Nang Chun I In I La Tlung Naw An Nawm! (YOU ARE NOT Home yet)

By:- Rev. Lalkhamlien

Taksa châu rieua inhrie a Pathien Thuhril tak ngiel khawm huphur ngâwi ngâwia um a. Khawlâi dung le Biekin inkhawmna hmun haia mi zuk biek el khawm pei naw ngâwi ngâwi a châu chang a um hlak a. Chu chau el khawm chu ni lovin Pathien rama ei in hmang ve suna khawm felnaw le tlâknaw intia zawi ngâwi ngâwi hun dâm. Sina hang fe ding le rawngbâwlna tienga hma hang lâkna ding hrim hrimah phûrna um lo, peinaw ngâwi ngâwi hun dam a um hlak a. Mani ei in en a, in sung ei en a, suong tlâk ding le phûr taka kohran laia rawngbâwlna san ding a um naw a. Ei thaw ve sun ei thlîr a, kohran le khawtlânga mawphurna hai hrim hrim hnetak le hlâwktaka thawsuok hril ding a um naw em em, mani in dittâwk nâwna a lien êm êm bawk. Pathien tieng thlirna le beiseina nêkin lunghnuolna hin a mi zêm buoi nasa zuol hle a. Mi dang leh ei in khâikhi a, mani thilthaw le rawngbâwlna nêp ti in ei in ngaisie rawp hlak.

Kohran a rawngbâwlnaa hlâwktaka thawtu ni chu nuom a um a, amiruokchu thaw hlâwk hmu ding le hril ding a um naw a. Ngâidân ṭha le rem hrietaka mâwphurna phursuok nuoma um lâiin sukṭhat le sukdik nêkin thawsuolna hi intieng hnêr hnûr hmu ding le hriet ding a um zing bawk. Khawvêla hin chu beisei dân le duthusâm chu ei hmu naw ding chu a ni hih. Rawngbâwltu ropuitak tak hai khawm hieng ang thil a hin an lo fihlîm bîk naw zie, an beisei angin thil a um naw zie Henry C. Morrison a chanchina inthawk hin an lang chieng a. Pathien-in a biekna Nang chun i in i la tlung naw an nawm, ti hi thupui a hmangin, Lalpa sin thaw dân le a mi ṭhuoi tum dân ngâiven zingin a chanchin hang tiem ei tih aw!

Missionary Henry Morrison le US President Roosevelt: Henry C. Morrison chu Africa-ah Missionary-in kum 40 zet a um hnungin châwla IN tienga inlâwi a hun ta leiin In panin a hung ta a. A sûng hai le Kohhran hai chu a hung ding thu le a tlung ni ding hai chen thirhrui a thawnin a hril vawng a, anni khawmin New York Lawngchâwlna (Harbor)-a lo hmuok dingin an inhril bawk.

A hun takah Morrison a chuongna Lawng khawm chun New York Lawng châwlna chu a tlung a. Kum 40 sung zet ram pilrîla harsatna tin rêng kâra a rawngbâwlna hai a ngaituo lêt a, a sûng hai le Kohhran mi haiin lo hmuok an ta, an hlim ding zie le, an ngâihlut ding zie dam suongtuoin lungril taka phûr êm êmin Lawnga inthawk chun a suok ta a.

Amiruokchu, Lawng a inthawka a hung suok chun, a beisei le a suongtuo angin, a tuoktu âwm hmêl hrim hrim an inlang ta naw a, tukhawmin an lo tuok nawh tina a ni chuh!! Lawnga inthawk chun a hang thlîr a, mipui tam êm êm hin mi an tuok lâi hi a zuk hmu a. Lawnga sinthawtu pakhat chu an dawn ta chawt el a.

Lawnga sinthawtu pa chun, Ekhai! i Lawng chuongna-ah tho hin US President, Theodore Roosevelt kha a chuong ve an nâwm, President tuoktu hai an ni sawh. I sûng hai le Kohran member hai khawm US President hmu nuomin an tuokna a sawn an ṭhang ve vawng ning a tih, tiin a hril ta a.

Chu thu a hriet chun Morrison lungril chu sun ang elin a hung na ta a. Pathien kuomah nasa takin a nuor ta a. Hieng hin Pathien kuomah a ṭawngṭai ta hiel el a, Lalpa, Roosevelt hi ka class-mate a ni a, kei a nêka lehkha thiem thei lo lem a ni. Kei chun kan class-a khan 1st Position (pakhatna) ka lâk zie hlak a, Roosevelt hi chu Third Position (Pathumna) bâk a ni phâk ngâi naw zie khawm i hriet kha.

Tuhin, ka nêka lekha thiem thei lo lem le i rawngbâwl nêka Politics ngâisâng lemtu hi mi po povin an ngâisâng a, an lo hmuok a. Kei chun, ka hlâwkna ding le ka ropuina ding hai po po ka mâksan a. I thu sêl ngam lovin I thu leiin Africa ram pilrîl taka fein kum 40 sûng rin-um tamtak paltlangin I rawng ka bâwl a.

Tuhin châwl hâdam dinga ka hung vê huna hin hmuoktu le ngâisaktu tak ngiel khawm nei lovin ka um a. Kum 40 sûng zet ring umtaka I rawng ka bâwl sûng khawm châwimâwina pakhat khawm ka dawng naw bawk a ka lungril a na a, I chunga hin ka nuor takzet zet a nih, tiin, thlantui le mitthlî leh insawp rakin a thuomhnaw ṭhenkhat le a thir-thingrem lientak chu put khawm put zo lovin, hruia thlungin, lungrilna êm êm-in a hnûk tâwn tâwn a.

Chuonga a ṭawngṭai zo chun Lal Isû’n a hung biek a, “Henry, I mitthli a tlâ a, i ṭap a ni mâw? Hnuoi le Vân Lal meuin, ka tuorna le ka hringnun lam hraw kha i theinghil ta am a ni aw! Ieng leia i nuor vieu am a na? Roosevelt chu hi khawvêl mi a ni a, khawvêl hi a in a ni a, khawvêl tâ a nih. Khawvêlin a châwimâwi ding hrim an nâwm, khawvêl a inhawi tina le châwimâwina po po hi a nei a thieng ve an nâwm! Nang ruokchu, i in le i khuo chu Vânram a ni a! Hi khawvêl hi i khuol zinna le i mikhuolna ram chau a nih. Nakie, i In-a i hung inlâwi huna chun Vântirko tiem sêng lo haiin châwimâwina famkim leh ropui takin an lo hmuok ve ding che an nâwm.

Henry, Nang chun i in i la tlung naw an nawm!!!!  (Henry, you are not home yet) tiin, Morrison a lungril a chun thu a hung hril ta a. Chû thû chun, Morrison chu a sukhar phut a, a rin-umna le a tûorna hai lei a nuor ta lovin, hlimtak le lawm takin a hun a hmang thei ta a nih.

Khawvêla hin mikhuol le khuolzin châm el ei nih: Bible-in, “Hnuoia hin Mikhuol le Khuolchâm el an nih, an hriettir tah” a ti hi, Lal Isû ringtu ha’n ei lungril phêka ziek a, a taka ei hmang a pawimâw hle (Heb.11:13). Mithiem haiin MIKHUOL ti hi Greek ZENOS, “ama ram (khuo) indiktak suoksana, ram danga sâwt nâw te inzin,” tina a ni an ti a.

Khuolzin ti hi Greek ‘PAREPIDEMOS’,“khaw hmun nghet nei lo” tina a ni, an tih. Hi ṭawngkam pawimâwtak hi Abraham (Gen.23:4), Jakob (Gen.47:9), David (Ps.39:12), etc. haiin an lo hmang nuol ta a. Chu ang chun, ringtu hai hi hî khawvêlah hin khuol châm el chau ei ni leiin, khawvêl thil hai hi ngâina taluo nâwng ei tiu. Khawvêl thil haia in la-muk taluo dingin ṭhang la nâwng ei tiu. Khawvêl thil a hin duâm ta luo nâwng ei tiu, nakie vânram ei ngaihlutna ding dâltu, vânram min ngâi naw tirtu a hin inchangrâwi a tih.

Ei nuom ang anga um a, ei beisei ang ang ei hmûna ding hmun a ni nawh, ei khawhlun a ni naw leiin. Lâwmna le Malsawmna ei dawng hun a khawm mi dang hai mit sukkhamtu le an lungril suknatu ni lovin, midang hai ṭhangpuina le dawmkâng nân hmang tum lem ei tiu.

Ei hmangaitak hai min ṭhêtir tu thina lei a lungngâina ei tuok hun dâm, harsatna, elrelna le hrilsietna, khêla suol tin rênga hêkna dâm ei lo tuok a ni thei. Chuong huna hai chun, vântieng thlîra ei lungzîngna hai Pathien kuoma intlun a, hi hnuoi hi ei mikhuolna ram a ni zie theinghil lovin, Hnuoi hi ka in an nawh, Kan zinna chau a nih; Ka in ropui a um, Chungtieng rammawi a khin, ti hi a thunawn dingin hmang rawp hlak ei tiu!!!