Lalpa Zawngsuok Ram (Deuteronomy 11:10-11)

By:- Mr. Lalthanglien, Saidan

Hun ṭha mi petu ei pa Pathien hming chu a tharin inpakin um sienla, hunthar ni thienghlim min chuongkai tira lunginsietna hun peka eila um hi ei vângnei hle a nih.

Kum 2020 kha kumbul ei hang hmang ṭan dek dek a Covid 19 leia ei Biekin hai hluolum thei lovin ei hang uma, kum 2021 khawm hieng chen eitlung nâwk el ta lawm a um takzet a, hripui leiin harsatna takmtak ei tuok a, thina chen tuoktu tamtak ei um ta bawk. Iengpo khawm hung tlung sienla Lal Isu kut chunga um ana, eini khawm a kut chunga um eina, chuleiin hi hri leia Pathien ei châwimâwina le ei inpakna kawnga hin tlansietna nêkin Pathien ei bêl a ni phawt chun hri ṭi umtak laka inthawkin ami humhim ei ring tlat anih.

Thuthlunghlui huna hai khawm khan alo um taa. Lal Ahasuer rorelna pindana ko ni si loa lut chu kâwlhnâm sathlum ding, thi ngei ngeina ding hri a na. Lalnu Esther chun Lal kuoma va lut kata nithum sung chu Susana mi lo tawngtai pui inla ka thi leh ka thi ning ata, tiako zing pumakâwlhnâm a sathlum zuom hiela a um khan lâwm a hlawa ni kha.

Chuong ang chun,tuta ei thil tuok mek baka hin iengthil am ei tuok nâwk ding ei hriet nawh. A pawimaw tak chu Krista hmangainaa inphumin iengkhawmin mi ṭhe naw sienla. Iengpo hung tlung sienkhawm Ama min hnai zuol tirtu’n inchang rawp sien nuom a um tak zet.

Deutoronomy 16:1 hi Mosie in Isreal hai kuoma a hril a nih. Abib thlaa Lalpa’n Aigupta sal intang zana a ṭhuoisuok ding ṭum khan hri ṭium tak an lenga, kha hri kha chu in Quarantine-a dam khawm nilo,Doctor thiemna le varna enkawl hman chi khawm ni lo, naulutir thina kha ani tlat el a. Ieng anga pieng ṭha mithiem le var khawm ni hai sien nupa kara nau pieng hmasatak naulutîr ani phawt chun thi ngei ngei kha ani ringawt el a nih.

Chuleiin, Abib thla, thlasera an nei dinga Pathien in ati zan tak chun kum zali lai Aigupta sal tang harsatna namen lo lotuok tah, Isreal mi Lalpa’n a hriet lawp lawp hai chu vawizâna inthawkin Aigupta rama inrimsiknaa inthawkin ka ṭhuoisuok ding cheu ana.In pi le pu hai kuoma ka lo tiem ta ram nene le khuoizu luongna ram inkut sin inrim lei ni lo Grep ra bâwr  ṭhataktak hai, chuong malsâwmna hai indawng theina dingin vawizana inthawk hin Aigupta ram inhmu ta naw ding anih,tiin Lalpa’n a hril a.

Lalpa chun Mosie hmangin Isreal sungkuo hai kuoma chun, naulutir thina hri ṭi um tak laka inthawka inhim theina dingin insunga lut inla inkal khum ro, insungkuo ta dingin Beramte pakhat la unla that unla, a emin em hmin unla hlohna kha leh faro, sungkuo ta dingin Beramte pakhat a lien taluo ani chun sungkuo dang ko unla fakhawm el ro. Amiruokchu a thisen chu infâk ding ani nawh. Beramte thisen chu in kawtkhâr bienga le in kawtkhâr lutna chunga intat vawng ding a nih, tiin a hril a.

Chu zan chun thina vantirko chun intin a hung sir a, hripui ṭium tak el, thina hripui hung chawia Beramte thisena inchik ve lo sungkuo hai chu a lut chila, pindan um khawm nisien an nau lutir nina chu an thipui tho a nih. Isreal nau hai ruok chu an nau lutir nina chu an thipui ve naw a, hmelṭha le hmelṭhanaw, misuol le miṭha khawm ni hai sienan kawtkhar luchunga Beramte thisen leiin sanhimin an um a nih. Pathien hming inpakin um raw seh.

Exodus 12:2, Hi thla hi inta dinga thla hmasatak inṭanna ning ata, nikhat ni, a ni hmasatak chu ani ding a nih. Chu ang chun thla inṭanna dinga tiem ṭan dingin Beramte thisen inchik zana thina hripui a tlung zan kha kum inṭanna le thla inṭannaah Lalpa’n ami hai a lo intiem tira.

Ei ni khawm kumhni sung hripui in a mi tuom ta a, nuom dan khawmin ei um thei ta naw a, ṭi dawr dawrin mi tamtak um mei ei tih. Amiruokchu Beramte thisen Lal Isu thisen hi belthar ei tiua, Ama chauhi hri laka mi venghim theitu ani ti hi hrethar bawk inla nuom a um takzet a nih. Chuleiin, Isu Krista thisen hi ringsanin ei nun hmang ei ta, kum hmang ei ta, thina hripui laka Israel hai ṭhuoisuoktu chun ei khawvel boruok setak kara a mi ṭhuoisuok ve hi ei ring tlat a nih.

Chuongchun, chu zâna inthawk chun Lalpa’n a mi hai a ṭhuoisuoka, an fe peia kum sawmli sung thlalera hun an hmanga. Lalpa’n mal a sâwma thlalera chun hritlâng, âwmna awngrawp khawm a um nawh. Chuong khawp chun Lalpa’n mal a sâwma nih.

Aigupta rama inthawka fak ding an phursuok khawm nilo, thlalera chun a hun le hmun peia an mawmaw hai a pêka, sa an mamaw huna Vamim a peka, an silfên hai hlui theilo dingin a siema. Chuong khawp chun mal a sâwma, thlalera fak ding le tuihring um nawna hmuna lungpui chang emem a inthawkin dâwn ding tui inhnik tak Lalpa’n a pek a. Lalpa’n a zawngsuok ram an panna lampui a chun intum chawp Pathien chun a tum pek pei el a nih.

Beramte thisen ringsana Lalpa thu phursuok ngam ringtu hai ta ding chun thlaler lampui chu malsâwmna’n an chang ang hin kum 2021 a ei lampui hraw zinga hin Beramte thisen suong ei ta. Ama tienga beiseina hring nei dingin kum 2021 hi Lalpa ta dingin kum thienghlimLalpa  ditdan le an puongna tlak ni thei dingin kohran hai in Pathien ei bêl kuma inchang thei sien ti hi ei hang hril nuom chu a nih.

Israelhai chun thlaler lampui an hraw peia, amiruokchu thlalera chun harsatna dang dang an hung tuok ta a. Zanah meipui, sunah sumpui hmangin Lalpa’n a ṭhuoia, mei le sum antâwl sung phawt chun an intâwl ve a ngaia.Amiruokchu, chuonga Lalpa’n meipui le sumpui hmanga a ṭhuoi a, silfen hlui theilo siem peka enkawlzing laiin Pathieng ringzo nawna an hung nei ta a.

Milim Pathien Rangkachak bâwngte lim siemin, nang hi Aigupta rama inthawka mi ṭhuoisuoktu kan Pathien chu i nih, tina dam a hung suok chun Pathien lunginsenna chu a hung ṭuong ta a.

Mosie kuoma chun Pathien in iengtin am a tia, hieng mipui mi kâwmâw hai hi ṭhuoi ṭhuoi ta naw ningah, ka sukhlum vawng ding anih ati hiel a ni kha. Nisienlakhawm, Mosie chun nilove Lalpa, Aigupta saltangnaa inthawkin I mi ṭhuoisuoka thlalera hieng chen I mi ṭhuoi tlung ta bawka, lamlaka I sukhluma, I mipui hai I that ani chun, Pathien hrielo le nangma hrie lo han hrieng an ta, Pathien in Aigupta rama inthawkin thlaler lampui a chun a ṭhuoi hmanga fak ding dawn ding ṭha hai a peka a sukhlum vawnga tîng an tih. Hieng mipui hai hi I sukhlum ding nêk chun I lekhabua ka hming I ziek hi thâihmang el lem rawh, a ti a ni kha. Ṭhuoitu ṭha ava tling de, ṭhuoitu tlâk ava ni ngei de. Kum 2021 kumbul ei hmang zing lai hin kohran ṭhuoitu rawngbâwltu hai khawm ka sirna hmun hmun hungsir ve ro, ka thaw thaw hung thaw ve ro, tiin hmangaina in ṭhanghar thar inla nuom a um. Lalpa’n a thu suktawpna chun, infel lei le in ṭhat leia ka ṭhuoi cheu an naw a, lunginsiet leiin ka ṭhuoi cheu a ni lem, ti a nih.

Hun ei hmang mêka hin Lalpa ringsan ei ta, a tina tieng tieng fe pei ei ta, chu nilova Lalpa neka ngâipawimaw dang neia Pathien neka ṭi lem ei nei a ni chun nang a tieng Lalpa a ṭhang naw ding a nih.

Chuleiin, ei ṭi emem hripui leia ralzama ṭi dawr dawr el hai hi ṭi le tlansie lo dingin chu Beramte Lal Isu thisen bel eita.A ran tlatna hmuna Beram hai eini hi kohran han ei muongpui ka hang nuom takzet a nih.

Chuongchun, Isreal nâu hai chu an fe peia Kanaan ram ṭhuoilutin an um ta a. Kanaan ram an hang lut chun Kanaan ram chu mifel ruol umkhâwmna a lo ni naw bawka, a ram mi hai chu an lo tam bekbeka,an lien bawk a, do ding khawm an tam a, lal lien taktak an um, a lal chin deu khawm an um bawka.Chuonghai chu Isreal sungkuo-in an inthielfai a ṭul zing bawk, chuong anga thaw peiin an fe pei a. Lalpa’n an kuomah thu a hung hril nâwka, in va hluo ding ram chu in tlung ta ding a na, nangni zawngsuok ram an naw a, Lalpa’n a zawngsuok ram a nih. Nene le khuoizu luongna ram, van ruotui dawng ram, hnieng inhnarna ram, kumbula inthawka kum tawp chena Lalpa mit fûkna ramah ka ṭhuoi ding cheu a nih, tiin.

Amiruokchu, Kanaan ram an hnai deu deuamilien hai an ṭi leiin helpâwl an suok rawn deu deu a Lalpa lung a ni ta naw a.Joshua le Celeb ringnaa pasalṭha hairuok chun anni chu ei bu ding an niannawm, ei chunga Lalpa a lâwm phawt chun chu rama chun mi ṭhuoi tlung ngei a tih, an ni chu ṭi naw ro, tiin mipui an infûi a. Hlaphuotu in a hnuoia ang hin a lo inzâwt hiela nih:

Lalpa zawngsuok ram kanaan ram mawi
Ringna a chengin
Lengdang ngai lova mihrang hai an lengna
Jordan vadung rala tuklo ram hring duoi
Thingtin par vulna khuoiva le ankaina,
Mani thawsuok ram, Doral anzamna ringnaa kalchawi in

Chu ram chu an hnai deu deu Joshua le Celeb ti lo chu mipui chier hrat le helpâwl an pung deu deu pei bawk a. Lalpa ṭhatna ringawtin Isreal nau hai chu a siem ṭha thei ta naw a.Chuleiin, Joshua le Caleb ti lo kum sawmli chunghai po chu Lalpa’n Kanaan ram an lût a phal ta naw a, kum sawmli hnuoi hnuoi Aigupta chanchin la hrie lo le naupang hai chau chu Kanaan ram lût thei a nih. A dang hai po chu thlalera an thi vawng ding a nih, a ti angin thlalera chun mi tamtak a sukhlum a. Kanaan ram chu a lut nuom hai ta ding chun Lalpa’n kawt a hawnga lut thei naw mei ni ti hai ruok chu an lut naw a nih.

Kumtawp chena Lalpa mitfukna ram Bawng nene le khuoizu luongna ram nisi in chu rama chun mirimsie le pasie umnaw lai um naw nih. An um zing ding a nih.

Kum 2021 kum hi thilpek kumin inchang sien,luongsuok kum in hmang lem inla, eini ei intodela ei in kawl hai tlasam ngâwi ngâwia an um khawm hi andik chuong nawh. Rimsie le harsa, pasal hai thisan hmeithai, nu le pa nei ta lo nau fahra ei ti hai khawm ku hi nang le kei a kut hmanga keidawk dawm kang dingin Lalpa’n kawt a mi hawng pêk a nih.

Kanaan ram khang lâwm lâwma hnieng inhnar rama ku khan, mi rimsie um naw lai a um naw a, an um zing a nih.

Ei ram khawm hang enta u! Building ropuitak tak nei ei tam tah, ei sira mi rimsie le harsa an um hi a san iem ning a ta? Chuong hai chu Lalpa’n ei rawngbâwlna dinga a ruot an ni ti hi hrie thar ei tiu.Lalpa’n a thutak ei chan senga a tharin malsawm raw seh.