Kristien Sungkuo le Thilpek

(Thuhriltu Vol.XLVII/No. 9&10/September & October, 2020)

By: Rev. Lalngaizuol

Bible tiem ding (Exodus-35:21, Luka-6:38)

Kristien sungkuo tinin Pathien kuomah thilpek hi ei thaw seng a, Pathien suk lungawi tum ni awm taka pe dam, Pathiena lawmna leia pein mi then tamtak chu thilpek hi ei  thaw tha em em a. ‘Malsawmna dawng zing na ding anga ngai pe pawl khawm um mei ei tih. Kristien sungkuo indik tak ei ni chun Pathien mi hmangaina thuruk hi hrie zinga inchuktirna indik tak pek hi a pawimaw in a tul ta hle a nih.

Pathien rama sawmapakhat : Sawmapkhat pek hi thuthlunghlui hun lai daia an lo thaw a ni ta a. Biblea ei  hmu hmasatakna chu Abraham in thiempu Melkisedek kuomah a pek thu hi a nih, (Gen. 14:20). Chun, Jacob in Bethel a mang umzie neitak a nei zova Pathien kuomah sawmaphakhat pek an tiem thu ei hmu bawk, (Gen. 28:22).  Sinai tlanga Mosie dan pek a ni khan a hung in lang nawk a. Lalpa chan, Lalpa tadinga inthieng a ni, ti a nih (Lev. 27:30-32). Chuong ang chu a ni leiin Malaki huna lem khan chu a pe naw chu Pathien ta inruk tia hril a ni nge nge a nih, (Malaki-3:8). 

Sawmapakhat pek le hmang dan ding hi chi hran hran a um:- 1. Thiempu Levi chihai chanpuol ding (Num. 18:21-24), 2. Hmun inthienga fe a Pathien hmaa an fak ding (Deut.14:22-26), 3. Chanvo neilo Levi chi, ramdang mi, hmeithai le retheihai tadingin kumthum dan pei a pek ding, (Deut.14:28-29). Nehemia rawia sal in tang an suok hnunga an in siemthar nawk lai khawm khan sawmapakhat thaw thar nawk dinga mipui hai intiemna a khawm khan a thang a nih, (Neh. 10:37). Thil danga an tirdak um vieu lai khawm in sawmapakhat chu an ngai pawimaw hle thovin an lang, (Amos 4:4). Malaki chun an pek tha chun Pathien khawm in malsawm in a vur ding tiin an chuktir a, (Mal. 3:10). Lal Isu chun sawmapakhat  in pek ding a nih, tiin tlangtakin min chuktir naw sien lakhawm, petu chun Pathien malsawna a dawng let ding thu chiengtakin an  min chuktir a. Isu’n Lekhaziektu hai le pharisai hai a hal tum khan thlai chi te te chena sawmapakhat  pek an uluk  em em laiin felna, lunginsietna le ringumna an theinghill dei kha tha a ti naw thu a hril a. Chuong chu an thaw ding a ni thu a hril zing lai khan a dang hai khawm chu thaw thul  choung lovin a ti a ni kha (Mat. 23:23) (Luka 11:42). An lo thaw that em em sawmapakhat pek chu thaw thul chuong lovin a ti a, Pharisai hai khan hi  dan hi an lo zawm tha hle a, inchuktir  nawk an ngai naw niin an lang, (Luka 18:12). Thuthlungthara hin Sawmapakhat pek ding thu Direct taka inchuktirna um naw sienkhawm, Thuthlunghluia inthawka ringtuhaiin an thaw dinga Pathienin thu pek a ni leiin Thuthlungthar kohrana khawm sumzawmin a hung um pei a nih. A thaw tha deu le a thaw tha naw deu khawm ei um thei a, Biblea thaw dan thatak thuthlunghlui hun laia  inthawka an lo thaw hlak  a ni leiin kohran hai khawm in ei ngai pawimaw a ei inchuktir pei a nih. A pawimawna lientaka an langna chu Malaki in a lo hril a, Pathien in a mi haia laia rawngbawlna  chawl lova a um zing thei na dinga sawmapakhat khawm chawlsan lova pe dingin a phut a nih ti hi a nih (Malaki 3:10). Hi ang dungzui hin tulai kohrana rawngbawlna khawm tluongtaka a fe pei theina dinga pawimaw  le tul po po huom thei a tih.

Kristien sungkuo indiktak chun sawmaphakhat hi a ngai pawimawi em em hlak a. Pek dan ding  indiktaka pek tum in  sungkuo in malsawmna Lalpa a inthawka a dawng hai  suma in changtir  thei hai inchangtir in Sawmapakhat indiktak in an pek hlak a. Chu chun sungkuo  hlimna le   malsawnna khawm an dawng bik niin ei hriet thei. Nisienlakhawm, ei pek nasan ding tak chu beisei let nei lovin Pathien in a mi peknaa lawmna  neiin kohran hai Pathien rawngbawlna  tha taka a fe pui pei theina dingin mawphurna ka nei a nih, ti hrezing a pek hi ei thaw dan ding a ni lem a nih. A nina tak a chu iengkim ei ni in thiltha ei dawng le ei kawl po po hi Pathien a in thawka ei hmu vawng a ni a. Chuleiin, Pathien ram rawngbawlna ding le a ram lienna dingin sawmapakhat hi chu ei sie hran hi a pawimaw em em  a nih.