Kohran Chanchin

## Gospel Camp hlawtlingtaka nei a nih:  Tarik 7-17 April 2022 sûng khan Vangai Pastorate Unit pathum ah Gospel Camp hlâwtling taka nei a nih. Tarik 7-9 sûng khan L. Kharkhuplien a Kohran Ṭhuoitu Camp nei a ni a, hi taka hin mi 20 riek lûtin Camp hi hlâwtling taka nei a nih. Tarik 10-13 April khan Kh. Zeikhan a Camp hi nei zawm a ni a, hi ṭum hin mi 40 lai lûtin, Zeikhan khawtlângin Pathien malsâwmna ropuitak an dawng  bawk a. Tarik 14-17 sûngin Kangreng a Camp hi nei zawm nâwk a nih. Hi hunah hin mi 30 lai riek lûtin Pathien Thlarâu malsâwmna ropuitak dawngin Camp hi hlâwtling taka hmang a nih. Tuta ṭuma Camp a hin Rev. Zawllienmawi, Evangelist At Large chu Speaker niin, Evangelistic Team member a inthawkin Pi Romila Counselor a ṭhang thei bawk, biela Pastorate Officer le thawktuhai ṭhangruolin “Khawlâm i um a?” ti thupui hmangin Camp hi hmang a ni a, mi 90 laiin Pathien Thlarau malsâwmna an dawng a nih.

## One Day Joint Fellowship program hmang a nih: Manipur Mission Field a ringthar Kohran EAC, ECA, EOC le ESC Mission Field haia inthawk fekhâwmin Tarik 22 April khan ESC Mission Field, ITHING-ah One Day Joint Fellowship hlâwtling takin ECCI (Evangelical Congregational Church of India) hnuoia Kohran haiin an hmanga. ECCI Head Office tienga inthawkin Rev. Paozathang Singson, General Director inrâwina hnuoia mi iemnanizât zet fein Program hlim-umtak hmang a nih. Hi hunah hin mi 250 vel fekhâwm a ni a, hieng ang Program hmang theia um hi unâu Meitei hai an lawmin an hlim hle a nih.

## ECCI Annual Leaders’ Conference hmang a nih: Tarik 23-25 April sûng khan ECCI (Evangelical Congregational Church of India) Annual Leaders’ Conference hlâwtling takin hmang a nih. Tuta ṭum inkhawmpui hi Rengkai EAC, Hill Town EOC, D. Phailien ECA le ESC Headquarter Church haia Worship service nei a ni a, rorêlna ruok chu ECT Chapel-ah nei a nih. ALC hi Rev. Bruce  D. Hill Bishop ECC USA le Rev. Tad Rathman, Director GMC haiin an mi hung hmangpuia, anni haia inthawkin Pathien Thu ropuitak tak ngaithlâk a ni a. Inkhawmpui a ṭhang haiin Pathien malsâwmna tamtak an dawng a nih. ECCN (Evangelical Congregational Church of Nepal) Executive Director, Rev. Th. Janga Kipgen khawmin inkhawmpui hi a hung uop bawk a nih.

## CKṬP Ṭhuoituhai biel fang: Central Kristien Ṭhalai Pawl ṭhuoitu haiin Simthlang Pastorate, Vangai Pastorate le Hmarthlang Pastorate hai kanin Central Kristien Ṭhalai Pawl hmalâkna hai  inhrilhrietna le biel tina Committee hai leh inpâwl tlângna an nei a. Hieng ṭhuoitu bielfang hai hi Mr. Benjamin Hrangchal, Secy, CKṬP in an rawia, Mr. Nehamia Buongpui, Tv. Lalnuntluong, Evan. Chawngrohmang le Pro. Pastor Lalbuotsai, YCO hai an nih. Pathien zarin rawngbâwlna tluongtaka neiin Tarik 26, April khan dam takin an umna hmun an hung tlung nâwk tah.

## Ringthar belsain an um pei: Pathien lunginsietna zarin Mission Fielda rawngbâwlnaah malsâwmna ei dawngpeia  lâwm a um  takzet. April thla sung hin West Bengal Mission Field Potong-ah ringthar sungkuo pakhat, Centre Busty a sungkuo 2 le Garidhura a sungkuo 1 le Fulbari a sungkuo 1-in belsain an um. Chun, Tripura, Rajkandi Area tieng khawm rawngbâwlna ṭantharin a um a, hi lai Area a hin Preaching Station pathum nei mêk a nih. Hieng khawdang dang haia inthawk hin Pathien beiseitu an hung um peia inkhâwmna haia an hung ṭhang mêk ta bawk a nih. Manipur Mission Field tieng Ningthoukhong-ah khawm rawngbâwltu ei Missionary-in a umchil a inthawkin malsâwmna an dawng peia, tuhin chu ringthar pahni Baptisma chang ding an um ta a, mi dang khawm ringthar hi an hung um pei ding niin an lang leiin lâwm a um takzet a nih.