Kohran Chanchin (Thuhriltu Vol.XLIX/No.04/April/2021)

# General Assembly vawi 73na hlawtling taka hmang a nih: EAC General Assembly vawi 73na chu Rengkai EAC Biekin a Tarik 3-6 March 2021 sung khan hmang a nih. Tukum Assembly hi ei hripui inleng leiin rorel palai chau fekhawm a nih a. Palai fekhawm haiin taima taka ro hai relin nithum sung zet rorelna hi nei a nih. Constitution Major Review thaw a nileiin rorel hun sung hi kum dang nekin a sawt deu a nih. Kumtin May 1-7 sung hi biel pumpuia MISSION WEEK a hmang ding le 2021 sung Budget Rs.473.18 pawmna le Hmarsak Pastorate Officer ṭhuthmun Rengkai ni hlak chu Saikot a sawn a nih a, EAC Constitution Major Review tluongtaka pawm a ni bawk. Tukum Assembly hi  mipui inkhawm (Worship Service) hmunkhata hmang lovin Hmarsak Pastorate Unittin ah Pastor le Assembly palai hai in semdarin Tarik 7, March 2021 Pathienni tûk Kum thupui “Kristaa Zung kei” Kol.2:7 hril hawngna nei a nih. Kum thar Assembly Moderator dingin Rev. Dr. Lalrosiem Songate le Secretary dingin Pu Josepth L. Sungte hai thlang an nih.

# NSSU Hotu Training: Hmarsak Pastorate NSSU Committee hmalakna in Hmarsak Pastorate Unittin NSSU Hotu hai tarik 19 March 2021 khan Saidan a Training hlawtling takin an nei a. Hi hunah hin Instructor in Rev. David Ralsun, Bethel Ministry le a Team hai in Training an peka. Naupang hotu haiin an hlawkpui hle a nih.

# Rev. Challienkung Former Executive Secretary khuolzin: Dimapur Hmar Christian Fellowship hai fielna leiin ei hotu  Rev. Challienkung Former Executive Secretary hai nupa chu tarik 8-21 March 2021 sung khan Dimapur Hmar Christian Fellowship hai fielna in rawngbawlna pawimaw tak tak hai an va nei a. DHCF hin Biekin thar an bawl chu Pathien kuomah inhlanna le lawmna ropui takin an nei a, Mi 10 lai zet baptisma an changtir bawk a, Lalpa Zanbu buotsaina an nei a, Local Seminer hai khawm neiin Program hlawtling takin an hmang a nih. DHCF hi Assembly remruotna in ei hotuhai Rev. Fimchawnthang le Rev. Challienkung haiin hun iemani chen rawngbawlna anlo nei na hmun a nih a,  Kohran hai leh rawngbawlna inpawtaka nei tlangpei a ni bawk. DHCF in Biekin ṭhatak nei thei a an um hi ei lawmpui tak zet a nih.

# Ringthar Baptisma chang: Tarik 28 February 2021 khan Assam Mission Filed a ringthar pathum Pastor Paulchunghnung in Baptisma an chngtir a, Tarik 14 March 2021 khan West Bengal Mission Field a inthawk in ringthar paruk  Rev. K.C.Thomas F/S in Baptisma an changtir bawk. Lalpa’n rawngbawltu hai hmangin ringthar a mi pek belsa peia, Pathien kuomah lawmthu hrilin ringthar hai ringna kawnga an hung inṭhanglien pei theina dingin ṭawngṭaipui zing hlak ei tiu.

# Fulbari WB-ah Biekin bâwlmek: Kumhni lai chau rawngbawlna ei la nei nisienkhawm, West Bengal Mission Field-ah ringthar an hung pungpeia, Fulbari, Siliguri, Evan. Timothy Lohar rawngbawlna khuoa ringtu 30 chuong lai an hung um ta leiin Biekin bawl ṭanmek a ni a, ringthar haiin theitawpa ṭhang lain an Biekin ding hi an bawl ṭan mawl mawl nghal el hi inpak an um tak zet a nih. Pathien ṭhangpuina zara bawlzo vat a ni theina dingin ṭawngṭaipui mawl mawl lei tiu.

# Home Crusade hmang: Tarik 18-21 March 2021 sung khan Muolvaiphei Unit sung sungkuo 20 lai zet el chu Evangelistic Team hai in Home Crusade an neia. Pathien zarin hlawtlingna ropuitak changin mi tamtakin Pathien malsawmna thar an dawng leiin lawm aum tak zet a nih.