Isu Hmingin Aw!

~ Upa Zarzolien, Sartuinek

“In thaw taphawt chu thuhril amanih, thil thaw amanih, Ama zara Pa Pathien kuomah lawmthu hril pumin Lalpa Isu hmingin thaw vawng ro” Kolossa 3:7

Pa Pathien kuoma lâwmthu hrila iengkim Isu hminga ei thaw hi ei Pathien lâwmzâwng a nih, ti ei Bible châng thlang Pathien Thua inthawkhin ei hmu thei a nih. Tirko Paula’n Kolossa mihai kuoma a lo hril hi kei ngêi khawma ka lo theinghil rawp hlak a nih. Nisienlakhawm, Pathien nauhai ta ding hin a lo pawimâw hle a nih. A san chu Isu hi ei suol leia a thisen a suok el chau khawm nilovin, ei suol leia inmantira um a, ei suol leia thi chena tuor a mi’n chawtu a ni leiin, Ama ta ei ni si a. Mihriemin Pathien ei suklâwm thei ta sinaw leiin Ama Pathien bawk chun mihriem po po Ama Kristaa mi’n umtirin a mi lâklût vawng a. Ei thi âia thiin, ei suol man bat a mi tlâkpêk ta a, Pa Pathien chun eini tieng en ta lovin Isu Kristaa chun a mi hmu ta leiin Pathien ilâwm mihriemhai ei lo ni ta a nih.

Ei hril nuom tak chu, iengkim ei thaw po po le ei nina po po hi uor taka Isu hminga thaw le ni vawng hi a nih. Uor suol nâw âwm tak ei na!

Thuhrilna kawngah, ka ruol pâwlnaah, ka thil hrilna a khawm nisien, Isu hming le Isu ai-aw anga ṭawnga ka hril a ni chun mihai natna nekin mihai damna ding le mihai ta dinga malsâwmna a ni lem ding a nih.

Pathien Thu hrilna kawnga khawm nisienla, Isu hminga ka hril chun Isu thuhril sunzawmtu le Ama Isu âia hriltu ka nih, tina a ni chuh. Chuleiin, keima tieng chu iengkhawm suong ding a um nawh. Hnuoi le Vân siemtu Pathien Thu, nang le keiin hril theia ei um hi Pathien kuoma lâwmthu hril mawl mawl hi ei thaw ding tak chu a lo nih. Chuleiin, Isu zâr chauin ei Pathien kuomah ei pawimawhai ei intlun thei a, Ama zar bawk chun lâwmthu khawm ei hril ta a nih.

Rawngbâwlna kawnga khawm nisien, Isu hminga thaw chu Pathien lâwm tlâk a nih. Pathien rama hin ei thawthei tâwk tâwk ei thaw lai khawmin Isu hminga thaw hi a lo va pawimâw ngêI deh. Ka naupa hmingin châng ka kam a, chu châng chun sa a hung âwk ta a, chângkam theitu le a kamtu chu kei ka na. Amiruokchu, ka naupa hminga ka kam a na, ka hminga um a ninaw leiin ka châng a ninaw a. Chuleiin, chânga sa âwk nghâwng chu ka puhaiin chang lovin ka naupa puhaiin an chang lem a ṭul tlat a nih. A san chu châng chu ka châng a ninaw a, ka naupa hminga ka kam, ka naupa chângin a âwk a ni tlat leiin. Chuong ang bawk chun rawngbâwlna khawm a neitu tak le a changtu tak chu Isu kha a lo ni lem leiin nang le kei hin Isu fe thleng lo chun Pathien lawm tlâk rawng ei bâwl theinaw a nih. Ei thaw ṭha khawmin suong ding ei neinaw a, Isu hminga sin thaw eini tlat lei a nih. Amiruokchu, nang le kei hin a thlawnin sin thaw in ei inrim naw a nih. A san chu Isu hminga iengkim ei thaw hai hin Pathien kuom tlung phâk a ni tlat leiin. Ei sin thaw hai khawm Pathien hrietpui, ei rawngbâwlna hai khawm Pathien hrietpui eini leiin a nih.

Chuleiin, ringum takin, beidawng lovin Lalpa sin thaw’ng ei ta, nikhat chu Lalpa kuoma inthawkin lâwmman la hmûng ei ta, suok ṭha le ringum, I Lalpa lâwmnaah lut rawh, ti ei la hlâw ding a nih. Lalpa’n a Thu mal sâwm raw seh.