Kohran Chanchin (Thuhriltu Vol.XLIX/No.01/January/2021)

Missionary Convenction: Vangai Pastorate chun December 4-6, 2020 sung khan L. Kharkhuplien ah Missionary Convenction hlawtling takin an hmang. Vangai Pastorate Missionary Convenction hmangpui ding hin Assam Mission Field, Tiama a rawngbawltu Missionary Evan. Solomon Hmar an fiel a. Evan. Solomon Hmar hin an fielna angin a hang hmangpui a. Rawngbawlna report a pek hai le Pathien Thu hriltuhaia inthawka mipui an thu danghaiin Missionary Convenction hmangtu hai chona ropuitak a pek a. Nasa nawk zuola Ramthim rawngbawlnaa thang la dinga inbuotsaina thar leh hlimtakin Missionary Convenction hmang zo a nih.

Imphal Biekin thar Hawng a nih: December 12, 2020 khan a EAC Biekin thar pahni hawng a nih. EAC Imphal Unit in hun iemani chen Biekin bawla sum le pai le tha tamtak an seng hnungin Biekin thar mawitak an bawl chu zo a ni ta a. December 12, 2020 khan Upa Er. Lalthanzam Amo, Chairman Executive Committee EAC, Chairman BOT ECCI ni bawk chun Pathien hmingin a hawng a. Biekin hawng a ni zo hin Biekin le a sunga hmangruo, Pulpit, Projector, Thungna, Chair, Table, Lecture table, P.A. System le Biekina tul dang danghai bukim taka lakhawm a siemrel hieu um hai chu Rev. Lalkhamlien in Pathien kuoma inhlanna hun a hmang a, Biekin bawlna hmalakna, sinthaw dan le sum seng dan report Pu Joseph L. Sungte, Secretary Local Committee & EAC House Imphal anthawk ngaithlak a ni a, member thenkhat haia thuhril ngaithlak a ni a, Local Chairman Upa Rohmingthangin lawmthu hrilna hun a hmang zovin Rev. Roparlien Ralsun, Pastorate Officer in lawmthuhril tawngtaina neiin malsawmna in Biekin hawng program a khar. Biekin hawng le inhlanna hi hripui leia sawrkarin SOP a siem zui a tul leiin mipui tamtak fekhawm an naw a. EAC Imphal Unit Local Committee, Hmarsak Pastorate Standing Committee le Executive Committee member a fe thei theihai fekhawma hawng a nih. Biekin hawng zo hin Localin thlaithleng an buotsai chu fekhawm haiin awt tlang a nih. State khawpui Imphala Biekin le Building ei nei theina dinga sum le pai, ngaituona le tha tamtak sengtu a bikin EAC  Imphal Unit member hai inpak an um takzet a, an chung kohran a lawm takzet a nih.

Hmarkhawlien EAC Biekin thar Hawng: December 12, 2020 bawk hin Hmarkhawlien, Cachar Assam a EAC Biekin chu Rev. Lalruotsang, Pastorate Officer in a hawng a. Kohran mipui thahnemtak fekhawm hai leh Biekin hawng le inhlanna program hi ropuitakin an hmang. Biekin hawng a ni zo hin mipui hai leh Biekin sunga lutin a hawngtu Rev. Lalruotsang-in inhlanna hun a hmang zova Pathien Thu hrilna in a sun zawm a. Biekin thar ngeia kohran mipui pungkhawm haiin Pathien Thu an ngaithlak thei ta chu an lawm em em a nih. Biekin hawng inkhawm program an hmang zo hin kohran mipui Biekin hawnga pungkhawm hai po po kil tlang dinga ruoi an buotsai angin thlaithleng an awt tlang zovin mipui inthe dar a nih.

Imphal EAC le Hmarkhawlien EAC hai Biekin thar an hawng ta a. Unit dang dang Biekin bawl zing iemani zat ei um zing a. Thenkhat zo el dinga um mek le hmabak la nei deu khawm ei um tawl a. Biekin thar ditum le mawitak taka hung insuo seng dingin Pathien kuoma tawngtaina in san pei ei tiu.

Revival Meeting : November 14, 2020 khan West Bengal Ramthar Field chun Limbu Bitha, Siliguri ah One Day Revival Meeting hlawtlingtakin an hmang a. Revival Meeting a hin mi 200 chuong an fekhawm a, Pathien Thu le Hlaa inpawlna hlimtakin an hmang. Hieng ang program hi ringthar hung um pei hai Pathien Thutaka inthanglienna ding le Mission Station hran hrana ringthar le kohran belsaa um pei haiin inhrietpawna le inlaichina tha le a hung pung peina ding beiseia buotsai a nih. Hun lo lien diei ta sienkhawm Missionary field a rawngbawlna hi tiemtuhaiin lo hrie a, tawngtainaa ei san zawm pei nuomna leiin la hung insuo hram a nih.

Hmarsak Pastorate Mission Consultation Tour : December, 2020 sung khan Hmarsak Pastorate Mission Board member hai chun Chairman Upa H.D. Sanga, Secretary Upa Ngurbiekthang le Rev. Roparlien Ralsun Pastorate Officer hai inrawina in Unit tina Mission Board hai an kan a. Pastorate  Mission Board haiin Unita Mission Board kana an inhmupui huna hin kumthar hung tlung dinga Mission rawngbawlna thlura thang lak pei dan ding an hril tlangpui pei a nih. Kum dang angin Biekna inkhawm le inkhawmpui hai nei theinaw inla khawm Pathien rama thahnemngaina a chawl el naw a. Rawngbawlna ding hun remchang inchu pei kohranin hma ei lak na hai hi Pathien malsawmna ei dawngna ding lampui a hung nipei ei beisei a. Hmarsak Pastorate Mission Board rawngbawlna hai Pathienin a mi hai a kan tharna hmangruo a hung ni ngei ei beisei a nih.