Kohran Chanchin

# Mission Week hlawtling taka hmang a nih: General Assembly 2020 in a lo rel ta anga Kumtin May 1-7 sung Mission Week hmang dinga ti chu nikum khan hripui leiin mumal taka hmang thei ninaw sienkhawm, tukum ruok chuh Pathien lunginsietna zarin Unittin in hlawtling takin hmang a nih. “Hnungzuitu nina’ (Discipleship) thupuia neiin chawl karkhat sung zan tin thupui hi inchuk a ni a, hi sung hin Mission rawngbawlna tieng inhril hriet tharnaa hmang a ni bawk .

# Hmun thuma Gospel Camp nei a nih: Tarik 10-24 May sung khan Hmarthlang Pastorate Unit pathum Dolakhal, Khawzawl le Savawmphai haia Gospel Camp hlawtling taka nei a nih. Khawzawl le Savawmphaia hin khawtlang huopin sawnghni ve ve nei a ni a, Camp a lut mi tamtakin Pathien Thlarau sandamna changin mi tamtak Thlarau ngui le chau hai keiharin an um a, Kohran hai Pathien Thlarau pawlna ropui tak an dawng leiin lawm a um tak zet a nih. Hi Camp a hin Rev. Zawllienmawi EAL Speaker a ni a, Rev. Zakapṭhuom, Mrs. Romila, Rev. Lalruotsang le Pastor G. Diamondthang hai counselor in an ṭhang a nih. 

# Director, Missions &Evangelism khuolzin: Tripura le Assam Mission Field zaulienna ding hai enfel in Rev. Laldinglien Director, Missions &Evangelism chu Tarik 9-18 sung khan an zin a. An zin sung hin Tripura rawngbawlna hmunthar Rajkandi le Umacharanpara le khaw dang dang hai a sir a. Assam Mission Field-ah Anondakhal, Cachar Dist. le Hailakandi Dist. sunga  Gurmura, Damcherra, Riflemara le Barogor hai sirin hmatienga rawngbawlna hmun ding hai enfelna nei a nih.

# 5 Days Leadership Training nei nawk a nih: Tarik 23-27 May sung khan Manipur Mission Field a ringthar Kohran ṭhuoituhai ta dingin 5 Days Leadership Training nei nawk a ni a, hi huna hin Resource person in Rev. Dr. Lalhmuoklien le Rev. Huolthangsei Ṭhiek hai an ṭhang a nih. Hi training a hin mi 45 an ṭhang a, hieng ang training hi tukum vawithum nei a ni taa, Pathien zarin la nei zawmpei dinga ti a ni bawk. Ringthar Kohran ṭhuoitu Pathien thutaka midanghai an ṭhuoi theina ding beiseia hi program hi siem a nih.

# Hotuhai in zin: Tarik 18-21 May sung khan Rev. Lalkhamlien le Rev. Dr. Lalhmuoklien hai chu NEICC khawmpui  Shillong ah an zu ṭhanga, Mr. Simon L. Hrangchal Director, R&D khawm Tarik 24-27 sung Project hmun hai kan in an zin bawk, hotuhai inzin hi damtakin Office an tlung nawk tah.

# ECT Graduation Day hmang a nih: Tarik 27 May, 2022 khan ECT Chapel hall-ah Graduation cum Commissioning Ceremony program hmang a nih. Hi hunah hin Rev. Dr. Jong pil yoo Speaker a nia, Rev. Thangkhosiem Executive Director, ECA in Commissioning a nei bawk. Hi hun a hin M.Div. – 12, B.Th-12 Diploma -3 le M. Th (Missiology) – 5 an Graduate a nih.Ringthar belsain an umpei: Pathien lunginsietna zarin Mission field-ah ringthar belsain an um peia, May thla sung khan, West Bengal Mission field a inthawkin mi pasari, Assam a inthawkin mi 5, Tripura a inthawkin mi 6 Lalpa’n ringthar a mi pek nawk a nih. Hieng ringthar hai laia mi 10 in Baptisma an chang nghal a nih.

# Leadership Training an nei: West Bengal Mission Field-ah ringthar an hung pung pei ta leiin Kohran ṭhuoitu ding siem a hung ngai pei taa, Evan. Ashok Oraon hmalakna in Grace Leadership Development Program siemin tlang bik mi 15 hai ta dingin kartin inrinni zat Training hi neipui an nih a, hi training hi thlathum sung aw ding a nih. Remruot dan a chun first batch zova hin second batch nei nawk dinga riruong a nih.

# Hotuhai inzin: Tarik 27-31 May 2022 sung Rev. Lalkhamlien, Rev. Lalngaizuol le Pu Benjamin Hrangchal hai chu Kolasib Kohran kan in an inzin a, thawṭul pawimawhai thawzovin damtakin Office an hung tlung nawk ta.