Kum Chanve Sunga STP EAC Rawngbawlna Tlangpui

(Thuhriltu Vol.XLVII/No. 9&10/September & October, 2020)

By: Rev. Ruolneisang, PO

Kum dang hai naw ang takin ring phak baka Corona Virus (Covid-19) hripui inlengin mipui a mi suk chiai a, Biel le Unit hai a rawngbawl dan ding a year plan ei lo siem ta hai po po khawm hmang thei ta lovin ei um a. Suongtuona baka thil tlung a ni leiin Kohran sunga Department dang dang hai khawm rawngbawlna mumal tak nei thei an naw leiin pawi ei ti hle a. Amiruokchu hripui inleng leia Lockdown kara khawm Pathien in a kut hrata mi chelin a mi thuoi zinga lawm a um hle. Kohran sunga rawngbawlna Activities tam naw sienkhawm kum chenve sunga mi tlawmte hang tarlang ei tih

THE 79^th NSSU ANNUAL CONFERENCE STP, EAC : Tarik 10^th-12^nd, Jan.  2020 sung hin STP, EAC NSSU Annual Conference a vawi 79^th na Kawnpui a nei a ni a, mikhuol 376 vel fe khawm a ni a, rorelna ah resolution 14pass a ni bawk. Thu le hla inruolsiekna le Pathien thu a rawngbawlna khawm tluongtaka hmang a nih. Kumthar 2021 Conference Chairman dingin Upa. Lalremkhum le Secretary dingin Mr. Lalnisuok thlang an nih.

THE 106^th PRESBYTERY CONFERENCE STP,  EAC : Tarik 14^th -16^th  Feb. 2020 sung hin STP Presbytery Conference a vawi 106 na Tuolbung khuoa nei a nih a, Palai mi 75 fe khawm in Resolution 22 pass a nih. Hi huna hin Upa pahni, Mr. Lalbelthang S/o Zothansang Tuolbung, le  Mr. Isak. Remruotlien S/o Laldawmsang Hmarkhawpui hai Pastor J.Lalrolien kut hmangin Ordained an nih. Chun Pathienni suna seminer nei a nih a, Resource persons 1. Rev. Ruolneisang Hrangchal, PO – Topic Church Doctrine, 2. Pastor J. Lalrolien – Topic Kristien Leadership hai hi thupui a hmangin member hai in an hlawkpui hle thu hriet a nih. Chun kumthar 2021 a Presbytery Conference Chairman dingin Upa. Lalmanlien le Jr. Secretary dingin Mr. Lalrohluo hai thlang an ni a, Pathien thu le hla rawngbawlna hai a malsawmna tam tak dawng a nih.

NSSU TEACHER’S TRAINING : Tarik 23^rd Feb. 2020 hin Hmarkhawpui ah Unit 5 fekhawm in naupang Hotu Training nei a nih. Resource persons 1. Pro Pastor Zolalsang 2. Pro Pastor Joarthang Songate hai in Training an peka NSSU Hotu hai in nasa takin an hlawkpui a. Chun Tarik 27^th Feb. 2020 (Thursday) hin Parbung Sub. Hqtr. a Unit 3 fekhawm in NSSU Inchuktirtu Training nei sunzawm nawk a nih a, Hi training khawm hi naupang Hotu hai khawm in an hlawkpui hle. A tum thumna ding Damdiei Unit a nei nawk ding inbuotsai nisienkawm Lockdown leiin la sunzawm theilo hri a nih.

STP, EAC MISSIONARY BOARD: Tarik 24^tH Feb. 2020  (Monday) hin Hmarkhawpui ah STP Missionary Board huoihawtna in Thingrai bil (Project)  vat faina nei a nih. Mi tamtak fe khawm in hi huna hin ruoithe in hlim taka hun hmang a nih.

MOTHERS’ DAY –CU-M SEMINER : Tukum Mothers’ Day ah Parbung EAC, KNP hai chun Rev. Ruolneisang Hrangchal, Pastorate Officer chu Speaker a hmangin Pathienni chawhnung dar 1:00pm – 4:00pm sung seminer nei a nih a, Pasal hai laka nuhmei hai mawphurna, ti thupui a hmangin seminer nei a nih a, Pathien malsawmna dawngin hlimtak le lawm taka hun hmang a nih.

PHERZAWL UNIT: Pherzawl Unit hai khawm Pro Pastor Joarthang Songate in rawina hnuoia nasataka hma la in Pastor Quarter le Biekin hai khawm a tul ang peia siemtha in sin an thaw a, Sum le pai thawlawm thua khawm kum dang nekin nasatakin hma an sawna lawm a um tak zet. Hmatieng peia khawm Kohran hring tak le hrattak an ni pei ei beisei.

TUOLBUNG UNIT: Tuolbung EAC hai khawm in an Biekin bawl mek hmabak sunzawm in an buoipui mup mup zinga an zo vat ei beisei. Pathien rama an thahnem ngaina lawm a um tak zet.

KAWNPUI UNIT : Kawnpui EAC Unit hai khawm an Biekin hmatieng bawl zo lo a la um chu an sunzawm mup mup zinga sawt naw tea an zo fel vat ei beisei. Chun Lockdown sung remchanga hmangin intin ah Home Crusade an nei a,  Pathien zarin an hlawkpui hle.

TINSUONG UNIT : Tinsuong Unitkhawm nasatakin thang an lak thara,  Biekin bawl an sunzawm nawk mup mup zing ta a. A chung dang el thei dinga siem an taa, lawm a um em em. Pathienin thangpui a ta, tukum sung Biekin thara an inkhawm hman ngei ei beiseipui a nih.

Khi a chunga ei hang suklang hai baka Lockdown leia inkharkhipna hnuoia um ni inla khawm Unit tina thuoitu hai in a remchang dan ang peiin Kohran member  hai lai rawngbawlna nei a ni a. Unit then khata lem chu  Kohran member pungna khawm ei um tawla lawm a um hle. Hripui tibaiumtak  inghawng buoi vel hnuoia um inla khawm a tlangpui in Pathien ram sum thawlawm a khawm 2019 nekin tukum kum chenve chena khawm hmasawn in ei inhriet a,  kawng iengkima mi thuoitu ei Pathien kuomah ei lawm thu um sien, hmatieng peia khawm malsawmna le a mi thuoi pei ei beisei.