Kohran Chanchin (Thuhriltu Vol.L/No.10)

## Camp hlawtling taka nei a nih: Tarik 25-27 August sung khan Muolvaiphei Unit Pasal Camp chu Prayer Mountain a hlawtling taka nei a nih. Hi hun a hin Camper mi 43 an um a, rawngbâwltu Speaker Rev. Zawllienmawi niin Evangelistic Team member hai an thlawp a. Pathien ṭhuoina le umpuina zârin Camp a lût haiin malsâwmna ropuitak an dawnga lâwm a um tak zet a nih.

## Biel hran hran a Finance Campaign nei a nih: Kohran hmalâkna le rawngbâwlna pêng hran hran hai sukhratna dingin biel ṭhenkhatin an ni biel sunga Finance Campaign an nei a. Hmarsak Pastorate Finance Committee, Simthlang Pastorate Finance Committee le Nuhmei Pawl hai le Hmarthlang Pastorate Finance Committee haiin mani biel unit tin hai sirin Finance Campaign hlâwtling takin an nei. Campaign huna hin Pathien ram sukhrâtna dinga Kohran hmalâkna hai inhril tharna neiin Unit tina hlâwk takin Program hmang a nih.

## Ringthar belsa-in an um pei: Pathien lunginsietna leiin rawngbâwlna ra dit umtak tak hmu le hriet ding a um pei a, Mission Field dang dang haia ringthar belsâin ei um pei leiin Pathien inpâkin um raw se. Tripura Field a mi 7, West Bengal a inthawkin mi 14, Manipur a inthawk mi 4 lai ringthar Lalpa’n a mi pêk nâwk thu ei lo hriet a. An ni lâia mi 7 in Baptisma an chang nghâl a, hieng ringthar hai hi ringna tieng an hung puitling pei theina dingin ṭawngṭâipui hlak ei tiu.

## Training nei nâwk a nih: Manipur Ramthar Field a ringthar hai ta dinga Training buotsai a um hlak chu a ṭum lina dingin Tarik 13-17 September sung khan Naodakhong a nei nâwk a nih. Hi hun a hin Kohran ṭhuoitu mi 45 an ṭhanga, Pi Redeem Lalremsang, Lecturer ECT chu Resource Person a nih. Ringthar Kohran ṭhuoitu hai ta dinga training pawimâwtak buotsaia um hi Kohran haiin an hlâwkpui hle a nih.

## Beiruol ṭluong taka hmang: Hripui leia September Beiruol kumhni lâi zet hmang mumal thei lovin ei um a. Tukum 2022 ruok hin chu Pathien lunginsietna zarin biel tin le kohran in Beiruol hlimtakin ei hmang thei hi lawm a um em em. Eini ei kohran Thupui ‘I Puon In hmun chu zau rawh” Isai 42:2 thupui hmanga Rev. Zawllienmawi, EAL in Subject a buotsai chu Kohran mipuiin inchûk a ni a. Pathien Thu hi inchuk le hril el chau ni lovin, Missionary châwmna ding, Beiruol Fund  target tlâk tuma Kohran mipui phûrtaka Unit tinin Beiruol sûnga ṭhang ei hang lak sieu sieu hi  lâwm a um takzet a nih. Pathien ditzawngtaka mimal le kohranin Puon In ei zau seng na dingin Beiruol hin ra an suo ngêi beisei a nih.