Kohran Chanchin Ṭhenkhat

## Hmarsak Pastorate KṬP Annual Sports, 2021: Liemtah November 4 – 6 le 13, 2021 hai khan Hmarsak Pastorate Kristien Ṭhalai Pawl (KṬP) chun Khawpuibung playground le Rengkai EAC Campus-ah Annual Sports, 2021 hlawtling takin an hmang. Annual Sports, 2021 hi Rengkai EAC Campus-ah Badminton (Double) a hmalawkin November 4 le 5, 2021 zan haiah inkhel a ni a; Badminton inkhel le Khawpuibung playground a items chi tum tum inkhelna programme haiah Pu Robert L Hmar le Dr. George Haokip hai Chief Guest in an ṭhang. Annual Sports a hin Hmarsak Pastorate biel sunga unit tum tum haia inthawk KṬP members ṭhehnem tawk tak an fe khawm a, a hnuoia hai hi Games & Sports items huoihawt le lawmman dawngtuhai an nih:

PASAL:

Football –
Winner: Saidan KṬP
Runner Up: Khawpuibung KṬP

Volleyball –
Winner: Ngurte KṬP
Runner Up: NECH KṬP

Tug-of-War –
Winner: Muolvaiphei KṬP
Runner Up: Lamka KṬP

Badminton –
Winner: Aloes & Hosea, Rengkai
Runner Up: Evan & Lalneiruol, NECH

NUHMEI:

Football –
Winner: Lamka KṬP
Runner Up: Saikot KṬP

Volleyball –
Winner: Ngurte KṬP
Runner Up: Saidan KṬP

Tug-of-War –
Winner: Khawpuibung KṬP
 Runner Up: Ngurte KṬP

Badminton –
Winner: Grace & Blossom, Rengkai
Runner Up: Lalparvul & Laldinthar, Saidan

A chunga lawmman dawngtuhai hi Hmarsak Pastorate KṬP in One Day Fellowship programme a huoihawt huna lawmman pek ning an tih.

## 19^th CKṬP General Conference: Liemtah November 12, 2021 (Zirtawpni) khan Central Kristien Ṭhalai Pawl (CKṬP) General Conference a vawi 19-na chu Rengkai EAC Biekin-ah hmang a nih. Inkhawmpui hi tulai boruok le inmilin rorelna hun chaua hmang a ni a, hi huna biel tum tuma inthawka fe khawm palaihaiin tluong takin rorelna an nei. Ro tam tak rela umhai lai CKṬP project thar ding pahni: Kuval bil siem le Director Quarter bawl hai hi sukpuitling ngei dinga hma lak dinga ti an nih.

Inkhawmpui rorelna-a hin CKṬP members hmun ruok 3 hluosiptu dingin Upa Vanlalthuom, Pu Nehemiah L Buongpui le Pu Obed Lalhrietfel hai ruot an ni a, 20^th CKṬP General Conference huna Conference Chairman dingin Upa Lalthangvung le Junior Secretary dingin Tv. Lalnuntluong hai thlang an ni bawk. Zan hunah Biekna Inkhawm hun hmang a ni a. Tv. Lalnuntluong in inkhawm a ṭhuoi a, Pu Lalbuotsai Sanate, Youth Co-Ordinator in Pathien thua rawngbawlna a nei. Inkhawmpuia ṭhanghaiin Pathien malsawmna tam tak an dawng nia thu dawng a nih.

## Council Budget Session: Zani November 13, 2021 (Inrinni) khan EAC Council Hall-ah 2021 Council Budget Session tluong taka zo a nih. Hi huna biel tum tuma inthawka fe khawm council members ha’n ro tluong takin an rel a, 2022 Annual Budget dingin Rs. 477.49 lakh (Nuoi zali sawmsari pasari point sawmli pakuo) lungruol taka pawm a nih. Pathien hratna zara ei sukpuitling theina dingin tawngtaina in lo hre tawl ei tiu.

## Hotuhai Khuolzin Inlawi: Chawlkar hmasak sung khan Rev. Lalngaizuol, Finance Director le Pu Simon L Hrangchal, Relief & Development Director hai chu Kohran pawimaw le ṭul chi hran hran ngaituoin Vangai biel-ah an inzin a, dam takin an chengna hmun an tlung nawk tah. Vangai biela an cham sung hin Kohran project hran hran hai enfelna an nei a, project thar ṭan dan ding khawm an hung ngaituo sa nia thu dawng a nih. Ei Director-hai hin Vangai KNP inkhawmpui khawm an uop a, Rev. Lalngaizuol-in Pathien thua rawngbawlna a nei bakah, Kotoikhal Kohran-hai khawm kanin Biekin bawlna ding hmunhai an enfelpui nia thu dawng a nih.