Phak Chin Sukdik

By:- Rev. Dr. Lalhmuoklien

“Iengkhawm ni sien la, ei phak chin ang pei hi sukdikin, chutaka inthawk chun fe pei ei tiu” (Phil. 3:16).

“Phâk chin sukdik” ti hi hril ding tam tak a um a. Nitin nun a hin Pathien ta ding le a ropuina dinga sukdik ding tamtak ei hmaa hin a um khupa chu chu chipchier takin hril ei tum a nih.

Ringtu nuna pawimaw tak lâia pakhat chu phâk chin sukdik hi a nih. Chu chu puitling nun a ni el baka hlâwtlingna bulpui khawm a ni bawk. Khingtieng a thlir chun phâk chin a sukdik lo nun ruok chu a bula inthawka hlâwsamna, hming sietna, a tawpa thina intluntu a ni hlak. Mihriem mit hmua muolphona a na, Pathien ngâi a lem chun tirdak umtak a ni hlak. Chu nun sukdik ding chun mani chan le phâk chin pei sukdik hi a pawimaw a.

Nâupang ei ni chun nu le pa thuâwina hnuoia kûnin nun sukdik a pawimaw a. Nu le pa thuâwi ding le nu-le-pa châwimâwitu ni dingin mawphurna naupang haiin an nei a. Chu chu an ta dinga nun sukdikna a nih. Nâupang chu ama khata thutlûkna siem thei a la ni naw leiin nu le pa haiin nâuhai inchûktirna an  pêk ding a nih. February 4, 2018 khan Delhi Hmar Christian Fellowship-ah Pathien Thu ka hril a. Chu ni chu Nâupang Sunday School an ṭan ni a na. Nu le pa tamtak an nâuhai Sunday School a kum khat sung kâi kim ngêi ngêi dinga ṭhang la pui an um a. Chu chun a mi suklâwma entawn dingin a ṭha hle in ka hriet. Nâupang hai Lalpa thununna le kâwknaa enkawl dingin Pathien-in nu le pa hai hi mawphurna a mi pêk a nih (Eph. 6:4). 

Chun, Ṭhalai ei ni chun a mi siemtu Pathien hre zing a nun sukdik a pawimaw êm êm a (Thu. 12:1-2). Kawppui ding zawngna kawnga khawm inthiengtaka Pathien kuoma ṭawngṭâina le inthuoa bul ṭan dik a pawimaw a.  Chun, kawppui zawngna thua chau ni lovin nun bul ṭan dinga inbuotsaina, inchûkna le fâk zawngna ding ngaituona kawnga khawm phâk chin sukdik a pawimaw a nih. Nu le pa nun ṭan thar hai, nupa kawp thar mania in hluo ṭan mêk hai hin “Kei le ka sunghai chun Lalpa rawng a ni kan bâwl ding“ (Jos. 24:15), ti thei dingin sungkuo nun ṭan dik a pawimaw a. Chu ding chun nâuhai inchûktir kawnga dâm, nupa inthuruol le in hmangaina kawnga dâm, Pathien ram ta dinga Pathien chan pêkna kawnga dâm, Kohran rawngbâwlna thua dâm sukdik dinga ṭhang lâk a pawimaw a nih.

Chûbâka chun mo nei a, mâkpa chen nei a, tu-le-te nei hai khawmin nun sukdik ding ei la nei ta rawp el thei bawk. Tu seng seng naunu nâuhai duota moa inthawk nâupang hung pienghai chunga khek rak khawm an um thei a. Ei khawsakpui le um pui nâupa nâuhai chau duota nâunu nâuhai ta dinga hmun nei lo khawm an dik chuong nawh. Papuitebawp ṭhenkhat hohlimna chu, “ei nâutehai chu ei sinthaw kâr in ei tarpi le tarpu hai kuoma ei maksan a. Zantieng in ei hung inlâwi chun, an pi an pu hai chun hi nâute  fel lâwm lâwm, in maksana inthawka a in kha a in char char a, a mi sukbuoi naw hrim hrim, an lo tih a. Ei nu ei pahai kuoma ei maksan ruok chun, hi naupang um inhnel lâwm lâwm, an huot taluoa sûnnithlâkin a mi sukbuoi, an lo ti lem dei hlak” ti ka hriet a. Andik le andik naw ruokchu a fiena ka nei chuong nawh. Iengkhawm nisien phâk china nun sukdik chu a ṭûl ma ma a nih.

Chun, nu ṭhenkhat mohai mi duot le hmangaina hmu inbeisei vieu a, mani tarpi tarpu hai ta dinga hmun nei lo  tlat bawk si dâm um thei a ni a, chu chu nun chu phâk chin sukdik ni thei bawk naw nih. Natna rinum tuora thi hmun suola ei um huna mi dawm hlumtu ding mohai chunga thatna insuo thei dêr lo dâm um thei a nih, chu khawm chu sukdik a ṭûl. Mo neia la um ve tho ding eini leiin tarpi tarpu chunga ṭhat lo insuo lâwk chu a malsâwm thlâk vieu lem. Hi nun khawm hi mani tuok hun peia sukdik a ṭûl ve naw maw? 

Iengkhawm ni sien la, ei phak chin ang pei hi sukdikin, chutaka inthawk chun fe pei ei tiu (Phil. 3:16). Chu ram chu la thei dingin Pathien kuomah a ṭhangpuina ngênin hma lang ei tiu.