Krista Pasalṭha (Polycarp)

By:- Mr. James P. Inbuon

Ploycarp hi Smurna khuoa kohran Bishop sinthaw a ni. A.D. 70 vela pieng a nia. Hieng hun lai hin kristien hai chu nasataka sukduda-in an um a. An ringna inphatsan ding le laltak chu Pathien anga chawimawina pe dingin an vau rawp hlak. Chuongchun, mi ṭhenkhat chun an ringna an inphatsan a. Kristien hai chu sahuoi (sakawlh) le dam an insuol tira, an taksa chen an pawtthler pek a, meipuia raw hlum damin an um hlak.

Polycarp khawm chu Pathien thu hril ta lo dingin vawitam tak vau le khapna a tuok rawp hlak a. Man mihai chun Polycarp chu Tawlailirah (Chariot) an phura lampui intluon chun kristien a nina chu inphatsan ding le laltak chibai buk dingin nasatakin an thlem a, amiruokchu an ṭawng anga a um naw ding zie a hril a. A chungchang ngaituona ding hmun an tlung chun, Ama (Polycarp) chun rawl ri awm tak Van a inthawka hung in ri chu a hriet a, “Polycarp insukhuoi la ṭi der naw rawh” tiin. A kawla um ve hai khawm chun rawl ri chu an hriet ve a, sienkhawm tu hril am a na ti an hriet si nawh. Hieng ang hin an thlem nawk a,” i tar ta bawk sia, i kristienna chu inphat el la, kan insuo el ding che  a nih,” tiin. Polycarp ruok chun “Kum 86 sung  Krista rawng ka lo bawl ta a, ka ta dinga a ṭhat nawna iengkhawm ka hriet der nawh. Iengtinam ka Lalpa hming hril sie thei ka ta,” tiin a dawn a.

Roreltu chun, “ inphat san naw chun sahuoi (Sakawlh) kan se tir ding che, ti’n a vau a. Ka Lalpa chu kan phatsan thei nawh , “Thiltha lova inthawka thil ṭhaa kir chu a ṭha a, thilṭha a inthawka thil ṭhalova kir chu a thieng naw ie,” ti’n a dawn a. Sahuoi hai khawm chu I la ṭi chongnaw chun, meipui lai chun ka peilut ding che a nih, tiin roreltu chun a ti nawk a. Polycarp ruokchun, i nuom ang angin mi thaw rawh. Mei chun a kang a, rem hun a nei hlak. Pathien ringlo mi hai ta dingin chatuon hremhmun le meidil a um a nih. I nuom phawt chun meiah mi pei la ka huom vawng a nih a ta.

Chuphingleh roreltu chun Tlangsam chu a ko a, “Polycarp hi kristien a nina anphat nuom naw ti’n tlangansam tir tah a. Mipuiin an hang hriet chun,” Hi mipa hi kristien hai ṭhuoitu a na, kan pathien hai misuksietpektu le laltak biek le a kuomah thilpek inhlan hai chen a khap hlak a nih, tiin an lo hek tah a. A hringa meipuia raw hlum dingin roreltu chun thu a pek ta a.

Mi danghai an thaw ang bawkin. A kut le ke chu changtheilo dingin an khit de a. Polycarp chun, “Pathien in hratna le tuorselna mi peng a ta, meipui chawklai khawm chang ṭhaklovin min umtir thei tho a tih, Chuleiin ka umpangngai ang angin min umtir el ro,” a ti a. A kut chu a hnungtieng an khit kawp a. “Van tieng a ngha a, a ṭawngṭai a-“Aw Lalpa iengkim thawthei, hi niropui chen tlung thei dinga mal I mi sawm leiin lawmthu ka hril che. Krista hming leia tuor tlaka i mi ruot leiin lawmthu ka hril che. I hming ropui hi chawimawiin um raw se,” tiin. A ṭawngṭai zovin meipui chu nasatakin an suk chawk zur zur a, Polycarp ruok chu  meichawk lai chun ngir zing angin an hmu a. Meipui in a kang hlum thei ding khawma an ring naw hiel a. Chemte chun a taksa chu an sun pek ta zawt zawta, thisen tamtak a suok a. A ruong chu ringlo mi hai an raw angin meiah an raw hmang ta a, a ruhai chu kristienhai chun an rut khawm tah a. Polycarp chu AD. 156 February 23, in martarin a thi tah a nih.