Kuta Bâwl Lo

By:- Samuel L Songate

“Ei umna hnuoia in hi ṭiek sien khawm, vânah, in kuta bawl lo,kumkhuoa um zing ding, Pathien kuoma in nghet chu ei nei ti ei hriet sih a.” (2 Kor. 5:1)

Pathien malsawmna le lunginsietna zâr lieu lieu in kum 14 lai sawrkar sin ka thaw hnung le, ka thawk ruolpuihai a tam lemin in le lo an mi nei san vawng hnungin tukum March thla lai khan kan nupaa kan thaw suok ve lieu lieu bâkah bank a inthawka housing loan thahnem tawk tak la in Pune khawpuiah chêngna ding in (2BHK flat) chu kan inchâwk ve thei hrâm a. Tu mi hrietpui loin kan lawm ve em em a, tangka sum tamtak, nei bâk senga kan inchawk a ni leiin kan lungril po po hi a lâk ve a nih.

Kan inchâwk hlim chun an la zo fel naw deu leiin fena kan nei châng ieng chen am an phâk tah ti malama a building zuk hmu nuom leiin a ṭûl rak naw khawmin kan hei hraw kuol deu sek hlak. Tuhin a bawltu (Builder) haiin an bawl zo ta leiin chabi khawm an mi pek fel tah a, sawtnawtea insawn lut dingin thei ang angin a sûng cheimawi vel kan thaw mêk a. A sûng cheimawi dinga kan mistiri ruoihai kawt hawng pêk le an inlawi hnunga kawt kal in nitin deuthaw thla khat sung vel hi chu tûk le zân kan inlawn kuol tah a nih.

Hienga kan in thar dingin kan lungril po po a hluo sip lai hin nikhat lai el, August 28, 2022-a Delhi khaw kawla um  NOIDA khawpuia insâwng sang pahnih Super Tech Twin Towers an ti, sâwng 40 ve ve a insâng, dân loa bawl (illegal construction) a ni leia Supreme Court rorelna dungzuia an sukchim khan ngaituona nasatak a mi’n neitir a. Building sâwng insâng le ropui em em, tangka sum vaibelsie 50 chuong sênga kum 10 neka tam India rama Builder hmingthang Super Tech haiin an bawl tah, Supreme Court in sukchim dinga thu an suo leia bomb (explosives) 3000 kgs chuong hmanga second 9 sûng chauha pilvuta a hei inchang vawng el kha chu nasa tak a nih.

TV news le social media haia Super Tech Twin Towers an sukchim lai video ka en a inthawka ka lungrila hung um chu, in le lo, khawvela ei châm sunga ei mamaw em em, mi tamtakin Pathien khawm hrefu lêk loa ei lungril po po, ei sum le pai, a thieng le thieng naw khawm dawn loa ei nei le ei ngaituona  le tha le zung po po senga ei buoipuihai hi mitkhap kâr loa pilvuta inchang thei vawng an lo nih ti hi a nih. Chu lai zing chun ka lungrilah Pathien thu, a chunga ei hungtârlang, in kuta bawl lo, kumkhuoa um zing ding, Pathien kuoma in nghet ei nei ti thu hi a hung inlang a.

Kuta bawl inhai hrim hrim chu a tîrin ieng angin mawiin thar sienkhawm, sawtnawteah a hung hlui a, a hung ṭiek a, a tawpah chêngna tlâk loin a la hung um tho tho. Chulai zing chun Pathien nauhai ei vangneina bêk bêk chu,  vânah in kuta bawl lo, hângthim le tuiêk, thlipui le tuilien, lirhnîng le kângmei bâkah khawlai Supreme Court le High Court rorelna khawmin a suksiet thei ve lo, kumkhuoa um zing ding Lalpa Pathienin a Naupa thisen zâra a thlâwn tawpa a mi lo buotsai pek hi a va hlu char char de aw! Thla tina maintenance fee, electric le tui fee chawi le  bank loan EMI thung ngai bawk lo, repair le chei ṭhat le bawl ṭhat hlak ngai bawk lo, a va hei  ṭha char char de aw!  

Khawvela ei châm sung hin, a ṭhen chu in le lo ṭha le ropui tak tak nei khawm um ei tih; a ṭhen ruok chu in le lo nei zo lo, mi in hluo fawma harsa taka um khawm um ei tih, amiruokchu ei hriet tlat ding chu hieng ei hmu le them thei, kuta bawl in po po hi mitkhap kâr chauha pilvuta inchang thei le, khawvel boral ruola boral ding vawng an nih. Chuleiin, ei lungril po po, ei sum le pai po po, ei tha le zung le ngaituona po po senga Lalpa hrefu lo raka buoipui tlâk an lo ni nawh. Chu nêk chun thildang po po nêkin vâna in kuta bawl lo, kum khuoa um zing ding Pathien kuoma in nghet ei nei hi a changtu le hluotu ni seng dingin Lalpa hi bêl mawl mawl lem ei tiu! Ei umna hnuoia in hi ṭiek sien khawm, vânah, in kuta bawl lo, kumkhuoa um zing ding, Pathien kuoma in nghet chu ei nei ti ei hriet sih a.

(Pune, September 9, 2022)