Isak Kha Adam A Thla A Ni Am?

By: Samuel L Songate

Tulai hin Aizawl, Mizorama Cable TV Service Provider inlâr tak pahni LPS-Zonet inkawpin “Live Home Crusade” an buotsai a. Technology hmasâwnna sawr ṭangkaiin ram hla taka inthawk khawmin thuhriltu hai thuhril lai ngei LIVE in ei lo ngai phâk ve tah a, lawm a um hle. Amiruokchu speaker-a an ruoi pakhatin ‘Isak kha Adam a thla a ni ve nawh, Abraham le Sari kha mihriem dân anga nau nei thei talo anni leiin Sari phing sûnga naute hung insieng kha Abraham a chi niloin Pathien chi a nih’ tiin huoi takin a hung hril el a. Chu chauh chu dittawk loin Baptistu Johan khawm kha a pa Zakari chi thla a ni nawh a la hung ti sa ta deu deu.

A Bible thu fepui dân chun mi ṭhenkhat chu a sukbuoi met ding a ni hi tie tia ka lo ngaituo laiin sawtnawte hnungah a lo ngaithla vetu pakhatin ‘text message’ in a mi hung indawn zui ta nghal a. Chuleiin hi chungchanga indawnna hi ei thei ang tâwkin Bible ṭhangsanin a hnuoia ang hin ei hung dawn tum ding a nih.

1) Isak kha Adam a thla, Abraham a chi a’nthawka insieng ngei a ni ti ei hriet theina chu Genesis 15:3-4 lai kha ei en chun Abrahamin Pathien kuomah “Ngai ta, chi hrim hrim I min thla tir si naw a; en ta, ka ina pieng siehlaw hi ka rohluotu ding a nih,” a ti thu ei hmu a. Chu phing chun Pathienin Abraham a kuomah, “Ama kha I rohluotu ding ni naw nih, nanga rîla hung ra ding ngei chu I ro hluotu ding ni lem a tih” tiin a dawn a nih. Hi taka ‘nanga rîla ra’ ti tak hi English Bible a hai chu “a son who is your own flesh and blood” (NIV) ti le “one who will come from your own body” (NKJV)  tia inlet a nih. Chuleiin Isak kha Abraham a chi a’nthawka insieng ngei, Adam a thla fe pei suon sawmhnina (1 Chro. 1:28 dungzuiin) a nih.

2) Chun Isak a pieng khan Abraham kha kum 100-a upa ni ta sienkhawm Pathienin a taksa khawm chi thla theiin a la sukhrât ti hriet thei a nih. Genesis 25 lai kha ei en chun, Isak a pieng hnung khan Abraham kha kum 75 a la dam a, chun a nuhmei Sari thi hnungin nuhmei dang Ketura a la neia, naupasal khawm paruk lai, Zimran, Joksan, Medan, Midian, Ishbak le Suah hai a la nei sa nawk a nih. Chuleiin ringhla ruol loin Isak khawm kha Abraham a ṭhâlbe a insieng, a nau ngei a nih.

3) Tirko Paula ngei khawmin Rom khuoa a Juda ringtu chanpuihai lekha a thawnnaah “Abraham, taksa dâna ei thlatu” (Rom 4:1) tiin Abraham kha a ‘address’ ngat a ni kha.

4) Chun, Isak kha Adam a thla ni naw sien chu Adam bawsietna leia ei piengpui nina suol (original sin) kha a nei ve naw ding tina a nih. Amiruokchu ei Bible in Rom 3:23 a khan “Mi po poin thil an suksuol vawng ta a, Pathien ropuina an chang zo ta naw a nih” a mi lo ti pek a. Chun Rom 5:12 lai khawm khan, “Chuongchun, mi pakhat leiin suol khawvela hin a lut a, suol leiin thina a lut bawk a; chuong ang bawkin mi po poin thil an lo suksuol ta leiin thinain mi po po a fang suok ta a” tiin a mi ziek pek a nih. Mi po po a ti tlat lei hin Isak le Baptistu Johan khawm mihriem an ni ve si chun a huom sa ngei ti chu a chieng.

5) Bible pumpui ei en a, pasal chi ṭhang loa nuhmei a’nthawka insieng ei hriet thei chu Isu Krista chauh kha a nih. Genesis 3:15 a ‘Nuhmei thla’ (her offspring) a ti le Galati 4:4 a ‘Nuhmei inei’ (born of a woman) a tihai hi Isu Krista hrilna vawng an nih.

Chuleiin Isak kha Adam a thla niloin Pathien chi a inthawka insieng a nih ti inchûktirna hi Bible leh an mil thei naw a, theology indik a ni thei bawk nawh. Ei ram mipuiin ei hriet dinga pawimaw em em pakhat chu thlaraua ei inṭhanglienna ding hin Pathien thu hriltu ṭhenkhatin sermon tlawr raka an hrilhai hi, inhnikin a lem inhawi hlak sienkhawm ‘junk food’ ang an nina chin a um ve leiin a hrisel vawng kher nawh.

Ei thlarau ta dinga inṭhanglienna bu ṭhatak chu masala le marùmarâng ṭhanglo le thildang iengkhawm pawllo Bible thutak bawk hi a nih. Chuleiin ei ram Kristienhai hi mi thuhril le sermon ringawta innghat loin mani sengin personal Bible study hi uor nawk zuol ei tiu.

(Pune, May 15, 2021)