Mission Field News (Thuhriltu Vol. XLVIII/No.11/November/2020)

Inkhawmna in an intar tah: Pathien zarin ei rawngbawlnaah malsawmna ei dawng peia ringthar belsa in ei um pei a. Centre Busti le Fulbari, West Bengal Mission Field-ah ringthar belsa a ei umpei leiin an inkhawmna in hai an intar ta hle a. An inkhawm chang in Varanda le tuol chena hai inṭhungin ei ringthar hai an inkhawm hlak a nih. Biekin an nei thei dan ding ngaituo zing a ni leiin Kohran hai in ṭawngṭaipui zing ei tiu.

Teithar lawm hmang: Tiama khuo, Assam Mission Field-ah Tarik 27^th September, 2020 khan a vawikhatna a dingin Ṭeithar lawm vawk that meu in an hmang a. Assam Mission Field-a hin tukum a rawngbawlna ei nei tan chau khawm nisien ringthar belsa in ei um pei a, ṭeithar lawm hai dam hmang theia an um ta hi lawm a um takzet. Hi hun a hin Hmarthlang Pastorate Officer inrawina in Hmarthlang biela inthawk khawm in mi ṭhahnem tak an hang thang thei a, hi huna hin mi pakhat in Baptistma a chang nghal bawk a nih.

Tripura Ramthar KNP Rorel Inkhawm: Kumdang anga mipui fekhawm  a remchang naw leiin Tripura Ramthar Field KNP khawm in Rorel inkhawm Sub. Hq. Duiganga hmunah tarik 10-11 October, 2020 khan tluong takin an nei a. Hi hun a hin Lalpa zanbu Sacrament an kiltlang a, Rev. Buonghranglien a kut a  mi pakhat in Baptisma a chang bawk.

Station pakhat in belsa an nih: West Bengal Mission Field-ah  Tindharia, Siliguri a um hai in ei missionary hai rawngbawlna hnuoia ṭhangve an nuom leiin ei Kohran ah an hung lu thar a. Tindharia khuo hi rawngbawlna dinga Station thar Pathien mi ruot pek ngei niin anlang a, hi hmun a hin ei Tirko hai in rawngbawlna an nei ṭan nghal a nih. Evan. Ashok rawngbawlna Limbu Bitha a hin ringthar sawm chuong ei nei thar a, tarik 7^th October, 2020 khan mi pakhat in Baptisma a chang bawk a nih.