Pathien Hnai Ei Ṭulna San – II

By: Samuel L. Songate, Pune

Kha hma khan ‘PATHIEN HNAI EI ṬÛLNA SAN – I’ ti ei hung ziek tah a. Kha taka khan Pathien hnai ei ṭulna  san point pathum  (i) A ta dinga siem ei ni leiin, (ii) A lak a inthawk hlatakah ei lo um tah leiin le (iii) A ṭhang lovin ei hring thei naw leiin ti ei hril tah a. Tuta ṭum ruok hin chu eini tieng panga ei hamṭhatna dinga Pathien ei hnai a ṭûl zie ei hung suklang ve thung ding a nih.

 Mi hmangaitu indiktak a ni leiin

Hmangai ti thumal hi Hmar ṭawnga thumal pahni ‘hma’ ti le ‘ngai’ inkawp a nih a. A umzie tak chu ‘hma-ngai’, annawleh ‘hmakhuo ngaituo’ tina a nih. Chuleiin mi ei va hmangai chun an hmakhuo, an ṭhatna ding ei va ngaituo pek tina a nih a, ei hmangai tak tak hai chu an sietna ding le an ta dinga ṭhanaw ei ngaituo in ei thaw pek ngai nawh. Isai 49:15-16 na lai kha ei en chun, Pathien in hieng hin a ti a nih.

“Nuhmeiin a naupa, a rîla ra chu, lunginsiet nawna dingin a nau nêne ne lai chu a theinghil thei am a nih? Chuonghai chun an theinghil thei a ni thei a, nisienlakhawm, kei chun theinghil naw ning che. En ta, ka kutphaahai hin ka ziek che hi, i kul banghai chu ka hmaah a um zing a nih.”

Nu, naute nene ne lai nei ta ding chun a naute chu zuk theinghil dan ding hlawl a um nawh. A lungrilin a lo theinghil pal khawma a nene tui intling khawl chun a nene hung suk mar a ta, a taksa chenin a hriet ngei ngei ding a nih. Chuleiin nu pangngai ta ding chun naute nene ne lai theinghil chu thil theilo ang a nih. Amiruokchu, a lo theinghil pal a lo ni khawmin, Pathien chun a mi theinghil naw ding, a san chu a hringna thuoka hring hai ei ni tlat leiin.

Thuthlung Thar tieng ei en nawk chun Rom 5:8 a khan hieng hin ei hmu – “Nisienlakhawm, Pathien chun a mi hmangaina chu inpâk tlâkin ân langtir a, mi suolhai ei la ni laia Krista eini aia a thinaa khan.” Pathienin a mi hmangaina hi a thu chauh in a hril nawh a, inpak tlakin, a tak ngeiin a hung suklanga, chu chu, eini misuol chatuona bohmang dinghai thi aiin a Naupa khât neisun Kraws lera a hung inthi tir khan a nih. Mani nauhai hringna le inthleng khawp hiela hmangaina chu ieng ang hmangaina am a ni ta ding maw? Chuleiin Pathien hmangaina hi ei sui chet chet chun, a mi lo hmangai zie ei hriet deu deu el a nih. Hlasiemtu khawmin, “An hril nekin a mi hmangai” a lo ti hiel a nih.

1 Johan 3:1 ei tiem nawk lem chun, “Ngai ta u, Pain a mi hmangaina chu a va nasa de. Pathien nauahai a mi’n bûk ta chu. Chuong ang chu ei ni hrim a nih” a la ti sa ta deu deu. A siehlaw ding ringawt khawmin mi sandam sienkhawm chatuon hremhmuna na tuora inper ngat ngat nek chun an hawi awm vei leh, nau nina a mi la hei pek sa nawk pei hi chu ropui deu a nih. Rom 8:16 lai lem khan chu “Chun, nauhai ei ni chun rohluotuhai, Pathien rohluotu, Krista hluopuituhai ei nih; chuleiin, ama ei tuorpui ding a nih, a kuoma chawimawia ei um ve theina dingin” ti ei hmu nawk a nih. Chuleiin hieng lawm lawma mi hmangaia, ei hmakhuo ngaituo tu a ni leiin Pathien hi ei hnai a ṭûl tak zet a nih.

Ei ta dinga remruotna ṭha tak a nei leiin

Nu le pa, nau neihai chun ei thei ang tawk tawkin ei nauhai ta dingin remruotna (plan) ei siem hlak. An hung puitling phaa an khawsak dan ding, an lekha inchuk dan ding le an kawppui ding chenin eini tawk tawkah duthusam le remruotna ei lo nei ve hlak. Hieng ang bawk hin Pathien khawmin a nauhai ta dingin remruotna  ṭha tak a lo nei ve a nih. Jeremiah 29:11 lai kha ei en chun “In ta dinga ka remruotnahai chu ka hriet si a, LALPAIN a tih, in sietna ding nilovin in ṭhatna ding le hmatienga beiseina pe ding cheua ka remruotnahai chu” ti ei hmu.

Hi baka hin Rom 8:28-30 lai kha ei en nawk chun hieng hin ei hmu nawk. “Chun, Pathien hmangaituhai amain a ruot anga a kohai ta ding chun, an ṭhatna dingin iengkim a thawpêk hlak ti ei hriet a. A hrietlâwkhai chu ama Naupa ang taka um dingin a ruot lâwk sih a, a Naupa chu unau tamtak laia naulutîr a hung ni theina dingin. Chun, a ruot lâwkhai chu a ko bawk a; a kohai chu thiem ân changtir bawk a; chun, thiem ân changtir hai chu a châwimâwi bawk a.”

Famkimlo mihriemhai hmanin ei nauhai ta dinga remruotna ṭha ei nei chun ei Pa, Pathien famkim lem chun nang le kei a ta ding hin remruotna (plan) le thilṭha chu a va nei nasa awm de! I hringnunah harsatna le beidawngna, hlawsamna damin an huol vel hlak che a, annawleh future career ding dam I buoia I ta dinga lampui ṭha ding i hraw fuk in I la hriet naw chun Pathien hnai rawh, Ama’n I ta dinga remruotna ṭha tak a nei. A siemtu che a ni leiin, I thaw ding le I hlawtlingna ding lampui khawm Ama’n a hriet.

A kuomah chatuon hringna a um leiin

Khawvel mihriemin ei ṭi tak chu thina hi a nih. Tu khawm hin khawvela doctor thiem le scientist ropui tak takhai chun mihriem hringna sukseina ding damdawi le thil dang dang hmusuok tumin research an thaw mup mup. Abikin HIV le Cancer natna bakah COVID-19 natna hai sukdam theina ding hi khawvel scientist haiin an buoipui nasa hle. Iem a san ei ti chun, thina pumpel, annawleh hringna suk sei an nuom lei a nih. Johan 3:16 ei tiem chun, Pathienin khawvel a hmangai em leiin a Naupa khât neisun a peka, chu a Naupa a pek ringtu taphawt chu bohmang lovin chatuona hringna an nei lem ding thu ei hmu a nih.

Chanchinṭha Johan 10:28 lai kha ei en nawk chun, Isu’n hieng hin a hril. “An kuomah chatuona hringna ka pêk hlak; kumkhuoin bohmang naw ni hai a, tukhawmin ka kuta inthawkin mi lâkpêk bawk naw ni hai. Anni mi petu ka Pa chu mi po po nêka ropui a nih, tukhawmin Pa kuta inthawk chu lâkpêk thei naw ni hai.” Hi chang a hin chieng takin Isu ngeiin ama ringtuhai chu chatuona hringna a pek hlak ti thu ei hmu a. Chatuon hringna a pek ta hai chu kumkhuoin bohmang naw nihaia, a kuta inthawk tukhawmin an lak pek naw ding bakah, Pa, mi po po neka ropui le thilthawthei lem kuta inthawk chun tukhawmin an lak pek naw ding a hril sa bawk. Isu Krista’n chatuon hringna a mi pek hi a lo va ṭha char char de aw! Khawvela Life Insurance policy po po nek khawmin a secure lem a nih.

Thutlangkawmna

Pathien hi a mi siemtu a ni leiin ama neka mi hmangaitu, ei hmakhuo ngaitu an um nawh. Chun, a mi siemtu a ni leiin a mi siemna san ei sukpuitling theina dingin ei ta dingin remruotna ṭha tak a nei bawk. Chu a remruotna chu hi damsung tawite a ding chau an nawha, khawvel in an ṭi tak thina khela chatuon hringna khawm a ni sa a nih. Chu chu chang ding chun ei dam lai ngeia ama ei hnai hi a ṭûl tak zet a nih.

(Pune, July 16, 2020)