Kumthara Pathien Beiseina Tharin

By:- Rev. Laldinglien

Pathien beisei hang ti hin, a maa innghat ti dam, a ma ring ti dam hi a ni vawng a. Tulai khawvel a hin Pathien beiseia amaa innghat ngam ta lo hi ei tam in an lang ta. Pathien chau ringa ama beisei hi a huntawk tanaw anga ngaina hi mi tamtakin an nei pei tah niin an lang. Nisienlakhawm, Pathien hi a pangngai zinga, khahmaa mihaiin Pathien anlo beiseina le harsatna le beidawngna tamtak an tuok lai khawma Pathien an beiseina ah an lo hlawtling ang khan vawisun ni chen khawm hin Pathienah beisei ding a la um a nih ti hi ka hril nuom  chu a nih.

Beiseina hi mihriem hringnun keiṭhuoitu le nun innghatna a ni ti inla ei hrilsuol ka ring nawh. Ei nitin umdan, umzie inneitirtu le ei khawsakdan mi siempektu bulpui tak chu ei Beiseina hi a nih. Chu beiseina chu khawvela beiseina ei innghat chang dam, milien le ropuia beiseina ei innghat chang dam, Sorkar le tuhai amanih a ei innghat chang hai hin ei lo hlawsam nawk hlak a, chu taka chun, ei lung a awinawa, ei chier inhruoi in ei bei a dawng nawk hlak a nih. Nisienlakhawm, Pathien chu a ringum in a thutiema a ngirdet tlat a, a thaw ding chu a thaw el hlak a nih. Chuleiin, Pathien beisei rawh ti hi tulai khawvel ngirhmun harsa taka hin thupawimaw taka ngai thei a nih.

Mi thenkhat chun, suolna le harsatna ei tuok chang hin Pathien a inthawka hlataka um anga inngaia, Pathien khawm hang beisei ngam tanaw ang hiela inhrietna ei nei hlak. Amiruokchu, Pathien chu, harsatna tuok hai, misuolhai, ringtu ngirhmun se tahai, Pathien mithmua tlinga inngai talo hai ta dingin beiseina hi siem a ni lem a nih.

Hi kumthar  hi natna pum a chuongkai ṭawkṭawk a inngaihai, lungngaina le  beidawng puma chuongkai mêk khawm ei um el thei. Damnaw le natna khir tak tak hai tading khawm in Pathien hi beisei ding ala um a ni ti hre thar ei tiu. Insung harsatnain a thlabuok leia kumthar khawm beidawng taka chuongkai um mei ei tih. Nau thuawilo le khawmaw nei leia ṭap inrum a Pathien vawitam ko hnung khawma danglam loa inhriet leia beidawng um ei tih. Insung harsat leia Nauhai inchûkna ding beidawng luot leia Pathien khawm uksak hman lova invirsie el khawm um ei tih. Mani umna Kohran ei ditdân anga Kohran a fenaw leia beidawnga Kohran ram inhnikna nei tanaw khawm um ei tih, Khawvel suolna leia ei ram politic ṭhanaw in a mi thlakbuok leia hnam dam khawsuokna ding umnaw anga ngaia beidawng khawm um ei tih. Pathien laka thilsuol ei lo thaw ta leia, Pathien tieng beidawng a tlulut nuom ta lo khawm um ei tih. Natna inriktak tuor leia khumbeta uma khawvela beisei ding nei ta lova inngai khawm um ei tih. Khawvela i beisei po po thlawn in beidawng takin in rum maw…. Aw ka hringna ieng dinga I buoi zing am a na?  Unau! beisei ding ei la nei an nawm. Pathien beisei rawh,  a hmêla damna lei chun… Ama chu ei lân pâk ding a ni sih a… Beidawng le lungngai hai hnem hlaktu Pathien beltu hai chuh iengtik laikhawm Pathienin a nghatsan ngai nawh, a hmangainain a lo pawm zing hlak a nih. Ei damna Pathien, ei hlimna le lungawina Pathien, a beiseitu taphawt haiin an hmu hlak Pathien a nih. Chuleiin, ei khawvel harsataka a hin, mihriem haiin Pathien beiseina khawm ei nei ta naw mani aw ei ti rum rum châng a um hlak.  Khawvela hin iengkhawm beisei ding dang a um nawh,  Pathien chau hi tuta le chatuon chena ei beisei ding chu a nih. Chuleiin:

1-   Kumthar hi ei hratnaa chuongkai ei ni nawh ti hreng ei tiu: Nikum khan hripui le natna dang dang leiin mitamtak vuiliem in an um a, chuonglaichun, nang le kei ei ṭhang ve naw kha Pathien lunginsietna le a venghimna  ei chang lei a nih. Chuleiin, ei hringna hlutak khawvelah a mi la hla hi rawngbawl dinga Lalpa’n a mi la sie a ni ti hrethar ei tiu. Tukum hi ei nuom zawng le inhawk zawng thawna dinga pêk ei ni naw a, Pathien rawngbawlna hunṭha a ni ti hrethar in Lalpa tadingin ei thawthei ang tawk senga rawngbawlna inhmang thar ding ei nih.

2-   Kum bula inthawkin Indikna le ringumna in hun hmang ei tiu: Ei rama ei tlaksam em em pakhat chu ringumna hi a nih. Mi indiknaw chu a ringum ngainawa, felnaw taka thawtu chu mi ringum a ni ngai bawk nawh. Pathien laka ei ringum naw chun ei mihriem chanpui hai laka ei ringum thei nawh. Ringtuhai hi Pathien laka ringumtaka nun ei hmang hi a pawimaw em em a nih. Mani ninaa ringum, tangka suma ringum, nuhmei pasal a ringumna le Pathien laka ringumna vawng tlat ei tiu.

3-   Dawngtu nêkin petu ei ni ding a nih: Oswald Sander chun Kristien hringnun a dawngtu nêkin petu nun a hlim lem a lo ti a, Pathien in Abramham kuomah “nang malsawmna ni rawh” (Gen.12:2) a lo ti angin, hi kum thara hin midang tadinga malsawmna intlun kum hung ni mawl raw se. Chu chun, ringtu nun indiktak a hung parsuok ding a nih.

4-   Hnena puong kum ni raw se: Ringtu nun hi tisa le Thlarau indona khawvela um ei nih. Nitin nuna suol le ṭha indova, tisa I hnea um zing zing ringtu hai hin; Camp le Crusade hunah hnena chu Lalpa ta a ni tia ei khek ang hin, tukum chuh  (Lalpa zarin ) ‘ hnena chu ka ta a nih’ tia hnena thu puongin tisa nun hnena nunrama kum thar hi hmang ei tiu,

Hieng ang ei lo thawthei ngainaw leia beidawng el ding nilovin, Pathien in hunbi thar a mi pek a hin Pathien beiseina insangtak neiin tukum hi kumbul hang ṭan sau sau ei tiu, kumtluonin Lalpa pawlna le umpuina chang ngei ei tih.