Krismas Lungril Thar Leh!

By:- Mr. James P. Inbuon, Rengkai

Naupa hausatak hin an nâupasal neisun kumkhat chuong met chau Birthday lâwm dingin nasatakin an inbuotsai a. Ruolṭha tamtak an fiel a. Birthday lâwmnaa fâk ding chihran hran an lâkkhâwm a. Chuong chun, a Birthday chu a hung tlung chun an mi fielhai chu an hung khâwm a. Birthday lâwmna  thilpêk hlutak tak tamtak hung châwikhâwmin pindan a chun an siekhâwm hnur a. Birthday lâwmnaa fâk ding chi dang dang hai fa in, a ṭhenin zu le sa hai an chên a, music hai sutin an inri tung tung a. Birthday Cake at a hung hun chun a birthday neitupa chu an hang zawnga an hmu zo ta der dâl a. Beidawng takin an zawng vel ruoi a. Chuongchun, an bei a dawng ta em lei chun an Music play chu an sukchâwl, music ri a hang rê chun pindan kil khat lai chun naupang in ik ṭawt ṭawt ri an hriet ta a. An hlim luota an châng velnaa chun Present an châwi hai chun naute chu an lo indel tir hi a na. Chuonga an hang keidawk chun birthday neitutak nâute chu châu neng el hin a hung ṭap suok a. Minute tlâwmte la hang fe sien chu thi el thei ding khawp hin a lo châu hman a. Hlimtaka Birthday lâwm an tum chu lungzîngna in an khâr ta a nih.

Tulaia krismas mi tamtakin krismas ei hmang dan hai hi ngaituo chun a chunga hai hi angna ei nei hiel el ta naw maw? Hlim taluo luotin a birthday neitupa hi theinghil a awl âwm khawp el. Ziektu pakhatin Fak le dawn, le inthuom mâwina ding ngaituo in ei buoi a, ṭhalai tamtak chun urlâwk zana arsa zêu, bei le fak ding inhnik hnik faa inpâwl hlimna remchang ei nei naw chun Christmas hi kim lo rieua hrietna ei nei deu tlat tah. Hun pui a ni leiin nu le pa hai khawmin nâuhai ei inthla zalên nuom a, khawvel sandamtu krista hung pieng ni champha hi suolna lam hrawna dinga zalen hunin ei hmang ta khawm nisien a hawi. Krisma hun hi a ṭhenkhat ta dinga inruina le suol chi hran hran thawna remchâng an chang a, ‘Zan thieng re, zan thienghlim’ (Silent Night, Holy Night) ti chu ‘Zan risie, zan pawrche ‘(Noisy Night, Dirty Night)–a inchangtirtu iengzam ei um ding maw?  tia a ziek hin lungril a tâwk khawp el.    

Krismas ruoi khawptaka fa si, sungril thlarâu a phingṭam, lungril kawruok le dang châr leia nun kawruok hrukbitna ding zawnga zu le inrui thei bêltu ni lem rawi ei tih ti inlâu a um hle. Beraw leh Murra rim inhnik kha zu le inruithei thil dang rima thlâk a, mani ṭhatna ding le midang hai ta dinga malsâwmna ni nêka mani ta ding khawma ṭha lo, sungkuo le khawtlang mipui chim zâwng taka Krismas hmangtu ni pal inlâu a um bawk. Mi dang ta dinga malsâwmna ni tuma theitawp suotu khawm tamtak ei um ti ruokchu inphat ruol a ni naw a. Amiruokchu, a nâwlpuia Krismas ei hmang dan hin Krismas ei hmang nasan a ṭhel deu ta nawm a nih, ti ding tamtak a um tah.

Kumkhat sunga Kristien haiin hunpui bîka ei nei a ni leiin a ropui thei ang tawpa hmang ei nuom le tum hi thil âwm hrim a nih. A thei phawt chun sungkuo kima hmang hram hram ei tum seng hlak bawk. Krismas hi a hlu em leiin ursûntak le ropuitaka hmang a phu hlie hlie hrim bawk. Thuom le puon thar le mâwitak taka inthuoma hmang ei tum tlangpui a. Hun danga ngâisak raknaw hai khawmin Krismas vuokvêl lai bêk hin chu mani In kâwl vel (Compound) In sung hai sukfâia cheimâwi dan ding ngaituo hun a ni tlângpui bawk a. Biekin khawm a mâwi thei patâwpa chei chu ei nuom dân ni bawk a. A lâwmnaa ruoi ei ṭhe khawm hun dang neka special le inhnik, hun danga fâk nêka tlaia fâk ei nuom seng hlak. Krismas ruoiṭhenaa sungkuo le kohran member ṭhangkim theinaw chun inbâk deua inhrietna a um a, sungkuo ṭhangkim thei lo hai chun kim naw rieua ei hrietna ei nei hlak. Chuleiin, Krismas ruoi hung kîl theilo hai chu Ina an lo chang ve ding tiin ei sem ṭâwk ṭâwk hlak a nih. Hlapâwl hun dang nêka mâwi le ropuia ngâithlâk dingin ei intûng a. Krismas na nâ na hi chu ropuitak, hlimtak le inhawitaka hmang ei nuom leiin nasakin ei in singsa hlak.

A ṭha! khawvel sandam dinga Van Lal Nâu, Pathien meu insukhnuoia eini misuolhai sandamna dinga eini ang mi hung nîpui a, ei lungngâina, ei natna, suol leia ṭawngsie ei phur hai mi hung tuor pui a, chutaka inthawka mi sansuok dinga a hung ni a ni leiin ropuitaka lâwm a phu hrim a nih. Amiruokchu, a bul ṭannaa Birthday lâwmhai an intung nasa taluo a, present an dawng râwn taluo le an hlim taluo leia a Birthday neitu, nâute hrefu lova an Birthday Present in a Birthday neitu a del hlum ṭep ang elin Isu Krista piengchampha ei lâwm huna hin a Isu ta dinga ningip um taluo hin hmang pal râwi ei tih, ti inlâu a um hle a nih.

In sung sukfâia ei chei mâwi zing lai hin, ei lungril hai hi Krista chêngna tlâk ni dingin inbuotsai inla, ei taksa hai khawm suol rawngbâwlna hmangruo ni lo a, felna hriemhreia hmang thei dingin Lalpa kuomah inhlân thar inla. Krismas ruoi khawp le tlaitaka fa zing siin, thlarâu ruoi khawp le tlai taka kil dingin lungril Lalpa tieng hawngin Krismas hmang inla chu ei va nihlâw awm de aw!

Lalpa Isu hi khawvela a hung khan mani insukropui le lal anga um dinga hung a ni naw a. Midang hai ta dinga malsâwmna ni dingin, rawngbâwl pêka um loa mi hai rawngbâwltu ni dinga hung a ni a. A piengcham ei lâwma Krismas ei hmang huna hin, a piengcham ei lâwmpa thiltum hi hrezingin hmang inla. I pocket money ding kha midang ta dingin hang hmang ve sin la; annawleh, carol program a hin a dâwl khâwm zaṭâwng ni lovin a semdar zâwng damin hang hmang sin hrim hrim inla. Chu chu, danglamtaka Krismas hmangna lampui pakhat hung ni ngêi a tih. Thilpêka hin chîn taluo a um thei ngâi nawh, hmangainaa thilpêk chu a hlu hrim hrim hlak.

Krismas hun tluka piengtharna hun tha hi a um nawh, tiin thuhriltu pakhat chu a ti hiel a nih. Piengthar hi mi tam tak chun thil harsa deu dingah ngaina a lien hle. Amiruokchu chu, piengtharna le nun insiemnana ding hin antak taluo a um nawh. Tuta Krismas i hmang mêk hi i ta dinga hun ṭha tawpna ni naw nih ti thei a ni si naw a. Chuleiin, kum thara kohhranin camping a buotsai amanih le Crusade a buotsai kher kher nghak tum naw la. Kristmas Lal thar pieng champha i hmang mêka hin lungril thar, nunthar neiin piengthar seng inla. Taksa inhâwk zâwng dâm, fâk le dâwn, thuom le puon le a hlimhlap zawnga Krismas hmang dinga lungril i lo siem a ni chun, chu lungril le nuom dân chu inthla ngam bawk in la.  Lal le sandamtu a ni angin I lungrilah Isu lalna inchangtir la, Ama chu a ropuitak le pawimawtak in nitir la. chu tluka Krismas ṭha, hlâwtling le inchik tlâk chu nang le keia ta ding hin um naw nih. Lungril a kuom tieng hawng inla, rothil dang a ngâi ta nawh.