Khawlam I Um? (Genesis 3:9, 1Kor 5:17, Galati 5:16, Johan 15:4)

By:- Rev. Zakapthuom, Kolasib, Mizoram

Kolosib a um dingin venga inthawkin kan thawk suoka, Kolosib ka hei tlunga an In bawlna le hmun hai ka hei hmu chu leh! a tam lem chu ṭenbaram ngawt a lo nia. Ei Quarter Building neitupan rala inthawkin a in hmun pakhat In la bawl lo na a mi hei khik hmua, kha hmun kha kan venga um nisien chu an ṭen em leiin Leipui ding khawma ka dit lo ding kha a na,  anachu Lakh tel man a lo ni zing el. Kolosib a um a ni tlat an nawm. Chutaka inthawk chun ei thupui KHAWLAM I UM ? ti hin ka ngaituona a sukthar leiin tlawmte bek ka hei hril nuom ve a nih.      

A PAWIMAW : A chunga ka hei suklang ang khin thil hrim hrim hi a umna i zirin a hluin a lo hlunaw thei a nih. Ringtu hai khawm hi Isua um ei nizie ei inhriet hma khan Pathien mit hmu a chun ei lo hlu naw de aw! Tawngsie phur, Diebol a nau, Hremhmuna hrem ding, tirdakum ei lo nih. Amiruokchu Isua ei um hnung ruok chun Pathien mit hmua thienghlim, sawiselbo, fel, inzaum, vanhmuna ṭhung ei lo ni zing el. Ka van hme naw de aw! Anachu, andik bawk si. Hienghi a ni leiin ei umna hi a lo pawimaw de aw!

Chulai zing chun ringtu tamtak chu Pathien nau ei ni hnung hin ei umna ding hmunah ei um ngainaw a. Khawlâm ei umna ding chu? Johan 15:4 a khan chieng taka hril ei nih. Isun’n keimaah um zing ro, a tia, chun Galati 5:16 a khan Thalaraua um ro, ti ei ni bawka, hitaka um “ro” a ti hi, Isua chun ringtu taphawt chu ei um ta a, anachu ei umnaah ei chêng ngai naw a nih. Khawpuibunga um ka nia, kan zin pha pha Khawpuibunga ka chêng ngai naw ang deuin ringtu tamtak chu ei inzin suok rawn taluo a, ei umnaah ei chêng hman ngai naw leiin ei hlut ding le man tam ding angin ei um thei naw a, mi hai sandamtu ding nisi in suknatu, chawkbuoitu ei lo ni thei a nih. Hmun seng senga umna zira hlua man tam lem a um hlak ang hin puotieng in ang seng nisi sungrila ei umna kha a lo pawimaw ngei.

Tekhi na’n sierkawp dana chun Biel (Zero) hi a hmaa umizirin hlutna a nei ve chaua, Zero ruok sawm khawm nisien amachaua a um chun hlutna a nei naw a, pawisa nisien inchâwk thei nei chuong naw nih. Amiruokchu, Zero hmaa khan number um sien chu Zero khawm kha hlu nghal a ta, thil tamtak an châwk thei ding a nih. Chuong ang bawkin ringtu hai hi ei umna andik naw pha chun hlutna ei nei naw a, ei piengtharna khawm hi mi’n an mi awi pek thei naw hlak a, ei ni khawm inringhlana’n ei sipa thlarau a lem chu inchâwk thei pakhat khawm ei nei ngai naw a ni hi. Chulai zing chun ringtu tamtak chu an umna ding thlarauah an uma, Pathien a hmasatakah an siea a dawta an ni an uma, a hmasaa an sie Pathien kha a hlu em leiin an ni khawma hlutna an lo nei vea, an man a tama, tamtakin ei nei zolo lungâwina, dawtheina, inremna, lungmuongna le hrietthiemna an lo nei hlak. Chuleiin, khawlâm I um ti hi a va pawimaw de! ei umna ding indik takah um hlak ei tiu. “ Keima ah um zing ro” Johan 15:4

EI UMNA HIN THUOMHNAW A MIN BEL TIR :  Rom 13 :12 a chun ringtu hai inthuomna ding a mi hrila, chuchu iem? Var thuom in inthuom ro, ti ei nih. Chun chang 14 a khan Lalpa Isu Kristaa inthuom lem dingin a mi ti bawka. a ni ngei thuomhnaw hi a pawimaw zie hrie seng ei tih. Thuomhnaw inbel lo chu saruoka umna a nih, a muolpho thlak awm! Ringtu hai hi ei inthuomna dingin ei inthuom ngai naw a, saruokin ei uma, thup um loin muolpho takin ei mihriem hlui mizie hi an langsuok hlak a nih. Mi, var thuoma an thuom pha chun a mi zie hlui kha la um zing sienkhawm an thuomna khan an khuma an lang suok ta ngai naw a, mi nunsie tak kha zainêm in an langa, ringum ngai lo kha ringum na’n an khum hlak. Lungâwina nei ngailo kha lungâwina’n an thuom hlak a nih.

Chu chau chu ni lovin umna I zirin hâk thei le theilo ei lo nei hlak a nih. Tekhi na’n ram luma ei um chun jacket thuomhnaw lum hi mâwi ti in inbel nuom inla khawm ei inbel pei naw a, hei inbel inla khawm sawt ei inbel pei nawh. Chuong ang deu chun ringtu tamtak chu mi hai silfen hlimna, lungâwina dam hi ei inhnara chu ei inbel thei nawh, ei umna’n a lo zirnaw lei a lo nih, chuleichun ei umna dinga um hi a lo pawimaw de.

EI UMNA ZIRIN HMANG THIEM EI NEI : Vawikhat chu khuo pakhat a kan inzina, nithum ngawt kan châma kan chunga an ṭha khawp ela, lawm a um em tiin kan inlâwi ding tawm in Têl hme zeuna ding pek kan tuma a lak nuom tlat naw a, a san kan indawn chu leh! hieng hin a mi dawna, Nau hai in mi pek hi ka lawm taluo, anachu têl ka hmang thiem nawh, ka piengthar a inthawkin hme ka la zeu ṭhak nawh, tiin a mi dawn. Ani ngei, a umna’n a zir nawa bazar a hla em leiin têl hi a hmang thiem naw a nih. Chuong ang deu chun ringtu tam tak chu ei um na’n a zir nawa bazar (Kalvari tlang) ei hlat ema Pathien thu hi hmang thiem ei lo nei naw a ni hi. Mi tamtak in Pathien thu hi inremna, thienghlimna le hlim na’n an lo hmang lai in ei hmang ve thei tlat nawh, ei um na’n a lo zir naw lei a nih. Chun, Pathien thu hi pawisa ang deu hi a nia, ram dang a chun hmang thei a ni der nawh. Entirna’n India rama cheng le India mi ei ni leiin ei pawisa nei sun sun hi a ram sunga chun an hmang thei vawng a nih. A hau hai lem chun Motor dam, In le lo ṭhatak tak le an damna ding damdâwi inchâwkna damin an hmanga a va tangkâi de. Anachu India pawisa hi lo hau hle inla khawm Burma rama chun an hmang thei naw a, inchâwk thei a nei nawh. Chuong ang deu chun mi tamtak chu Pathien thu ei hriet hlea chu ei hmang thei tlat nawh. Ei umna ram in a zir naw lei a nih. Chuleiin, ei hriet Pathien thu hi a hmang huna ei hmang pei theina dingin ei umna, ei chengna dinga um ei tiu.

EI UMNA ZIRIN HMU EI NEI: Kan naupang lai Publicity Department in kan vengah Cinema an hung insuo hlak a, ka la hriet zing chu chinlâia inthawka dung tâwi hrim hrim hi ka ni a. Ṭum khat an hung insuo ṭumin ka hma a um hai an dung an sang sia ka hmu ve thei nawh, ka hmu ve thei naw leiin ka ṭap ringawt nawk nghal ka nu’n “a hma tieng sawn van sawn la hmu el I tih” a mi tia. Ka hei insawn chun chieng deu in ka hmu ve thei tah. Ka um na’n a zir naw leiin mi hluotu an tam a, ka hmu thei naw a lo ni zing. Chuong ang chun ringtu tamtak chu mi hai hmu ang hmu nuom ve inla khawm ei hmu thei tlat nawh. Ei hei tang rak le ei ring a khama a na ṭek ṭuk el a ni hi, hmu nei chuong si lo. Mi tamtak chu an um na’n a zira chung tieng an hmu phak a, natna an tuok chang khawm natna um ta nawna an umna ding an hmua, an pasiet lai tak khawma an hausakna an hmu tlata, an thi ding khawma chatuon in an hring ding a ni ti an hmu hlak a, lungmuong takin an nun an hmang hlak a nih. Chu nun chu ei chang vena dingin ei umna dinga um ei tiu.

Atawp taka ding chun ei Bible a mi inlar deu Zakai a chanchin kha la hei hril ei tih. Zakai khan Isu hmu a nuoma, anachu a dung an hnuoi leiin a hmu phak nawh ti ei hriet kha. Nisienlakhawm, a hluotu hai maksanin theichang kunga a hei lâwn meu chun Isu a hmu tah. A umna andik ta leiin a hmu nuom a hmu thei a ni kha, Isu a hmu meu chun a va danglam ta de aw. Ama le ama an hmu tah, sim ding a neia, thaw ding a hriet nghal bawk. Ringtu tamtak chu sim ding ei nei nawa thaw ding ei hriet bawk nawh. Mani inhmu lovin, mi dang ei hmu hlak, mani suolna hmu lovin, mi dang suolna ei hmua, mani suolna inlang lovin mi dang suolna ei hmu langsar hlak a ni hi. Mani in tirdak khawpa Isu hmuna ding hmuna um hi a va pawimaw de aw. Chu chau chu ni lovin Zakaiin Isu a hmu khan Isu’n a hmu ve ti a hriet nghal a nih. Mi’n Isu hmutu chai hin Isu’n a hmu zing a ni ti an hriet hlaka, Isu’n a hmu zing ti hrietu hai nun chu mi’n an hmu le hmu naw an nun a danglam chuong nawh. Mi tamtak chun mi’n an mi hmu naw phawt leh ei ti hlak an naw?

Chun Zakai khan Isu a hmua amaa tlung nghal um nawk chu sandamna a ni kha, a va pawimaw de, ringtu hai hi khawvela ei cheng sung hin sandam ei va ṭul de aw. Lungsenna a inthawka sandam ei tul, mani hmasielna a inthawka sandam ei ngai, beidawngna a inthawka beiseina nei dinga dam khawm hi a va ṭul de maw!

Sandam ei ṭulna atam taluo hril seng an nawh. Zakai kha hril nawk inla, Pathien ram a hei lut khan ama chau a lut naw a, a nei po po khawm Pathien ram a lûtpui vawng a ni kha. A pawimaw de aw mi tamtak chu mani chau Pathien rama ei lûta, ei thil nei hai Pathien ta dingin ei phal naw hlak. Mani chau Pathien rama lût lova ei thil nei hai le Pathien rama lut thei ding khawpa Isu hmu chieng ei ṭul rawp a nih, chu ding chun khawlam ei um ti hi in enchieng rawp ei tiu.

KAWLAM EI UMNA DING CHU: Kalvari tlanga Isua ei um theina ding chun kalvari tlang hraw a ngai pei a nih, hi lampui a naw hin chu Isu kuom an tlung thei nawh. Hi taka inthawk hin ringtu hai in van tieng mit an put hlaka, khawvel ram an hmu phak hlak. An mit a danglam ta leiin an thil thlir dan a danglama, a mawi an ti zawng dam, a ṭha an ti zawng le, khawvel an hmu dan hai chenin a danglam ta hlak a nih. An mit chau ni lovin, an lungril a danglama, a hriet nuom zâwng a hung danglama, an ngaituona a danglam ta leiin a theidatu hai an hmangai lema phuba lak nekin ngaidamna an nei hlak a lo nih. An inhnar a hung danglama Pathien ram hmu pei an nuoma a hluotu ta phawt rinum sienkhawm an maksan hlak.

Awleh, Pathien ram ei hmu peia van silfena ei inthuom pei theina dingin ei umna ding hmuna um seng ei tiu.