Lalpaa Lawmna (Numbar 14:8)

~ Rev. Challienkung (Thuhriltu Vol.XLIX/No.04/April/2021)

Ei lalpa le ei Pathien hi iengkim thaw thei Pathien a nih a. ei lawmna dingin iengkim a mi thawpek hlak. Chatuon hringna mi pe in a nauah a min buk a. Ei suolhai mi ngaidamin, thiemlo chang tahnung thiem a min changtir a, Thlarau tieng malsawmnaa mi vurin thienghlimna lampuiah a mi ṭhuoi hlaka a, nitin in ami vengin a mi enkawl hlak. Ei lawmna dinga a thaw hi hril seng lo inzawt seng an nawh. Joshua le Caleb in ei chungah Lalpa a lawm chun chu rama chun mi ṭhuoi a ta, mi peng a tih,” an lo ti ang khan ei chunga hin Lapa a lawm chun misuol ei ni lai hmana ei lawmna ding mi thawpek nuomtu chun a va thaw nuom nasa zuol awm de ! Ei bile chun, “Aama lawmna dinga thaw tum ding le thaw dinga nangnia sin thawtu chu Pathien a nih.” (Phil. 2:13) tie i hmu angin Ama, ei Pathien lawmna ding thaw hi ringtuhai tadinga thil ṭul le pawimaw tak chu a nih. Ei ṭul le mamawhai mi thawpek hlaktu ei Pathien hi ei suklawm chun ami thawpek rawn deu deu ding a nih.

Eini hlak chu:  ei Pathien thuin, A hringhai chu mani tadinga hring ni talova.. “ (II Kor. 5:15) ti thu a mi hril laiin ‘ka ta ding aka hring laiin ka lawm ngai nawh,” tini  awmtakin ei Pathien suklawmna ding ngaituo lovin mani lawmna ding ngaituoin ei buoi nitin a. Ei hla pakhatin, “Lawmna zawngin an tlan vel sang tamtak, Hmu lovin thlan thimah an inkhelpui” ti po ei thaw nawk hlak. Ei Lalpa Isu hi iengtin am lawm a ta ti hrim ngaituo lo le hriet khawm hrefu ngai silovin Ama ruok chu ei lawmna ni kumkhuo dingin ei dit bawk si. “Isu ka lawmna tak ni la, hnuoia le vana khawm,” tiin. Ama chu ei lawmna ni zing ding chun ei dit a. Eini hlak chu ama lawm dinga um ei tum ngai si nawh. Isu ei di tang hin mi’n mi ditin mi ti hai sien, anni ei lawmzawngin um si naw hai sienla. Tum am lawmin hlim an ta? Ei Lalpa Isu hi eini neka ieng hrenaw lem angin ei siem hlak tina an naw ding maw? Vawikhat chu Hmarkhawliena inthawka in kan lawiin, ka sunghai du zawngtak le an lawmzawng tak ka phura, thimbuta kan in ka hang tlung chunk a thil phur ngawt chu an lawmin an buoipuia, kei a phurtu kha a mi uksak an um ta nawh. Eini Pathien nau duot lai hai khawm hin ei Pathiena inthawk hin a malsawmna ruok ei beisei a, malsawmna mi petu ruok chu uksak lovin, a lawmzawng thaw ve tumna le  alawmzawng mi ni tumna khawm ei nei ta ngai si nawh a ni hin. “I aw, Lalpa i malsawmna hlu hi, nang nekin tamtak chun an ngaihlu lem,” ti kha a hung indik nawk el hlak chu a ni hi.

Chuleiin, a lunginsietna le hmangaina zarin ei Lalpa chunga hin ei lawm tah a. Ei hmu le ei hriet chieng ang peiin ei lawmna la zuol pei bawk dingin ei ringa. Chulai zing chun eini khawmin Lalpa lawmzawng ngaituo in zawng ei ta, a lawmzawng mi ni tum seng ei tiu.

 Lalpa lawmzawng inlang hlakna hai chu:

1. Krista lungril (Phil. 2:5) puttu hai chungah Lalpa lawmzawng an lang hlak, Chu lungril chu inngaitlawmna lungril a nih. Mi chapo le uong hai; midang hmusit hlaktumhai  chungah Lalpa a lawm hlak tie i hriet ngai nawh.

• Mani inhnawl ngam (Matt. 16:24) Ei chungah Lalpa lawmna ding chun mani inhnawl ngam ringtu ni a ṭul. Chu chu mihriemhlui thina a nih. Mani kha a hring kur chun eini ah Lalpan hmun a chang ngai nawh. Ei chungah Lalpa a lawm theinaw chun chu hringnun chu hringnun lungsietum tak a ni hlak. “Ka tadinga ka hring laiin ka lawm ngai nawh. Ka Lal Krista kona anga Isaka Maichama kan hlan phawt chun, Malsawmna tuikhur lawmna’n a hung luong tiin hla ei sak hlak ani kha.

• Ringnaa mi huoisenhai (Heb. 11) Isu  ei ring leia mi huoisen hai chunga hin Isu a lawm hle ring a um. Thuthlunghlui a mi huoisen, Lalpa Pathien ringa chel tlattu le inphatsan ngainaw tuhai khan Lalpa an suklawm hle ring a um. Mihaiin Isu an ring ta laklaw leh,an iringpa Isu lawmna tawkin an lo ring ngam a nih. Isu an ring leia muolpho ngam, Isu an ring leia chan ngam, tuor ngam dam, Isu an inphatsan nuomnaw leia martar ngam tamtak an um laiin eini rawi hi chu mi inpak le namtawm fahrana Isu hnung zui mei mei hi ei ni lem tawl hlak a na. Ei chunga hai hin Isun lawmna a hmu zo dim chu maw?

Awleh, Isu Krista ringtuhai hin ei hringnun liem tah le ei hmang mek huna hai hin in en chieng nawk zuol ei tiu. Ei Lalpa Isu lawmna ding ngaituo hman lek lova mani lawmna ding chau ngaituoin hun ei inliemtir rawn taluo an ta hi. Ram tamtak la a, ram lientak hluotu dinghai ei ni lai zingin Isu ei suklawm ngainaw leiin ram ei zau thei nawh a, ei ramdel khawm a chin a ni hi.

Eini hai khawm a mi suklawmnawtu hai chunga nekin a mi suklawm rawptu hai chungah ei lawm lem a, chuonghai chunga thil ṭha thaw khawm ei nuom lem hlak kha tie. Mihaiin mi suklawm hai sien ei ti ang bawk khan ei Lalpa khawmin ei suklawm a beisei ve a nih. Chuleiin ei damlai hringnun tawite a liem hma hin Lalpa suklawm thiemtu ni seng dingin ṭhang la seng ei tiu. Ei suklawm rawn po leh ei sawr rawn ting el ding an nawm.