Kohran Chanchin

# Worker’s Couple Camp nei a nih: Tarik 24-27 November 2021 sung khan Tripura Field a rawngbawltuhai Nupa Camp hlawtling takin Mualhui a nei a nih. Hi hunah hin Rev. Zawllienmawi EAL in rawngbawlna a nei a, Camp a hin rawngbawltu 11 an ṭhang a nih. Rawngbawltu haiin Pathien a insukhratna le in siemtharna ropui tak an nei a lawm a um tak zet a nih.

# Rev. Laldinglien, Director, M&E khuolzin: West Bengal Mission Field zaulienna ding le Station hai kan in Tarik 23, Nov.-03-Dec 2021 sung khan  ei hotu Rev. Laldinglien chu West Bengal tieng an zin a. An zin hunah hin rawngbawlna suklienna ding Sundharbon, West Bengal hai a zu sir a, hi huna hin Rev. KC. Thomas in a lo inthlawppuia, Diamond Harbour Area le thlirkar G Plot haia rawngbawlna ding hmunhai an zu enfel a nih. An hung kir tieng Siliguri le Nepal Bordar laia rawngbawlna hmun hran hran khuo 14 lai hung sirin rawngbawlna a hung nei a. Kohran hai inpekna le ṭawngṭaina hai zarin Missionary hai rawngbawlna a hring em em a, ringthar belsa in an um zinga  Thlarau bohmang tamtak sansuok in an um  a nih. Chuong lai chun rawngbawlna ding tamtak a um a, rawngbawltu ding khawm mamaw sa pei a ni bawk leiin Kohran hai in theitawp in ṭawngṭaipui zing ei tiu.

#   KNP le Ṭhalai  Conference an nei: Simthlang Pastorate chun Tarik 26-28 Nov. 2021 sung khan Parbung Unit a KNP Annual Conference vawi 73na  hlawtling takin an hmang. Chun, Tarik 2-5 December 2021 sung khan Kawnpui a KṬP Annual Conference vawi 59na an hmanga, hi huna hin Ṭhalai hai insukhlimna (Sport) neiin  taksa le thlaraua inpawl hlimna ṭhatak an nei thei a lawm a um tak zet. KṬP Conference hi Mr. Lalbuotsai Sanate YCO in a hmangpuia, Conference hmang zoin Simthlang biel sung Unit ṭhenkhat khat hai sirin rawngbawlna a hung nei pei bawk a nih.

#   Inter Departmental Conference an nei: Hripui leia mipui tamtak fekhawm remchangnawna leiin Hmarthlang Pastorate chun Department dang dang hai a hrana rorel inkhawm nei lovin a ruolin Interdepartmental Conference hi Hmarkhawlien-ah Tarik 26-28 Nov. 2021 sung khan an nei a nih. Hi huna hin KṬP, KNP le NSSU palai hai fekhawm Department tin hai  rorelna tluong takin an nei a nih.

#  Rev. Dr. Lalrosiem Songate hai nupa inzin: Tarik 1-5, December 2021 sung khan Rev. Dr. Lalrosiem Songate , Principal ECT le Assembly moderator ni bawk chu an nu leh Nepal-ah an inzin a. Hi an inzin huna hin Bardhan E C Church le Namuna EC Church  hai Biekin pahni hawngna a nei a. Chun, Evangelical Leadership Training Center a inthawk  Kohran ṭhuoitu Leadership Training zo mi 24 hai Graduation Service a thuhrilna hun pawimaw tak a nei bawk a nih. Nepal E C Church hi Rev. T Janga rawngbawlna hring leia Kohran hung puitling pei an nia, hieng hun pawimaw tak tak a rawngbawlna neia fe hotu hai nupa khawm damtakin In an tlung nawk ta.

#   Ebenezar Camp hlawtling taka nei a nih: Tarik 1-9 December sung khan Hmarkhawlien EAC Biekin a EBENEZAR CAMP sawng hni zet nei a ni a, hi hunah hin EAC Evangelistic Team haiin rawngbawlna an neia, Speaker in Rev. Zawllienmawi, EAL hmang a nih. Camp sung hin mi 100 lai an luta an rengin Pathien malsawmna dawngin, Kohran hai Pathien Thlarau kan tharna changin hlim takin  Pathien pawlna ropui tak an chang a nih. Hieng ang bawk hin 9-16 chen Diger Compound a khawm  Ebenezar Camp hi hmang nawk a ni a, Hi Camp hi nuhmei le pasal ṭhe in sawng hni bawka nei a nih. Camp a lut haiin Pathien malsawmna ropuitak dawngin mi tamtakin Thlaraua siemtharna an chang leiin Camp hi hlawtling taka nei a nih.

#   Rev. Lalkhamlien Executive Director khuol inzin: Tarik 3-16, December 2021 sung khan ei hotu Rev. Lalkhamlien hai nupa chun Vangai Pastorate le Simthlang Pastorate a Kohran hai kan in an inzina, Unit tamtak hung sirin rawngbawlna hringtak el an hung nei a, Hotu hai inzin hin Kohran haiin Malsawmna tamtak an dawnga an ni khawm damtakin Office an tlung nawk ta.

#   Tripura Mission Field-ah rawngbawlna zaulien in a um: Tripura Mission Field rawngbawlna Pathien in a mi ṭhuoipeia, rawngbawlna khawm hma hung sawnpeiin khuo sawmpali lai zet a rawngbawlna nei a ni taa, Pathien in rawngbawltuhai nasatakin a hmanga rawngbawlna hmun khawm zaulienin a um pei thei hi lawm a um tak zet a nih. Rajgandi, Jurisora, Modurbon le hmun dang dang hai, a bik takin unau Debburma hnam hai lai rawngbawlna hi zaulien pei dinga hmalak a ni bawk a nih.

#   West Bengal Mission Field ringtu an pung pei: West Bengal Mission Field-ah rawngbawlna hring takin an ṭhanglienpeia, tuhin khuo 14 a ringthar neiin Kohran a pieng mek ta a, kumthum lai chau rawngbawlna hi nei la  nisienkhawm, ringhar belsain an umpei leiin lawm a um takzet a. Revival Meeting hlawtling taka neiin ringtharhai  Pathien thu le hla ah in ṭhanglienin Thlarau pawltharna an chang pei bawk a nih.