LUNGRIL HRISEL

By:- Rev. Lalkhamlien (Thuhriltu Editorial)

Taksa hrisêlna hia hlu a, a pawimawhle lai zingin, Lungril hrisêl hi a hlu in a pawimâw lem ti hi ei pawm seng ring a um. Lungril hrisêl lo chu taksa in a thawhla thei a, lungril hrisel ruokchu taksa ta ding hriselna khawm a nih, taksa hrisêl lo lungril zangkhaitaka um tamtak an um a nih. Lungril hrisêl ti hi invêt le var thu hrilna a ni naw a, hlim le hlim naw thu khawm a ni naw chuong nawh. Nungchang ṭha, lungril thlêk dân inthieng le indik a ni lem.Mi, taksa hrisêlnaw chun ngei naw, fak theinaw an hau angin, lungril hrisêlnaw hai chun inrempui naw, dawngsawng thiemnaw le ngei lo tamtak an nei hlak.

Mi lungril hrisêl chun a nina le ngirhmun a hriet a, mani an hrietchieng a, tu am a ni a, ieng thaw ding am, ieng anga hun hmang ding am, ti a hrietthiem hlak. A thiem zâwnghai ṭhataka thaw in, a thiem nawna inphat lovin a nina ang angin a pawm thei hlak. A nina an zâpui ngâi naw a, hmasawn ruokchu a tum tlat hlak. A chunga innghat chu harsa hle sienkhawm phursuok tumin a bei hrâm hrâm a. Midang entawninmi dang thaw ang kher khera thaw a tum ngâi nawh. A thiem ang, a nina angle a thei ang tâwka nun hmang a tum ṭâl ṭâl hlak.Mani nina thup a tum naw a, a nina ang anga in lang suok ngam mi a ni hlak. Mâni ninaw anga inlang tum tlat hi mâni buoina insiemna a nih.Lungril hrisêl chun mi an var, invêt, hausa le pasiet thuaah inkhi lovin an mawphurna angin a en thei a, pasie le varnaw nia a hriet hai khawm inzâna pekna ding hmuna um hai chu an nina ang peia inza a rin ngâi naw a, mi chu hausa le var an ni leiringawtin anza chuong naw a. Mihriem an nina le an ngirhmun angpeia inzaa chawimawi dan a hriet a,mi dang a hmusit ngâi nawh.

Lungril hrisêl chu a thil tuok izirin a siemrem thei hlak. Tukhawm an hlim zing thei naw a, hlimnaw chang ei nei seng hlak, lungril hrisêl chun harsatna, mangangna, lungngâina haiin pawt fân hlak sienkhawm a ṭhang fan fan thei hlak. Joba kha harsatnânasatakin pawtsienkhawm Pathien hrietna, lungril hriseltaka nei leiin a hun nuhnung tieng khan a hun liemta neka nasa in malsawmna a dawng a ni kha. Pathien ei hriet zuol a, a hmangtlak ei ni zuol peina ding dâm, midang ta dinga malsawmna ni thei dingin dâmin harsatna, hrilsietna, hnengdena, hlawsamna le tlaksamna hai hmangin ei nun hi Lalpa’n a min tuoithar tum chang a um a, hieng hundingin ei infân ve a ṭul chang a um hlak. Buoisie el lo dingin Lalpa Isu Krista kuoma tluluta a, a kuoma inchûk ei ṭul hlak a nih. Lungrilhrisêl chunmidang ta dingathil ṭangkâi thaw thei naw sien khawmmidang ta dinga hnawksak in an um ngai naw a,a nun chu a hlim a mi engthawl a ni chawk hlak. Lungril hrisel lo, mi dang nuna buoi zing zing hai hi mani an in suk rinum a, mi hrietnaw karin an lo hnama, an hnam le an hmupei naw, an khing haiin hre si lo in anni bawk an lo na ngâwi ngâwi hlak.

Lungril hrisel chun ngaituona fîmtak a nei a,mi hril nazawng a âwi el naw a, ditthlangna siem kawnga a fimkhur thiem a, mani ṭha ti zawng le ditzawng ringawt en in ditthlangna a siem ngâi nawh. Mani tawka mivar a ni châwk hlak. Tukhawm a var saa pieng le var famkim ruokchu an um nawh. Amiruokchu, varna Damdawi ṭha tak aum, chu chu-“Lalpa ṭi hi varna bul a nih,”ti hih (Thuvarhai 1:7).Lehkha inchûk sâng ni naw sienkhawm Pathien ṭi mi chu a mawl pumhlum ngâi naw a, a lungril a hrisêl naw theinawh. Lungril hrisêl hai chu hmatieng beiseina in a ṭhuoi hlak.Lungril hrisel neina ding hin Pathien Thlarau ṭhuoina hnuoia inpek lût a pawimaw. Thlarau tieng thil dit chu hringna le lungmuongna a ni si a. (Rom 8:6)

Lungril hrisêl hailungril putzie tlângpui mani inenfie na dingin:

Lungril hrisêl chuh: A ni angin an lang suok ngam hlak. A hun le a hmun izirin lungril a siem rem thiem. Ama le ama anthunun thei hlak.A taimaa, a thaw taphawta theihtâwp a suohlak.Thil a thaw hmain nguntakin a ngaituo hmasa hlak.Khawlâihmuna khawm, ieng huna khawm neitu lungril a put thiem hlak. Nun inbûk tâwka thil thaw dân a thiem hlak.Mi neia innghat lovin, mani intodel a tum hlak.Hmasâwn tum zâwngin a lungril a sukthlêkhlak. Dawngtu ninekin petu ni a tum tlat hlak.Mi dang ngâipawimaw nachâng a hriet hlak. Nang i lungril a hrisel tâwkin i hriet am?

A tâwp takah chun unau hai, andik taphawt dam, an za um taphawt dam, a fel taphawt dam, a thienghlim dam, a ditum taphawt, an thangmawi taphawt dam – ṭhatna hrim hrim a um a, inpakna hrim hrim a um chun – chûong chu ngaituo ro.(Phlippi 4:8)