumnaw hâi kuoma chun thurûk ei hril nuom ngai nawh a, chuong ang bawk chun, a ta dinga mi ringumnawhai kuoma chun Lalpa’n a thurûk hril nuom naw hle’ng a tih. Ringumna ei thlâksam ta êm leiin, thlarau a khawm ei ṭâwl zo an ta hi. Chuleiin, ringumna a hin ra insuo zing ding ei nih.

3.Taimâkna-ah ra ei insuo ding a nih:

Taimâkna le Pathienthu hi a’nzawm  tlat a nih. Piengthar indiktak chu thabo an um ngâi nawh (Rome 12:11). Mitin ei fâk le dâwn zawngna hâi an ang seng nawh a, ṭhenkhat Sawrkâra sinthawtu, ṭhenkhat Mission a sinthaw, ṭhenkhat sumdâwng le kut sinthawtu, etc, ei nih a, ei sinthawna sengah taima taka sinthaw ding ei nih. Malsawmna dawng tlaka sinthaw a ṭûl a, tha dûk inhrûla sinthaw hâi rêng rêng an hlawtling tak tak ngai nawh. Thabo chu khawlâi khawm mi lâwm an hlaw ngâi bawk nawh ti ei hriet. Chuong ang bawk chun, thlarau a ei bu ṭawngṭaina le Bible tiemna hâi khawm taima taka ei ra suokpui a ṭul. |awngṭai pei si lova hrât nuom, Bible tiem pei si lova thlarau mi nuom le Pathienthu hrilnuom ei tam deu deu ta leiin, inchûktirna indiklo ifen hlêng thei mi tamtak ei um an ta hi.

Rev. Dr. Billy Graham chun, “Thlarau ra pakuo hai hi khâidiet (chain) ang a nih ” a lo tih a. Thlarau ra pakuo hai hi a famkimin ringtu taphawt in ei nei senga, ei hmang nuom le hmang nuomnaw thuah a’n nghat a nih.(Gal.5:22).

Lalpa’n hringna tamtak neia, tam taka ra suok dinga a mi thlang le ruot ei nih ti hrezingin, ei ra ah mi an dama, ei ra suok ah Lalpa a lâwm theina ding chun, ni tin, hun tin le darkâr tinin ei tisa Kross a hemde a ei thisan zing a pawimaw a nih. Tam taka ra ei insuo theina dingin Lalpa’n a thu malsawm raw seh. Amen.