PUBG Inkhelnain Nuoi 16 Hmang Zo

Tulai lockdown leia inchuknain hai khar le online class haiin a mi nghawng dan chi tum tum hril ding um sienkhawm, Punjab a sungkuo pakhat a nghawng dan ruok chu rapthlak tak a nih. India Today in zani July 3 nia thusuok an siemna a chun Punjab a tleirawl kum 17 mi chun a pa Smartphone online class thawna a hmang anga inhrilin PUBG a lo inkhel ngat ngat hlak a. A game inkhel chau niloin, a pa bank account a pawisa siekhawl nuoi 16 zet el le a nu Provident Fund um po po chu thlakhat sungin a lo didak zo vawng a nih.

Hieng game hai hrim hrim hi a thlawna inkhel thei a ni zing laiin, a game sunga inchawk ding neu neu hi tam tak an siem kuol hlak a. Entirna dingin game thenkhat chu minute 15 sung ei inkhel zo pha ei life a bo a, nghak nawk met annawleh pawisa peka ei life belsa pei thei dam, chun indona hieng PUBG hai anni chun ralthuom chi hran hran le silaimu dam inchawk belsa na dam, game pass inchawkna dam, a nuomhai ta dinga sum sengna ding chi hran hran hi a um hlak a nih. Hieng thilhai inchawkna in a pa sum siekhawl le a nu pension sum po po chu thlakhat sungin a lo dikdak zo vawng a nih.

Sum hieng zozai iengtita a nu le pa hriet loa a lo hmang zo thei am a na, ei ti chun, online study thaw anga an hrilhai kha game inkhel kha alo ni zing a. Game hmangruo thil an chawk phata bank transaction alert message phone a hung luthai kha a lo delete nghal pei hlak a, chuleiin a nu le pa chun an hriet ngai naw a nih. Thlakhat hnunga an bank statement physical copy post a an hung thawn an hmu phing chun an naupa lo khawsak dan po po chu an hriet ta chau a nih. Nuoi 16 an sie khawl kha a pa damnaw in enkawlna dinga an lo sie kha a na, tuhin a pa ta ding chun in enkawlna ding chu beisei a bo der el an tah. A pa lungsen luotin a naupa chu Scooter repairna workshop ah sin an thaw tir a, pawisa hlawsuok intak zie hre sien a ti a nih.

Iengangin sin thaw sienkhawm scooter repair ringawta nuoi 16 hmukir nawk hlak chu beisei a um pek ta si nawh. Beidawng chu a um pek thlawt el an nih.