ISU KHA TUKHAWM SANDAM HMAN LOIN VANAH A FE NAWK AM?

By: Samuel L Songate, Pune

Tulai Zoram Khawvel-a Cable TV le social media-a en le ngaithlâk hlaw tak chu Upa Dr PC Biaksiama (Christian Research Centre) le Rev Thangliansanga (Mizoram UPC) hai inhnielna ‘UPC Thurin Sawihona’ kha ni mei a tih. Kha inhnielna kha Zoram Khawvel hmun hrang hranga um Zohnathlakhai a tlâwm tawpah mi nuoi nga (5 lakhs) vêlin an thlîr niin an hril.

A tawi zawnga khâikhâwm chun a zân khatna le zân hninaa an inhnielna a hai khan Dr Biaksiama khan an hnielpui Rev Thangliansanga kha a sêl hne naw deu chu niin an lang. Dr Biaksiama kha mithiem nisienkhawm ṭawngbau tieng ring nêkin a lo hausa naw bâkah, a thu hriltumhai kha point ṭha tak tak khawm nisien nuom anga fie le chieng le mihne (convincing) in a hril suok zo naw a, chulai chun Rev Thangliansanga ruok khan chu a khingpui pa le a lekhaziekhai hrim hrim a lo chîk hne em em a, Dr Biaksiama point vawr suokhai khawm a hung hlap thlâk zat zat el a nih. Amiruokchu a dang an nâla, awium deu deuin thil a hril thei leiin a theology fe pui dan le a Bible interpretation hai kha an dik  lem tina ruok chu a ni nawh. Zawnahai lem kha chu dawn fuk naw khawm a nei nuol, amiruokchu ama rilrem dan takin Bible thu kha a fepui leiin luong zaia hril ding kha chu a tlasam naw hle.

A zân hnina hun tawpa a hmawr an inbâwkna a lem khan chu Dr Biaksiama khan a beidawngin emotional appeal thawin a testimony, sandam a’n hrietchieng dan le thi thlamuongna a nei thu bâkah UPC hai khawm sandamna indik changa vanram kai seng dinga a ditsak thu in a khâr ta hlawl a ni kha. Theological debate a ding chun mi a hne (convincing) bek nawh.

A khingpui Rev Thangliansanga hlak chun hawihâwm takin lawmthu hril malamin, thi thlamuongnahai chu Kristien nilo ISIS hai khawma an nei thu le Isu Krista meu khawm a thi tawmin thlaphâng taka Gethsemani huon le Kalvari kraws-a a um thu la hung hril in, thi thlamuongna chu sandamna chang indik inkhinaa hmang chi a ni naw thu in a la hung dawn lêt nawk a. Tu pa fiemthu thaw pakhat an hril, ‘doctrine inhnik taluo chu dawk deuin an ṭîn nuom’ ti po kha Dr Biaksiama khan a thaw ni takin ka hmu.

Awleh ei hril tum takah zuk lût inla. Kha inhnielnaa an thuhrilhai kha point iemanizat chai ding um sienla khawm Rev Thangliansanga thuhril pakhat ka ngaimaw zuol a um a, chu chu, Isu kha tukhawm sandam hman loin vanah a kai nawka, Pentecost nia Thlarau Thienghlim peka a um a inthawk chau khan sandamna le suol ngaidamna an ṭan a nih ti kha a nih. Hi thu hi Dr Biaksiama ruok khan chu Isu kraws lerah a thi a, ‘A KIN TAH’ tia a thlarau an thla char a inthawk khan sandamna le suol ngaidamna chu an ṭan lem a nih tiin a hril ve nawk thung.

A ni ngei, sandamna chu Isu thina le thonâwkna leia chang eini lai zingin, Isu kraws-a a thi hma khawma a thina le thonâwkna ringnaa lo sawr ṭangkaia sandamna le suol ngaidamna lo chang Bible-ah chieng taka hmu ding an um tlat.

1. Zakai Siedawl Hotu (Luka 19:9-10):
Isu le Zakai chanchina khan chieng takin hieng hin an ziek – Chun Isu’n Zakai chungthu a hril a, “Vawisun hi ina hin sandamna a hung tlung tah, ama khawm Abraham naupa a ni si a. Bohmanghai zawnga sandam dingin Mihriem Naupa hi a hung a ni hrim a nih,” a ta. Hihi Ama Isu Krista ngeiin Zakai a insunga sandamna tlung thu a hrilna a nih.

2. Zeng Isu’n a Sukdam Kha (Matthai 9:5):
Isu’n zeng a sukdam chungchang a khawm khan Chanchintha Matthai chun hieng ang hin chieng takin a mi lo ziek pek. Chun, ngai ta, zeng pakhat khuma zâl pumin a kuomah an hung zâwn a. Isu’n an ring zie a hmuin zeng kuoma chun, “Ka nau, lungmuongtakin um rawh; i suolhai ngaidam a ni tah” a ta (Matthai 9:5).  Hi khawm hi Ama Isu Krista ngeiin a kuoma zeng an hung ṭhuoi pa a sukdam malama a suolhai ngaidam a ni thu a puong pek a nih. Isu khan krawsah ka thia ka thonawk zo pha, Pentecost nia Thlarau Thienghlim ka hung tir pha leh i suolnahai ngaidam la ning a tih khawm a ti nawh a, “Ka nau, lungmuongtakin um rawh, I suolhai ngaidam a ni tah” a ti tawp el a nih. Hi taka ‘Your sins are forgiven’ ti hi grammar dan a khawm thil tlung zo ta hnung hrilna ‘past participle’ a nih. Chuleiin hi zeng pa hin Pentecost nia Thlarau Thienghlim  hung tlung hma, Isu khawm kraws-a a la thi hmain ringnain suol ngaidamna a lo chang ti chu a chieng hle a nih.

3. Pharisai Simon In-a Nuhmei Isu Ke Fâwptu Kha (Luka 7:36-50)
Chun, nuhmei kuoma chun, “I suolhai ngaidam a ni tah,” a ta. Chun a thlaithleng awtpuihai chun, “Suolhai khawm ngaidam hi tu am a na?” an in tih a. Chun, ama chun nuhmei kuoma chun, “I ringna hi sandam i ni pha a nih, thlamuongtakin fe rawh,” a ta (Luka 7:48-50).

A chunga Bible thu khi ei tiem chun Pharisai pakhat Simon a ina Isu zanbu a kîl ṭuma nuhmei dukdaklo, ESV lem chun ‘a woman of the city, who was a sinner’ a ti hiel khan Isu chu riminhnik nâlin a samin a ke hrû pekin a fawp a fawp thu ei hmu a.  Kha misuol nu mamaw kha Isu’n a hriet leiin “I suolhai ngaidam a ni tah” ti chauh dittawk loin “I ringna hi sandam i ni pha a nih, thlamuongtakin fe rawh”,a ti nghe nghe a nih. Hi châng hi English Bible a hai lem chu, “Your faith has saved you; go in peace” tia inlet a nih. Chuleiin Simon ina nuhmei lem hi chu Isu khan a suolhai ngaidam a ni thu chauh puong loin a ringna leia sandam a ni thu khawm a puong pek a nih.

4. Isu Changtienga Misuol an Hemde kha (Luka 23:39-43)
Kraws-a Isu an hemde laia a changtienga misuol an hemde sa ve kuoma khawm khan Isu ngeiin, “Titakzetin ka hril che hi, vawisun hin ka kuomah Paradisah um veng i tih” (Luka 23:43) a ti a ni kha. Kha misuol pa kha baptisma hlak chang hman ta lo, amiruokchu Isu’n paradisah a um ding thu a puong pek bawk si. Paradis chu Tirko Paula lem chun vân thumna (third heaven) a ti hiel a nih a, chuleiin tuia namphûm (water baptism) chang hman lo khawmin misuol pa kha Isu zârin vanram a kai ti chieng takin Bible-ah ei hmu.

Thutlângkâwmna:  Isu kha suola inthawka mi sandam dinga khawvela hung a ni leiin mihriemhai kha sandam a châk dawp dawp a, kraws a tlung hma a inthawk khawmin mi ṭhenkhathai suol a ngaidama, ringna leia sandamna khawm a lo inchang tir ti chieng takin ei hmu thei. SANDAMTU chu a lo va ni chieng ngei! Chuleiin Isu kha tukhawm sandam hman loin vanah a lawn nawk a, Pentecost nia Thlarau Thienghlim a hung tira inthawk chauh khan suol ngaidamna le sandamna an ṭan ti ringna le inchûktirna hi chu a Biblical nawh a, Isu Krista mi nina le a sinthaw (Person and Work of Jesus Christ) ngainêpna ni lemin an lang. (Pune, June 24, 2022)