Pathien Ruot Sandamna Lampui (Bible Study Episode)

By: Tv. JC Lallawmsang

I lo thlir ve di’m? Kohran a tam lem haiin puitling Sunday Sikul an nghawk zo, ei Pulpit hai Kohran hai halna hmun in an chang nawk, Bible thutak phawrsuoka thuhril hai; ngai nghawk um in an inchang lem tah. Ei thuhril haia; Pathienthu tak le Kros thu a dei zo, a san tam tak um sien khawm a puikurung tak chu; ei naupang/ţhalai/Kohran Pathienthu tak (Bible) a ei tu det naw lei anih. Hi ei thusep a thiltum tak chu Bible a Pathienin mihriem hai ta dinga sandamna lampui a buotsai tarlang, Bible thua Kohranin zung ei keidet nawk zuolna dinga inchûk tlang.

Ei thil inchûk tum ei hmu theina ding chun, Bible ei en ngun a ngai; Bible chu Pathien inpuongna ropui ani meu sia. Bible in a thiltum tak chu Isu hi sandamtu ani zie tarlang hi anih. Juda hai histawri a ziekna el an nawh a, sandamtu Isu tarlangna dinga Juda hai Chanchin a hmang lem anih. Bible hi tiem dan chi dang dang um a tih amiruokchu, a kalbi sut (inductive Bible study ei ti tumna anih) zawnga tiem hi a ṭha in a pawimaw hle anih. A ziektu’n a ziekna san, a thil hril tum hai zawng suok in, A ngaithlatu/a tiemtu hai ngirhmun hriet zinga hrilfiena siem. chuong hai po po zawngsuok nek a la pawimaw nawk zuol chu Isu le iem an zawmna a neia ti sui suok kha a pawimaw tak. (Bible chu Isu chungchang ani meu leiin)

Ziek a sei nawna di’n, hi ei inchuklai hi Inţanna bu a’n thawk ei ţan ding ana, ei fe thei na chen chen ei fe pei ding anih. (episode a insuo ei tum)

Bible study nei ding reng reng chun, a bu umzie ei hriet hmasa phawt a ţul. Entirna’n a Ziektu umna hmun le a ziekna san hai, a ziek pek hai le an ngirhmun, a ziek hun le hmu hai etc. (a background ei ti ding anih)

Inţanna bu BACKGROUND

A ziektu: Mosie (fesuokna 17:14, 24:4 34, 33:2 etc.), Sinai tlang (fes 24:4) an’thawka Canan ram lut hma hun sunga a ziek anih. (Sinai tlang an’thawk Mosie thi hma po)

A tiemtu: Israel hai (fes 12:41, 17:14), a bikin Aigupta sala inthawka suok hai le, Canan ram lut ding hai. An nina pawimaw zuol ţhenkhat hai: Aigupta-ah kum 430 lai sala lo intang anni leiin; an khawsak dan, an pathienhai in a lo hip ta annih. Jehova Pathien chieng takin an hriet nawh, An Pu Abraham kuoma thuthlung khawm an chieng ta bek bek nawh. Thiemna tieng inchûk sang Mosie chau naw chu an um nawh, ţeklei siema inbawlin an hun an hmang tlangpui.

Ziek na san: Mosie in Israel hai Jehova Pathien a hril hrietna, an inthla sawng dan histawri a pekna. Le a dang dang (a bua ei lut pha hril pei lem ei tih)

A bu thil tum tak: Khawvêl Inţanna le hnam thlang Inţanna.

A bu ţhenawina:

Adam hun	Noa hun	Abraham hun	Isak hun	Jakob hun	Juda le Zosefa
Thil po po intanna	Thil po po intanna	A hnam thlang intanna	A hnam thlang intanna	A hnam thlang intanna	A hnam thlang intanna
Suola tlukna thu a tarlang (Inţan 1-11)	Suola tlukna thu a tarlang (Inţan 1-11)	Suol a inthawka sandamna lampui a tarlang (Inţan 12-50)	Suol a inthawka sandamna lampui a tarlang (Inţan 12-50)	Suol a inthawka sandamna lampui a tarlang (Inţan 12-50)	Suol a inthawka sandamna lampui a tarlang (Inţan 12-50)
Khawvel intanna le hnam thlang intanna	Khawvel intanna le hnam thlang intanna	Khawvel intanna le hnam thlang intanna	Khawvel intanna le hnam thlang intanna	Khawvel intanna le hnam thlang intanna	Khawvel intanna le hnam thlang intanna
INTANNA	INTANNA	INTANNA	INTANNA	INTANNA	INTANNA

Zondervan pictorial, Nelson, Tyndale, Holman dictionary etc.

Tu ţuma ei inchuk ding: Inţanna bung 1-11.

Note: a pawimaw zuol hai chau ei en ding anih. Mani a lo inchûk zawm ding.

Iem a hril umzie? (INTERPRETATION)

Bung 1-2 (thilsiem hun) – Bible bung lai poa an tak na pawl tak ti inla inkhêl kher naw nih. Hril ding tam hle sienkhawm thukhir hai a lut loin Bible thiltum tieng fe lem ei tih, a rem ani chun thusep dangah hril tum lem ei tih. (Mosie ei ti hin Pathien le ani ti hriet ding)

Q. Iengleia Mosie in thilsiem Inţanna le, thil siem hai, siem dan indawt etc. hai hi chieng taka a tarlang kher kher am a na?

– Israel sala intang hai khan; an Pathien an hriet chieng naw ei ti kha, an pathien hmu phak hai chu Aigupta pathien hai: Khepri – siemtu pathien, Horus – van pathien, Nefertum- Nisa suok pathien, Kuk – thim pathien, Osiris – thlai/ ngaw pathien le pathien chi dang dang etc. hieng po po pathien a an nei leiin, Mosie in 1-2 sunga a tarlang pek tum tak chu, Aigupta pathien Khepri le Horus haiin hnuoi le van an siem nawh, Osiris in thing le ruo a siem nawh etc. an pu Abraham Pathien – Jehova Pathien hi Inţanna anih, Ama ngeiin hnuoi le van, a sunga um po po hi a siem ani ti kha a hrilfie na a nih.

Ei ta ding – Israel hai chau ni loin mi po po in, Pathien chakna le beiseina khawm nei ta lo in ei suol let dera sienkhawm, Hmangaina sip Lalpa’n ama ngei ei hriet thei ding in ISU hming put in a hung inhrilhriet. Ei lungrila hai suolin Pathien neka inhnik lem ding ni awm tak tak hai beisei dingin mi ti hlak a ti, a tawpna chu satan Sala in tangna, insirna chau anih. Thilsiem hai nekin a siemtu hnawt lem ding.

Ngaituo zawm ding:

• Q. Iengleia Pathien in mihriem a siem?
• Q. ‘Ama angpuia siem’ ti hi iem a umzie?
• Q. Iengleia Pathienin Adam a siem hmasa bik kher kher, Eve a ţul ding ani hre zing si in?
• Q. Sie le ṭha hrietna thei kung Iengleia a siem am ana?

Bung 3-5 (Suola tlukna)

• Q. Iengleia Mosie in Adam, Kaina, Seth, Noa hai a thlur bik am ana?

– An thlatu hai inthlasawng dan a hrilna, suol Inţanna le a ra suok a hrilfie. Khawvêl a rinumna san hai a hrilfie (sal ngirhmun) (suol leiin thina le rinumna) etc. bung 11 chen a hin khawvêl suol a thlur bik.

Ei ta ding – Sandam ei ţulna san chu Adam mi thlatu suolna hi anih, nitin suolna chu a ra suok hai anih. Vawisun a ei buoina tuok – Corona, Homosexuality, indona etc. hai po po khawm hi hnuoi awptu Adam in suol a lo lawmlut leia ra suok vawng anih. Mihriem; suol kutah an um ta leiin, Pathien le in zawmna a tawp, thitheilo dinga a i siem hai, thi thei an hung ni tah, Pathien in Adam le Eve kha chi ţhafamkima a siem, khawvêl hluotu inthlapungtu ding, nisienkhawm an chi chen khawm satan in a suksiet tah, (satan sirdetu ding nuhmeia insieng ding ani tlat 3:15) piengsuolna hai a ra suok, Homosexual hai, mani hmasielna hai etc.

Q. Pathien in Iengleia Adam a umna a hriet sa an dawn am ana?

Adam suola a tluk tâk leiin Lalpa’n – Adam ngei in a suk suol hre in, siemtu bula tlu lut nawk sien a nuom, sienkhawm, Adam ruok chun Pathien (nuhmei pe tupa) a suosal lem. (I nuhmei mi pek…a ti)

Ei ta ding – Pathien thlarau in mani ah zawna a mi pek ta chun, a hriet naw lei annawh, ei ngirhmun in hriein sim inla ama kuomah tlu lut in la ami nuom pui lei a nih.

Ngaituo zawm ding.

• Q. Adam le Eve in Hringna thei an fak nawk kha Pathien in iengleia an lau?
• Q. Abel inthawina a dit in Kaina inthawina Pathien in a hnawl, ienglei?
• Q. Pathien in Adam le Eve savun thuomhnaw a pek kha iem a umzie?
•  

Bung 6-11 (Tuilet hun -Noa indintharna)

Mosie in a tarlang na san: An thlatu a khikhmu na, Suolna kakhawk Phurrik zie a hril.

Ei ta ding – Hun ţha ei nei lai Lalpa ei pan nuom naw chun, Noa tui let hun ang tho khan; Isu hung nawk nia chun lawng bang tuoi pawl ning ei tih.

Ngaituo zawm ding.

• Q. 6:4 a Pathien nau hai kha tu ham? (Kaina thla am Vantirko suol)
• Q. Ham in a pa saruokna a hmua, a naupa Canaan in ţawngsie a phur, ienglei?
• Q. Noa hunah Pathien in sa fak a phal, ienglei?
•  

Q. Inţanna bung 1-11 sungah Isu khawlâm ei Hmu?

Isu hi thuthlungthar a hung in lang chau ei sawn hlaka chu thuthlunghlui hun daia sin lo ţan ani kha. Abraham hmaa, uma insal ani ang hrim khan, a lo um hrim anih. ama chungthu hril rawp a lo ni bawk. I) Inţanna huna Isu – Kol 1:16, ii) Isu Adam nuhnung -1 Kor 15:45 iii) Nuhmei thla mi Satan hnetu ding – Inţan 3:15, iv) Isu hung nawk ding Noa hun in a hlimthla – Mat 24:37.

…. Remchang hunah sunzawm nawk ding.. (inhriettirna: a tawi thei dan taka ei ziek a ni leiin; a kim naw hrilfie ţul dam a lo um pal chun Whatsapp 9552026004)