IT’S MY LIFE (Ka hringnun a nih)

By: Rev. Robert Ramchunghnung

”Krista kuomah hemdein ka um tah. Nisienlakhawm, ka hring a nih, kei ruok chu ka ni ta nawh a, Krista chu keimaah a hring lem a nih, chun tuta taksaa ka hring hi ringnaa hring ka nih, Pathien Naupa, mi lunginsiettu, ka aia inpetu ringnaa chun’‘ (Gal.2:20)

Ţhalaihai  khawvel a dinga ṭawng inlar em em chu ‘It’s my life’ ti hi a nih. Vawikhat chu rawngbawlna le inzawmin hmun pakhat a ka fe a chu taka chun, Pathien thu le nundan ka thei ang tawka ka zuk hril chun, chu laia mi pakhat chun  vawisuna ei thupui hi a mi lo ti pek a, ka lungril ngaituona a suksei hle’n ka hriet a, ka hringnun an nawm, iem buoina ding i nei a, ka thu an nawm, an mi ti pek chu hril ding a vang hle’n ka hriet. Chuonga mi lo betu chu kristien sungkuo puitling taka ka ngai sungkuo a seilien a lo ni nawk nghal. Khawvelin dan le dun tam tak a siem a, India ram a ngei khawm, human traficking, human right, RTI le a dang dang a siem hai hi a ṭha naw ei ti nawh, ṭha hle sienkhawm, Ringtu kalchawina a mi sukbuoi theitu a ni ve thei. Khawvel thiemna le varna hlak chu an sang ta bawk si. India ram hi Democracy ei ni a( Mipui rorelna), Ringtu hai ruok chu Thêoracy ei ni ti hi hrie thar inla, Krista hringna ah hring ei ni ti hre thar ei tiu.

Gal. 2:20 Bible chang sunga hin personal pronoun ( Hming ai awtu) hi pakuo zet el ei hmu thei a. Isu Kross a an hemde lai khan Paula’n a ban a va phar ve tina an naw a. Isu kha mihriem ani leiin ami nina Isu ah khan a hmu chieng em leiin, Krista kuomah hemde in ka um ta a lo ti thei a nih. Tuta taksa a ka hring hi ringna a hring ka nih a ti thei nawkna san chu Isu le ama kha mihriem an ni ve ve leiin a nih. Paula’n a hringnun a hin thu neina a nei ta naw zie le a aia inpetu hringna a hring a ni a hrietchieng hle a nih.

Krista neitu hai chu an nun a danglam hlak:- Hla siemtu’n ”Lal Isu ka nei china chun lampui chin hraw ka lo nih, ka nuom zawng thil hai thaw chu a rem ta nawh” ti an lo phuok a. Mani ditdan le nuom zawng khawm an leng ta nawh. Mi neitu ditdan a um lem ding ei ni tah. Krista hringna a hring kan ta iê, Isu’n ka nina po po Mary sung a’nthawka Kross chen a mi that pekin, thlan mi lutpui in, thlan a’nthawkin Vanram kai ding in a tharin a mi’n piengthar tir a. Ei piengna hi thlana Isu ah pieng inla khawm, ei tawpna ding ruok chu hi hnuoi khel Vanram a nih. Mi,n a nina a hriet chieng deu deu a, khawvel a hin an tar deu deu hlak.

Lalpa neitu hai chun an nuom dan le dit dan in hun an hmang ta ngai nawh. Inchawtu, neitu nei a ni ti an hriet leiin a neitupa ta di’n hringnun a hmang lem hlak. Isu thisen hlu a inchawk kan ta ti hrechiengtu le hringna thara, Isu krista hringna thar a hring kan tah ti hai chun ditdan le nuom zawng an leng ta ngai nawh. Pathien dit danin an khawsa lem hlak. Tulai ringtu piêngthar inti ta, Pathien ditdan uksak lova mani ditdan le nuom dan a hringnun hmang ei tam ta em em. Bible in Lalpa ditdan ieng am ani ti lo hre lem ro a mi ti laiin mani ditdan in Pathien ram ei kei kawi lem an tan naw maw?. Ei nun dan hin Pathien ang zuol deu deu dinga a mi ti lai zingin Pathien ei puo naw deu deu el bawk si. Pa puo lo nau ni pal ei tih. Ei nau haiin mi puo loin pansak hai puo dei hai sien chu ngai ṭha bek naw nih. Mi’n i la piengthar naw mani an mi ti le, ei piengthar naw zie in lang rakin ei ṭhang bawk si.

Tirko Paula hi mithiem vawrtawp, suong ding a hau hle. Ni rietni a sertan, Israel suona mi, Benjamin chi, Hebrai kara hebrai, Dan tienga pharisai, ṭhahnemngai tiênga kohran hai suknawmna hlaktu, felna sawiselbo ka nih, a ti ngat. A nina hai chu tulai a ding nisien chu first class a nih. Tuipui ral kai phaka mivar a nih. Thiemna le varna a nei ṭha em ema, nuom sien chu ‘it’s my life’ ti thei hle’ng a tih. A nuom dan danin um thei ngei a tih. Damaska khawbula Pathien le an intuoka inthawk khan thil po po Krista leiin a chan ta vawng a, chuong chu hnephnawl ang chauin a ngai a nih. A ditdan an leng ta naw hle a nih.

Piengthar tah, Krista hming leia zu, drugs le thilṭhanaw khawm chan ngam lo ei va tam ta de aw. Ka vanram kai ding a dal chuongnaw ti a suol pawisa lo ‘it’s my life’ ti a hringnun hmang, sapîlpawl deu a hringnun hmang ei pung peia. Vawisun a ei chȃnhai le Krista’n a mi zawngnaa a chȃn ei hang khaikhin chun a nȇp thei ngei maw ei chȃn ngamnaw hai hi. Van Angel le Serafim haiin, an thiêng iê, an thieng iê, tia an chawimawi nghawk naw, kum 33 sung hi khawvel a rimsi takin a hunga, mihriem ni ngailo mihriemin a hung inching a, Pathien thi thei lo hmangaina leiin a hung thi a, thina chelsawng ruol a ni naw leiin nithum ni’n a thonawka, (Isai.6:3, John.10:17-18) Hmangaina leia a nina po po hlipthla a mi zawngtu ta dingin ei hringnun inpe thar ei tiu a, I hringnun nanga inlang ta naw sienla, nanga khan Krista hringnun inlangsuok lem ta raw sen. A thu kim lo taka ei hung suklang hi Lalpa’n malsawm raw se, Amen.