Nghaklakte themthiem leiin Scholarship a dawng

By Rev. Dr. Lalrosiem Songate Nigeria rama nghaklakte kum 17 mi vel chau (eini lai lem chu thleng sawp le insung hrefeltu ding chaua ei ngai ding) chun engine lien Forklift an tihai a siem lai video social media a an the dar leiin an ram sunga inchukna insang taka inchuk theina ding federal scholarship a dawng tawp el a nih. Hi nghaklakte hi a hming chu Popoola Kehinde Esther, kum 17 mi vel chau a nih. Thilrik tak tak dawmna a hmang hlak forklift engine a siem lai video Twitter a an post chu an rama Minister of Youth and Sports cheltu Sunday Dare chun a lo hmu a, a talent nei ṭhat zie le inchuktirna ṭha tak pek chun mi hmang tlak tak ding a ni ti a hriet leiin a rawihai kuomah va zawng dawk dingin thu a pek a, an va zawng dawk ngei a. A hang hmu chun a chanchin hai indawnin an hnikna zawnghai a hang indawn chun, siem chi niin a hriet ta a, chuleiin ama hmalakna zarin an rama inchukna ṭha taka inchuk theina dingin Thawtanni July 27 khan Nigerian sawrkar chun Federal Scholarship an inhlan thu an puong tawp ta a nih. Hi nghaklakte video Twitter a post a um chu hihi a nih:

My dad saw this talented girl at work today repairing a forklift at 17 years old, she wants to study engineering and grow her expertise. He asked me to post this video so she could get some sort of assistance or guidance pic.twitter.com/TmNcVq4yfe

— Happiness carrier (@ThepreciousAda) July 25, 2020

Hieng anga an ram sunga talent nei ṭha a an hriethai siem lien hi Nigeria haiin an thaw nasa. Nikhat lai el khawm khan naupangte pasal pakhat ruosur hnuoia zei deua lam lai video an post a, mihausa pakhatin a lo hmu a, chu naupang chu Lagos khawpuia Dance Academy, lam inchukna ṭhataka an chuktir a, an chukna po po khawm aman a tum pek vawng a nih. Hieng anga hmathlirna nei kohran khawm hin ei pawimaw khawp el. Ei kohran sunga ṭhangthar laia hmang thei ding chi le siem lien thei ding chi hai hmu thiem a, siem lien hi hma tienga ṭhuoitu ṭha neina dinga ei thaw ding pawimaw tak chu a a nih. Ṭhenkhat chun mi ei inchuktira an zo pha an min sawn san pei ei ti a, ei nuomnaw khawm a ni thei. Min an min sawnsan nuom chun thawkna tlak ah an mi ngainaw a nel. Thawkna tlak kohran ni inla chu min sawn san ta nekin puotienga mihai khawm hung insawn lut nuom zing an tih. Pawl danga mi thawktu lak pek ding tina niloin, thawkna tlak kohran ei ni chun ti thu ka hrilna lem a nih. Chuleiin ṭhangtharhai ta dinga thawk inhawkumna kohran ei ni a ngai. Chuong ding chun iengtinam insiem rel ei ta, ti hi ngaituo dinga pawimaw tak chu a nih. Kohran ṭhenkhat chun ṭhuoitu ding an induong lawk a, a thiem deu le hmang tlak ding deuhai inchukna ṭha lemahai an tir a, an induong hlak a nih. Khawvela company inlar le lienhai hieng Google, Apple, Samsung, etc. hai lem chun ṭhangthar mithiem hung suok hi an mel kai zing a, an company hlawkpui thei ding chi an hmu chun an chukna po po tum pek a, a zo pha khawma thawkna ṭha tawk le hlaw tam tawk tak pek an inhuom hlak a nih. Chun khawvela hin lekhathiem le inchuknuomhai ta dingin free scholarship a tam, ei zawng pei ngainaw a mei a nih. Nigerianhai hi ei kohran ta ding chun entawn tlak tak an nih.