Kohran Chanchin (Thuhriltu Vol. XLIX/No. 06&07/June&July, 2021)

#    Ringthar belsa in an umpei: Hripui leia harsatna nasatak ei tuok zing lai khawmin ei rawngbawltuhai chawl hleitheilovin an um a, chuonglaichun, harsatna ei tuok leia Pathien beiseitu hung pung peiin ei Missionary hai in theitawpin rawngbawlna an nei zing,  Lockdown leia harsatna ei tuok mek laiin ringthar mi 26 lai zet el Lalpa’n a mi peksa nawk leiin Pathien ropui raw seh. Hieng ringthar hai hi Mission Field hran hran Tripura, West Bengal le Assam Mission Field hai a inthawk a nih. Hieng ringthar laia mi 8 in Baptisma an chang a, Lockdown leia Biekin inkhawm hai mumal taka nei thei a la ninaw leiin mi dang Baptisma chang dinghai hin an la chang thei hrinaw a nih.

#    Missionary Training nei: Tukum 2021 sunga Missionary hai tadinga training buotsai dinga ti angin, nuom ang takin hmunkhata fekhawma training hi neithei ninaw sienkhawm, Google Meet hmanga training hi buotsai a nih. Rev. Lalchawlthang Thiek, Guwahati, Rev. Kuman Suresh Singh Imphal le Mr. Ramchullova Ralte IEM, Chennai hai  Resource person a thangin training hi hlawtling taka nei a nih.

#    Sungkuo harsa hai thangpuina pek: West Bengal Mission Field a ringthar hai in Lockdown leia fak le dawn harsa zuol sungkuo 200 chuonglai zet chu nitin mamaw fakding an pek a lawm a um takzet. Hieng an thilsem hai hi ringthar haiin  thawkhawm in tu thangpuina ngen lovin Pathien a inthawka an dawng angpei chu phal takin an peksuok a nih. Hieng anga rawngbawlna hlutak an neina a inthawk in ringnawtu chen khawma thilpek hlutak tak hai hung pekhawm in theitawpin thang an lak tlangna hi ratha hung insuo peiin mitamtak kuomah chanchintha hril theina kawt an hawng pha a nih.

#    Head Office Extension zofel tep a ni tah: Kohran inthanglien pei leia Office khawm zaulien a hung ngai pei ta leia, nikum 2020 a Head Office zulienna (Extension) khawm tluongtaka sinthaw zing a ni a. Tuhin  Ground floor zota in a sawngkhatna (Ist floor) khawm hluo theia zo tep a ni tah.  Pathien in rem a ti chun September/October vela hluo hman beisei a ni a, Pathien zara tluong taka zo a ni theina dingin Kohran mipui in tawngtaina in lo hre zing ei tiu.

#    Relief & Development rawngbawlna tluong taka nei zing a nih: EAC Relief & Development Department khawm in hripui kara theitawp in rawngbawlna a nei zinga, Hmarthlang le Vangai Pastorate haia insung khawsakna dawmkangna dingin sungkuo tamtak hai chu Huon siempui an ni a, ei ram in hripui leia Lockdown khirtak ei nei zing lai khawmin thlaichi hai a hun taka sem theia an um kha lawm a um tak zet a nih. Project fieldah sungkuo harsa zuol hai kuomah khawm thei ang angin thangpuina (bufai) hai sem in rawngbwlna tluong taka nei zing a ni leiin hieng an rawngbawlna hai a hung hlawtling pei theina dingin tawngtaipui zing hlak ei tiu.