Kohran (Sam. 87:3; 100:2; Matt. 6:18)

By:- Rev. Zakapṭhuom

“Hi lungpui chunga hin ka Kohran rem ka ta, mithi khuo kul kawtkharhai chun chu chu ngam naw ni hai”

Kohran chu Pathien-in a ditzawnga um dinga a Naupa hmanga a ko umkhâwm hai hrilna a nih. Kohran mi ni ding chun a kotu hrietchieng dâm, a ditzawng hriet le mani inpêk ngamna dâm a ngai.

Kohran chu suola inthawka Pathien-in a ko suok, Lal Isu thisena an châwk, Thlarâu thienghlimin rawngbâwl dinga a ser hran tina  a nih. Khawvêl tuipui lientaka khawmuol a hung inlanga chu chu thlierkar a nih. Chuongang bawkin khawvêl suol tuipuia Pathien ram a hung inlanga chu chu ‘KOHRAN’ ti a nih. A sunga Pathien-in a chengna dingin khawpui an din a. Chuleiin Kohran hi Pathien khawpui tia hril  a nih. (Sam 87:3)

Kohran chu hnuoia um sienkhawm hnuoi ta an naw. Chungtieng ta a nih. Mit-in hmuthei inla khawm hmu theinaw le inzawm tlat a nih. A sunga chun an suol ngâidama um hai an um a, mi thienghlim hai inpâwlkhâwm tia inbûk nisienkhawm mania thienghlim le fel nia inhrehai an inleng ve nawh. Lal Isu thisena sâwpfâihai le a felna puona a tuomhai umkhawm an ni. “Ama chun Sandamna silfênhai a min bel a, felna zakawfuolin a mi tuom ta si a.” Isai 61:10.

Kohran Sin:      Kohran hai hi mani insukhlim ding ringawta indin an naw a, Setan a lalram ṭhieka Lal Isu lunginsietna ram indin ding dâm, a rawngbâwlna sin chu ei thaw pei theina dingin ei hriet ding ṭul tlawmte hei tarlang ei ti:

1. Nina hrietchieng: Rawngbâwltu, ringtu chun ama le a sin a hriet chieng ding  a nih. Rawngbâwltu (Minister) ti hi Siehlaw tina a ni an ti a, chuong a ni chun Kohranhai hi siehlaw ei ni tina a ni chu; Entirna: Siehlaw hin a nina theinghilin Officer amani insawn sien, a sinthaw ding chu siehlaw sin a ni bawk si, a sinthawnaa iengtika khawm lungâwi takin thaw ngâi nâwng a ta, lâwmtak le taima takin thaw ngâi bawk nâwng a ti. Sam 100: 2 ei tiem chun Kohranhai ei rawngbâwl dan ding a mi hril a. Iengtinam? “Lâwm pumin Lalpa rawng bâwl unla, Hlasak pumin a hmaah hung ro” ei Pathein thu’n a mi hril anga lâwm puma Lalpa rawng ei bâwl pei theina dingin Siehlaw ei ni hi theinghil ngaâ nâwng ei tiu. Chun Siehlaw chu thil insemnaa a chan sie tak a chang hlak. Ringtuhai hi khawvêla ei um sung hin chan siet châng um sienkhawm ei nina ei hriet chieng phawt chun lungâwi takin um thei ei ta (Philippi 4:11). Chubaka chan ṭhat lem inchûna leia buoi zing zing dâm hi a zie um ngêi a ti. Chun, Siehlaw chun Pu a nei a, a pu thu thuin a um hlak angin Kohranhai hin Hotu ei nei a, ei hotu (Isu) thu thu a um ding ei lo ni zing a nih.

2.   Mani nêkin sin a pawimaw lem: Ringtuhai hi Kohran puotienga ei sin nêkin Kohrana ei rawngbêwlna hi a pawimâw lem a, mi’n an min khina khawm chutaka chun a ni rawp hlak. “Chu sinthaw chu a ni si a” ti nekin “Rawngbawltu a ni si a” ti a ni hlak. Chuleiin, mani nêkin Kohrana ei sin hi a pawimâw lem a ni ti hi hre hlak ei tiu. Ei thaw ding le hril ding ei hril hmâ in, ei nina hi ngaituo hmasa hlak inla chu thaw suol le hril suol hi tlawm deu ngêi a ta; Lal Isu lalram indin râwn lem bawk ei ti.

Rawngbawln asin nekin Lal Isu:-  Rawngbâwltu chun ama le a sin nêkin a ruoitu Lal Isu a ngâipawimaw lem ding a nih. Isu’n Kohranhai enkawl dinga Peter a ko khan, Ieng tefung am a hmang a? Lekha thiem, mi var, mi fel a ni ding a ni ti ni lovin, “hienghai nek hin nangin Kei i mi hmangai lem am?” a ti el a nih. Chuleiin, “Lalpa ka ngâina che” ti tu kuoma, “Ka beramhai enkawl rawh” a ti a ni kha. Rawngbâwltu lungrila lientak ding chu Ama le a sin nêkin Isu a ni ding  a nih. Martha khawm kha rawngbâwl ngawtin a buoi leiin, Isu thu a ngâithlâk hman naw a ni kha. Isu thu ngâithla hman lovin buoi pal ei ti inlâu a um ngei! Isu thu ngâithla hman lova thil dang buoipui tuhai hringnun chu, Martha ang hin kohran sunga ngêi khawm hin chierna ding an hmu râwn hlak. Kohrana chier chier hai hi Isu thu ngâithla hman lo an lo ni hlak. Mari ruokchun thil dang buoipui lovin Isu thu a ngâithlâk hman a, chan ṭha a chang a ni kha. Kohranhai hin chanṭha, lungâwina, thlamuongna le hrietthiemna ei nei pei theina dingin Lal Isu thu hi ngâithla hman hlak ei tiu aw. Chuongangtaka ei um chun, “Aw Pathien khawpui, I chungchâng thu ropuitakin an hril hlak a nih”,  ti hi Sukdik ngei ei tih. Lalpan a thu mal sâwm raw sen.