Kohran Chanchin

## Counsellor Training nei a nih: Tarik 23-24 June 2022 sûng khan Evangelistic Team memberhai le Hmarsak Pastorate sûnga Pastor hai Two Days Counsellor Training, Council Hall a nei a nih. Hi hunah hin Resource person-in Rev. Dr. Lalhmuoklien, Rev. Laldinglien, Rev. Zawllienmawi le Rev. Zakapṭhuom hai an ṭhanga. Training a ṭhang hai hin hma tieng rawngbâwl peina ding kawngah an hlâwkpui hle a nih.

## NSSU Camp hlâwtling taka nei a nih: Tarik 29 June – 2nd July 2022 sûng khan Hmarsak Pastorate NSSU Committee hmalâkna-in NSSU Gospel Camp chu NECA Campus Rengkai-ah  hlâwtlingtak a nei a nih. Camp a hin mi 230 lai an lût a, EAC Evangelistic Team haiin rawngbâwlna an nei a, Camp a lût hai hin Pathien Thlarâu malsâwmna ropuitak an dawng leiin lâwm a um takzet a nih.

## Kohran Upa Seminer: Hmarsak Pastorate sûnga Kohran Upa hai ta dinga buotsai, KOHRAN UPA SEMINER chu tarik 9^th July 2022 khan Rengkai Sunday School Hall ah hlâwtling takin an hmang. Hi huna hin Rev. Dr. Lalrosiem Songate le Rev. Challienkung hai chu Resource person-in an ṭhang a. Hmarsak Pastorate sûnga Kohran Upa mi 30 lai an ṭhanga an hlâwkpui hle.

## Thuhriltu Magazine Golden Jubilee lawm: Ei Chanchinbu Thuhriltu Magazine kum 50 a lo tling ta leiin Pathien kuoma lâwmthu hril inkhâwm 15th July, 2022 khan EAC Council Hall-a nei a ni a. Program hi lientak a siem an naw a, Executive Committee, Editorial Board le Thuhriltu Editor lo ni ta hai ko khâwmin, hieng chen Pathien ṭhuoina ei dawng leia lâwmthu hrilna inkhâwm hunser hi hmang a nih. Thuhriltu Golden Jubilee lâwmna hunser a hin Editor lo ni ta hai po po châwimâwina Thuziek Mâwi (Memento) inhlân an nia. Golden Jubilee lâwmna hunser a hin Editor lo ni hlak Rev. Huolthangsei Ṭhiek-in hieng chen tlung thei a ei um lâwmna-in fekhâwm hai ruoi a buotsai pêk bawk a.  Thuhriltu Magazine lo phurtu le vawisûn ni chena hlutsaktu tamtak ei la um pei leiin lâwm a um takzet a. Article hung ziektu, Agent hai le Subscriber hai chunga ei lâwm takzet a nih.

## Ringthar belsain an um pei: Mission Field a rawngbâwlna haiah ringthar belsain an um pei a, Manipur Field: Ningthoukhong a- 4, Sabal-2, West Bengal Station hran hrana inthawkin mi 16 le Tripura a inthawkin mi 4, an rêngin 26 an um a. Chuonghai laia mi 9 in Baptisma an chang a ta a. Rawngbâwlna kawnga Pathien malsâwmna ei dawng pei a, hieng ringthar hai ta ding hin ṭawngṭâipui zing hlak ei tiu.

## Rawngbawltu ṭhenkhat um hmun (Station) sukdanglam a nih: Rawngbâwlna a hrat pei beiseina leiin rawngbâwltu (Missionary) ṭhenkhat an stationa lo um sawt deu ta hai um hmun siemrem ṭhatna nei a ni a. Chu dungzui chun, Rev. Buonghranglien Mualhui-ah, Evan. Lalmalsawm Mukamtilla-ah, Evan Rosiemlien Umachoranpar-ah le, Evan. Darchawngkung Balidum-ah sawn an ni a. An umna dinga ruot hai a hin an rengin an insawn lût vawng ta a, hmunthar a rawngbâwlna tharin hma an lâk mêkna kawnga ṭawngṭâipui zing ei tiu.