Pathien Rawngbawl Am Setan Rawngbawl?

By:- David L Hmar

Thil ei inchawk reng reng chu ei inchawk sa a ni leiin ei ta ti na a nih, ei pansak hai ta an nawa ei panthlang hai ta khawm a ni bawk nawh, eini ta ngei a ni leiin a nuom dan danin a um thei naw a, a um ding khawm a ni bawk nawh. Chu ang char chun Isu Krista Pathienin a thisena a mi’n chawk ta sa eini leiin Setan ta eini naw a, Pathien ta ei nih.  Ei nuom nuom a um ding khawm ei ni bawk nawh a, a min chawtupa Pathien ti dan dana um lem ding ei nih.

Pathien ta ni ta si in iengleia a min chaw nawtu lem Setan rawng hi ei la bawl rawp el am a na ti hi ngaituo inla nuom a um takzet a nih. Pathien rawngbawla inngai si Setan rawngbawl hi ei lo tam khawpin ka hriet.

Kohran thuoitu hai hei ti phawt ei tih. |huoitu ei ti hin Pastor, Upa le Local Committee hai hang in kawk tir bik deu ei ta, chu bakah department tinna ṭhuoitu hai khawm ṭhang thei an tih. Entirnan, KNP, KTP, NSSU le a dang dang ṭhuoitu hai khawm an ṭhanga ngai thei ei tih. Ei nina tak pakhat chu ṭhuoitu ni chu awl ei ti a, ṭhuoi ruok chu in tak ei tih. |huoitu ni lei ela Pathien thuawi Pathien rawngbawltu eini tina chu ni kher naw nih. Pathien le eiin kar lem a nih. A tlangpuiin ṭhuoitu ka ni an nawm, hotu ka ni an nawm, ka thu thu ti hi a tam a, mani thu chau ṭhaa ngaia fepui tum ei um hlak leiin ra ṭha lo an suo hlak a lo nih. Chu chu Pathien rawngbawl ni thei a ti? Teu love, Setan rawngbawlna pakhat a nih. Chulaia pawimaw nia ka hriet chu pumkhat ei nina hriea “inthuruolna” hi a pawimaw em em in ka hriet.

Pastor hai zuk hril hmasa inla, Pastor ei ti hin ieng kohran Pastor khawm an ṭhang vawngah ngai thei ei tih. Pastor hai hin an nina hi hlaw beiseina le hlaw hmuna chaua Pastor an ni am? Pathien rawngbawltu indik tak Pastor lem, ti hi ngaituo hmasa phawt inla nuom a um. A tlangpuiin tawite te chau zuk hril inla,  Pastor ṭhenkhat chu Kohran election leia nina chel ta lo, nina thlakhla leia kohran danga insawn khawm hriet ding ei um nawk. Mani Pastor chanpui ngei ngei sawisel pei khawm ei um, Pastor zu dawn khawm ei um tlat, Pathien thu chu a ni hmel rak naw khawp el maw! Pathien rawngbawl am? Setan rawngbawl ning an ta leh? Ngaituo zawm inla nuom a um takzet.

Upa hai hei ti nawk ei tih. Upa ṭhenkhat chu kohran kana, mani members hai ngaisak pei chuong bawk lo a, Unita thuneitu tak ni nuom ei tam el. Chun a tlangpuiin Upa ṭhenkhat hi Politics a inhnik deu Vote zawng khawm taima deu an um nuol bawk  A ṭhen lem chu ‘Sawrkar Election’ laia Unit maksana tlang rama vote zawnga fe pawl khawm ei um. Kohran sunga election khawm Politic taka Pathien ram kawk phak loa hmala khawm ei um nuol bawk. Pathien rawngbawl am? Setan rawngbawl ning an ta? Lo ngaituo zawm nawk ei tiu.

A dawt nawka Local Committee hai zuk hril nawk vat ei tih. Local Committee hai Unit pakhata lutak ei nih, ti hi hre hmasa phawt inla nuom a um. Local election chen chena vote zawng ti dam chu thil inzak um a nih, Unit ṭhenkhata ei um tlat a nih, a ieng kohran hran khawm ei ni tawl a nih. Chulai karah committee nei naah thu dit deu ei um bawk a, bakah a hun laia hril tum lo a khawhnunga chier nawk si ei um hlak bawk. Iengtinam kohran hrat thei ei ta. A ṭhen lem chu group dam an hei um a, Chairman pa group. Secretary pa group ti dam. Pathien rawngbawl am? Setan rawngbawl ning ei ta?

A dawt nawka dingin KNP le KTP ṭhuoitu ei ti hai khawm hin mani member hai ngaituo si lova mani thu thua thil thaw le sukthluk ei ching hlein ka hriet, department ei um thei nasan pakhat chu members hai an nih. KNP ei ti nu ṭhenkhat hai hi kohran sin le thilthaw naa fel em em insunga fel nawk lo, anawleh insunga fel em em kohrana ṭhang pei nawk lo, ei um nuol a nih. Ho vieu anga inlang si thilpawi tak a nih. Chun KTP ei ti khawm hi ei hrat naw ei ti nasan pakhat chu ṭhuoitu hai eilo fel tawk naw lei dam a ni nuom khawp el. Chubakah members hai khawm ei ni tho, a tlangpuiin ṭhalai thilthawa ṭhang neka khawlai leng, hla inchuk dinga fe si sunghai hmuphak naw chara ṭhang nawk chuong lo, chun hla inchuka ṭhang neka ina phone hmet lem. Ina inthawka kohran thila suok si lampui danga pet nawk an um zeu zeu hlak. Chuonghai chu Pathien rawngbawl am? Setan rawngbawl ning an ta? ngaituo zawm inla nuom a um.

A tawpna takah dingin NSSU hei ti nawk ei tih. Naupang hotu eini laia ei naupang hai ani ti ei hriet ngawi ngawi an puitling hnunga kohran neka khawvel thila inhmang lem an tam hle chun a hma laia ei inchuktir ṭhanaw lei ning a ti, ti hi ngaituo tham ve a nih. Ei hril nuom nasan pakhat chu, “Naupang chu a hraw ding lampui a chun inchuktir la, a hung upat hnung khawma chu taka inthawk chu pet ngai naw nih,” ti a nih. Chu umzie chu naupang hotu ei pawimaw hle ti na a ni chu. Ei inchuktir ding reng rengtiem pur pura zo el dam ei um hlak a, chu ringawt chun iengtinam naupanghai sandamna lampuia ṭhuoilut thei a ta. Iengtinam an ta dinga lampui ṭha kawkhmu thei ei ta? |huoitu lai po pova NSSU hotu hai ei pawimaw tak a ni ti hi hrie thar nawk inla nuom a um takzet. Naupang Hotu pawimaw zie le hotu ṭha le ṭhanaw a pawimaw zie chu an naupang enkawlhai puitling hunah hriet theiin a um a nih. Naupang Hotu ni lei ela naupang hai an har, an ṭawng le halna ding ringawt zawng khawm ei um hlak. Hotu ṭha ni thei a ti?

Khaileh, ei hril nuom tak chu Pathien rawngbawl am? Setan rawngbawl eini ti hi a ni a, a tu tu khawma ngun taka mani le mani lo inen seng dingin ei dit bawk a nih. Ei thil hung ziekin hrilfie zo naw ni ti chu ka hriet amiruokchu ka lungrila mi kap tu a ni ve leiin lungrila um ang khawm hril thiem naw inla khawm ka hung suklang ve reng reng a ni. Tiemtu hai po po a neka fie lem le ṭha lema ei hriet seng theina dingin Lalpa’n mal mi sawm pek raw seh.