Krismas Inbuotsaina

By:- Rev. Lalkhamlien

Kumtina Krismas hmang dân hi ei rama kohran hmasa haiin an lo hmang dân bâk kha ei la khêl thei meu naw a. Amiruokchu, ruoi ṭhea nasataka an lo hmang nasan ruok chun hrietfûk a hlaw mang ta naw am a ni aw! ti dingin an lang. Mi hmasa haiin an lo hrietfûk bek lo, Advance Krismas (Krismas lo hmang lâwk) chu ei hung chîng thar deu deu pei a. Krismas ei hmang dân hai ruok hi chu Krismas thu fepui leh hin an mil chie am ti hi ngâituo chieng dingin a ṭha khawp el.

Hmun ṭhenkhata chun Krismas inbuotsaina hi October, November thlaa inthawk hin hmuthei dingin a um a. Vairam ei ti, eini ram India a khawm hin khawpuia kohran ṭhenkhat hai chu a thla têl an inbuotsai a. Eini lâi Krismas rim khawm a lan nam nawh, ei ti lâi hin ‘Vâiram’ ei ti, Hindu tamna rama chun kawtthlêra a hai Krismas tûnglâwkna hmuthei tamtak a lo um ta hlak. Eini’n Urlâwkni ei ti hi rawngbâwlnaa fesuok niin an hmang ve thung a. Sûnah khawpui kawtthlêr le bazâr hai fangin Bible le Gospel Tract hai mi invak vêl hai kuoma le dâwr a hai an sem a, zânah carol neiin Pathien Hlâ leh khawlâi an fang a, Pathien Thu hrilna hunin an hmang hlak. Ramthara ei Missionary hai le kohran nâupangte tea ei ngai hai khawmin Krismas ni hin an kâwl le vêla ringnâwtu hai fielin an nei ang ang sêngin Ruoi an kîlpui a, Chanchinṭha hrilna hun remchângin an hmang hlak. Eini laia Advance Krismas ei hmang le Krismas ei hmang hai hi mani huongsûnga inpâwl hlimna a ni tlângpui a hawi a. Midang ei ngâituosa mang naw am a ni aw! ti âwm tak a nih. Urlâwkni hin ei inbuotsai chau nisien a ang a deu. Sin inzozâp naw luot luot leia Krismaa sunga sin thaw ai hû thaw tuma inhâwmthaw luot lei le, Krismas bazara hun hi sum lâklût hun remchangtak a ni leia Urlâwk zâna inkhawm hman lo khawp hiela ṭhahnemngai pal awltak a ni thei bawk. Rev. Dr. H.M. Songte in, Mitin ta ding chanchin ṭha,’ hi kum 100 chuong tawp ‘mani ta ding chauin’ inthiemnawna nei chuong lovin ei la hmang zing chu a na! tia  a ziek lo tiemta hai chun âwm ei ti seng ka ring.

December 25 chu kâr lovin hung tlung nâwk dingin hang beisei phawt inla. Chulaia chun kumtina ei Krismas hmang dân pângngâi ang lo deuin, mitin ei huom phak êm naw a ni khawmin ei huom chin hi suklien inla. Krismas ei hmang hi midang hai ta dinga malsâwmna a ni ve theina ding thlirlâwkin lo intûng inla nuom a um hle el. Social Media a mi ṭhenkhat in fiemthu  deua an hung hril; Hindu haiin Puja an hmang chun thil zawrna kawngah Puja Offer tiin thil man an suk hnuoi a, eini Krismas ruok hi chu Thuohnaw man suksângna le sum laklût tamna dinga remchângin ei hmang, an ti hi a tak tak ni naw hrâm sien nuom a um khawp el. Kum khat laia Aizawla sungkaw khawsatheitak pakhata pâtakin  Krismas Urlâwk bazar a fenaa testimony a hril, Krismas huna IN cheina ding inchaw dingin Bazarah ke fe a, IN cheina ding chi hran hran ka enkuol lâiin nufa thuomhnaw ṭawp birberin an hung intlawn a, a nauin a nu kuomah, nu hi hi ka dit ie! tiin a hril a. A nu chun, bâwi hieng ang inchâwkna ding khawp sum ei neinaw a nih, a ti a, naupang mitthli parawl kienga um chun ka lungril a tâwk em em a. Nang chun silfên tlasam lovin Krismas huna IN cheina ding i ngâituo a. Hienghai nufa ruok hi chu Krismas laia intuomlum vena ding thuomhnaw thar tak ngiel khawm an inchâwk theinaw a na, ti a hung inlang a. Chu phing chun IN cheina ding inchâwkna dinga ka pawisa pâi hai chu ka phawr a, ka pêk ṭhen ta a, IN ah kan lâwia ka sûng hai ka hril chun anni khawma ṭha an mi tipui leiin keini nêka rethei lem nia ka hriet hai kuoma chun ka sem ta lem a. Chutaka inthawk chun kumtin Krismas IN cheina dinga kan sêng ang hu chu rethei hai ṭhangpuina thilpêka dinga hmang pei ta dingin kan sungkuo chu kan in sukthlûk ta a nih, tiin a hril a. Entawn thei hai ta ding chun entawn tlâk tak a nih.

Krismas hi abîkin kumkhat sûnga Ni ei ngai ursûntak a ni a. Ei nei ang ang sênga ruoi le ropuitaka lâwm chu a phu hlie hlie ngêi. Tienlai deu haia lem khan chu kum tluona sin thaw a, thuom le puon khawm Krismas huna a thar nei dinga ei nghâk ṭâng ṭâng hun khawm a lo um a. Ei inbuotsai dân le ei hmang dân hai hi sawisêl a, a ṭhanaw pumhlum  ti thei khawm chu ni chuong kher naw nih. Nâute pieng lâwmna ei châwikhâwm hai dâm, Biekin cheimâwinaa ei seng hai le, ṭûl bêk loa ei sêng tamtak hai hi Chanchinṭha hrilna dingin annawleh, ei hmu phâk zing, ei khuo le vênga mi ṭhangpui ngâi ngâwi ngâwi haiin Krismas an lo sawr vêna ding lampui hai dam dap suok thar inla. Mitin ta dinga Krista hung piengni champha ei lawm hi mani kohran, sungkuo chaua sawr lovin midang tlung phak ve sien, Krismas ei hmang hi “Mitin ta ding chanchinṭha, mi tamtak huom” Krismas ni ngêi dingin inbuotsai inla nuom a um hle.