Kohran Chanchin

## Counselor Training nei a nih: Tarik 14-16 July 2022 sûng khan Parbung Sub.Hq. ah Simthlang Pastorate thawktuhai Counsellor Training hlâwtling taka nei a nih. Hi hun a hin Rev. Zawllienmawi EAL le Rev. Zakapṭhuom AEAL hai Resource Person-in an ṭhang a. Training zo hin Simthlang Pastorate a Unit hai sirin rawngbawlna an hung nei zawm nghal a nih.

## Hotu hai inzin: Tarik 28 July – 6 August 2022 sûng khan Rev. Lalkhamlien Executive Director le Rev. Lalngaizuol Director, Finance hai chu Kolasib Kohran hai kan le Biekin hmun sukfel dingin an inzin a. Pathien zarin an thaw ding hai thaw zoin Kolasib Biekin hmun khawm Pathien lunginsietna zarin inchâwk fel a lo ni tah. Unit haiin theitâwp suoin Biekin bâwl dingin an inbuotsai mêk a. Kolasib biekin hi bawl vat a ni theina dingin lo ṭawngṭaipui seng ei tiu. Chun, Pu Simon L. Hrangchal Director, Relief & Dev. le staff hai khawm Hmarthlang Pastorate sunga an rawngbâwlna hai kanin Tarik 25-30 July sung khan Field visit an nei a, chu zo a chun, Pu Simon L. Hrangchal hi rawngbawlna le inzawmin Partnership Consultation  Hyderabad a ṭhangin hlawtling taka Program hai hmangin damtakin Office an hung tlung nâwk tah.

## EAC le IEM rawngbâwl tlângna nei: EAC le Indian Evangelical Mission (IEM) rawngbawl tlang peina ding le inzawm in Tarik 22 July 2022 khan MOU ziek a nih. Pathien lunginsietna zârin IEM fe thlengin Missionary pathum châwm mêk a ni a, hmatieng peia rawngbâwlna lienlem nei pei dinga hmâ lâk a nih. Hi ni vek hin One Day training for Localization and Multiplication hlâwtling taka nei a nih. Hi training a hin Manipur Mission Field a thawktu hai kimtakin an ṭhang thei a, Rev. Lalchawlthang Ṭhiek, Regional Secretary, NE, IEM chu Resource person a hmang a nih.

## Ringthar belsain an um pei: July thla sûng khan Mission Field rawngbâwlna hmun hran hran a mithar belsain ei um pei a. Tripura Mission Field Morachara ah mithar 10 lâi Lalpa’n a mi pêk thar a, hi khuo a hin Kohran a hung pieng ṭan mêk a nih. Chun, Balidum a 3 le Govindabari a 2 ringthar Lalpa’n a mi pêksa bawk a, mi panga in Rev. Buonghranglien F/S kutah Baptisma an chang a nih. Manipur Mission Field Ningthoukhonh ah ringthar 6, Sabal a 1 an rengin mi 7-in Rev. P Shanjeet Singh  F/S kuta Baptisma an chang bawk a nih.