Krista-a Zung Kei (Kolosa 2:6-8)

EDITORIAL (Thuhriltu Vol.XLIX/No.04/April/2021)

Introduction: Kolosa 2:6-8 sung hi, ringtu hai inchuktirna indiklo le khawvel thil hai len hmanga an um nawna dinga tirko Paula’n an fuina a ni a. Chu ding chun a tira Krista asn pawm ang khan Amaah an um zing ding a nih. Hi taka Amaa um zing ti hi sap tawng tieng chun Walk in Him ti le, Live in Him ti dam a nia, A umzie tak chu Krista an pawm ang khan Amaah um zingin an hringnun an hmang zing ding a tina a nih.

Chuonga Kristaa nghet taka an um zing theina ding chun thil pahni an thaw ding a hril a, chuong hai chu Krista a zungkei inthuk le Krista a inrem sang deu deu hai hi an nih. Tekhina pakhata thingkung  hmang a ni a, ei thupui tak chu a pakhatna Krista a zungkei inthuk ti hi a nihs

A.   Krista a zungkei umzie : ‘Kristaa zungkei’ ti hin tirko Paula in ringtu hai Kristaa nghet taka an ngir theina ding thu an chuktirnaa thingkung tekhinaa  a hmang a nih. Thingkung chu thli hrangin mut kurin sawi hning hlak sienkhawm, hnuoi ril tieng zung a kei inthuk phawt chun nghet takin a ngir zing hlak a nih. Tlang chunga thingkung le phaizawla thingkung in ang nawna chu tlang chunga thingkung chu thlipui le ruopuiin a nuoi rawp hlak leiin a nghetna dingin zung a lak inthuk hlak a. Phaizawla thingkung ruok chu thlipui khawma a mut fuk kher kher ngainaw leiin zung khawm a lak inthuk ngai bek naw a, chuong ang thing hai chu nghet khawm an nghet naw bik deu hlak bawk a nih.

B.   Krista a zung keina ding san :

A Pakhat na ah              :  Kristaa pieng ei ni leiin Amaa zung keia inthanglien ding ei nih.

A pahnina ah                 :  Harsatna le thlemna ei tuok chang khawma ei ngir nghet zing theina dingin

A pathumna ah              :  Inchuktirna indiklo le ngaidan indiklo hai ei hriettheina ding le chuong thil hai sukhninga ei um nawna dingin

C.   Krista a zungkei dan ding : Krista a zung nghet taka ei keina ding chun   hieng hai hi hriet ding a nih.

A pakhat na ah, Kristaa ei nina ei chieng zet a ngai . Krista le ei inzawm dan  chieng zet naw chun zung kei nghet thei an nawh. Thenkhat sandamna chiengkuonglo dam sandamna in ringhlel hlak dam an um.  Kristaa an nina hrechieng lo an nih. Sandam thu a ruok chu sandam chu ni ta si, amiruokchu Krista mi sandam dan fumfe taka la belchieng lo hai hi an in ringhlel rawp hlak. Chun sandam in ringhlel hi la damnaw lei khawm a ni thei bawk. Iengpo khawm nisien, Kristaa zung ei kei inthukna ding chun Kristaa ei nina hriet chiengkuong a ngai a nih.

A pahnina a chun Krista hi iengkim neka thlang lem a ngai. Ieng ang thil khawm ei hmaa hung intlar sien, Krista naw chu ei ti thei zing a ngai.

A pathum na ah, thlaraua hmathlirlawk thiem a ngai.  Mi puitling ram suok chun a hnung a hma a en kuol a thil umdan a hriet hlak. Ringtu thlaraua ngawng hai chun an hnung an hma a thil umdan an hriet naw a,an inring hma in suola an tlu rawp a, Kristaa zung kei dan an thiem ngai nawh.

A palinaa chun tuorsel a ngai. Phairuom a thing nekin tlangsipa thingin zung a kei inthuk lem hlak. A san chu thlipui nuoi vela a um rawp hlak leiin zung a kei inthuk deu deu hlak a, chu chun a suknghet zuol hlak a nih. Abraham ringnaa    a hratna san chu Pathien in a fie hlak leiin a nih. Harsatna le rinumna hai hi tuorselna mi siem pek hlaktu an nih. (Jacob 1:12)

A pangana ah,  Thingkung chu lang thei rama nghet taka a ngir theina dingin lang theilo rama hnuoiril inthuk taka zung a kei angin ei ni ringtu hai khawm langthei rama  nghet taka Krista a  ei um theina ding chun lang thei lo ram sung tienga  Krista le inpawlna nun tha tak ei nei hi a pawimaw hle a nih.