Kohran Chanchin (Thuhriltu Vol. XLVII/No.7&8/July & August,2020)

1. Online Crusade hlawtling taka hmang: Ei khawvel hripui (Covid-19) leia Lockdown leiin rawngbawlna nuom angin a fe hrat thei nawh a, rawngbawlna chawl thei a ni si naw leiin remchang zawng in April thla sung khan  Online Crusade nei a nia, Rev. Zawllienmawi EAL Speaker a thangin Evangelistic Team member hai in Counselling a tul ang peia nei in rawngbawlna  nei a nih. Hrietthei chin a mi 80 chuong zet el Lockdown sungin Counselling neipuiin malsawmna an dawng thu ei hriet a lawm a um tak zet. Lockdown leia Biekin inkhawm ei nei theinaw leiin vawisun chen hin EAC Online Ministry hmalakna in Online Service hai nei zing a nih a. Mi tamtakin an hlawkpui in Malsawmna an dawng thar pei a nih.

 2.  Counsellor Training nei: Tarik 1-3 May 2020 sung khan Rengkai NSSU Hall ah EAC Evangelistic Team Counsellor Training hlawtling taka hmang a nih. Hi hun a hin Rev. Dr. Lalhmuoklien,                    Rev. Lalkhamlien le Rev. Lalngaizuol hai in nitin Devotion an hmangpuia. Rev. Zawllienmawi le Rev. Zakapthuom hai Resource person a thangin Trainingna hi hlawtling taka nei a nih.

 3.  Baptisma chang: Lockdown leia nuom ang taka rawngbawlna theinaw sienkhawm ei Missionary hai in an umna Unit hai a theitawp a thang la zingin rawng an bawl a, Manipur Mission Field a mi pahni in Baptisma an changthar thu ei lo hriet a, Lalpa’n mithar a mi pek belsa pei leiin Pathien ropui raw se.

 4.  Biekin bawl mek: Kohran hai Pathien malsawmna tamtak ei dawngpei a, member khawm belsa a ei um pei leiin Muolhlum EAC Biekin ding Hmarsak Pastorate Standing Committee in mawphurna a pek ang dungzuiin Rengkai Unit in theitawp a hma la in Biekin bawl mek a nih a. Pathien zara tluongtaka bawl zo vat a ni theina dingin tawngtaipui ei tiu.

 5.  Missionary Project: Vangai Pastorate Missionary Board chun rawngbawlna sukhrat peina dingin 2019 a inthawk a hma la tan in, Missionary Project  Jeisuo rama Kuva bil an siem a. Khawvel harsatna tamtak kara June thla khan Kuva iemanizat phun belsa in Project hmun hai sukfai in theitawp in hma an lak a, an Project a hlawtling ngei theina dingin tawngtaipui ei tiu.

 6.  Hmarsak Pastorate Office Staff bielfang: Pastorate Officer Rev. Roparlien Ralsun, inrawinain Hmarsak Pastorate Office Staff hai chun July thla sung an biel Unit tin hai kan in, Lockdown leia inkhawm theiloa  ei um zing laiin Kohran rawngbawlpei dan hai inhrietpawna thatak a um pei theina ding le rawngbawlna fe mek hai in hril thar in hun hlimumtak an hmang. 

7.  Accident tuok: Tarik 7 July 2020 khan Tripura Mission Field Workers’ Meet, Duinganga hmuna thang dinga fe ei Missionary Lalmalsawm, Sai-ep a um chu vangduoi tlak takin lamlaka Activa in a accident a. A ke ru vawitieng pang a  liek leiin lawn theilo in a um. A hung damsuok vat theina dingin Kohran hai in tawngtaipui ei tiu.

 8.  Assam Mission Field thar hawng: EAC General Assembly 2020 in a lo rel ta angin Assam Mission Field thar chu Tarik 07, July 2020 khan hawng a lo ni ta. Hi rawngbawlna Field thar hawng hi Lockdown leia Hotu hai fe a remchangnaw leia Hmarthlang Pastorate Standing Committee le Missionary Board hai mawphurna pek an ni angin; an hmalakna hnuoia  Rev. Lalruotsang P.O in field thar hawngna hi a nei a. Assam Mission Field a hin unau Reang le Bengali hai laia rawngbawlna nei a nih a, Official taka hawng hma khawmin mi 13 laiin Baptisma an chang ta a, Field thar hawngni hin Rev. Lalruotsang -in mi pakhat Baptisma an changtir nghal a, nupa tuokhni an neithattir nghal bawk. Mission Field thar hawngna a hin, Hmarthlang Pastorate Standing Chairman le Secretary le Office Staff hai a hmuna hang fein Program hlawtling takin an hang nei thei a nih. Tiama a hin a khuosung mi haiin School le Biekin dinga an lo bawl hai khawm hawng sa nghal a ni a, Inkhawmna hai khawm phurtakin an nei thei zinga, Pathien sandamna feltak an nei pei theina dingin tawngtaipui ei tiu.