Insung Relfel A Hun (Isai 38:1)

(Thuhriltu Vol.XLVII/No. 9&10/September & October, 2020)

By: Rev. Challienkung

Rom 13:11-12 ei tiem chun “Tuhin chu ei awi phut lai nek khan ei sandamna chu a hnai lem ta sia,” ti ei hmu ang khan Pathien ringtuhai in ei hun vawrtawp le ei nghakhla em em “Rupture” an ti Lalpa’n a mi thienghlim hai hi buoina khawvel a inthawka a lak hmang hun ei tlung vat ta ding thu ei hmu a. Chu hun tlung hun a khawvel chanchin ding chu a raptlak hle ding a nih. Mitkhapkar sunga khawvel pumpuia thil tlung ding chu Television le Radio dam, Whatsapp le Facebook le a dang danghai in khawvel a chanchin mak tak tak an hril hai let tama chanchin mak tak Rupture hun chu a hung inher suok ngei ding a nih.

Khawvel hi an mum a ni a. Chuleiin, mithienghlim lawr ni khawm hi hlaa ei sak angin, “Sun lai amani zan lai?” ti ang khan a ni le darkar an ang naw el thei a nih. Hmun thenkhat a chun zan thang lai dam, sun lai dam,  zantieng dam,  chuong ang pei chun hmun hran hrana a ni pei ding a nih.

Chu hun a chun, sungkuo tamtak chu khuo a var pha lo kim ta naw ni hai a. Zana an zal huna kim taka zal ni bawk si, zingkara an hmu zo ta naw dam um an tih. Zan kar khan khawlam an lo fe hmang a ni ding tiin beidawng takin zawng an tih. Sungkuo thenkhat a chun an nau le tehai dukdak naw leia bienga mitthli luong zing hai kha lak tungin um an ta, nu le pa thuawi nuom lohai kha maksan in um an tih. Sungkuo thenkhat a chun an nau nunghak hai dam lo um ta naw ni hai a. Lalpa’n an ni chu lo thuoi tang a ta. Hi huna thuoia um ding hai chu Isu Krista a hringna nei hai chau ning an ta. Upat le naupang in umzie nei bawk naw nih.

Hmun thenkhat a chun sun lai tak a ni ding an leiin mani sin seng thawa an buoi lai tak a ni thei.  |henkhat loa an um lai dam, thenkhat chu in nghaka an  lo um lai dam lak hmangin um an ta, zantieng chun kim ta naw ni hai. |henkhat chu an sin thaw khawm lai zingin inhmang an ta, a la um hai chu lungngai tak le beidawng takin in tieng inlawi an tih. In hung tlung an ta, an ni ang bawka mi lungngai le beidawng mi dang tam tak hmu sang an tih. Maksan a um hai chu an inhmu khawm rawn po leh an beidawngna zuol ting a tih.

School kai lai naupang tam tak hung inlawi ta naw ni hai a. Thenkhat chu in an tlung in an nu le pa hai hmu zo ta naw dam um an tih. Chu ni chun I la dam a, I la um a ni chun Radio le Television a thu puong I ngai tlak hai chu beidawngna tawpkhawk thu ruok ni tang a tih. Buoina ruok, buoina ruok ni tang a ta, chu taka thlamuontu ding bik tukhawm um ta naw ni hai.

Chu nia maksan a um ding hai chu pawlhni a the thei in la um an ta. Pathien Thu la hrie lo hrim hrim, ringnawtu khawm la um an ta. Pawlkhat dang hai chu a hming mei mei a Kristien lo ni a, piengthar lo, Pathien hming suksietu hai an ni ding a nih. Chu ni a chun ringnawtu hrim hrim hai nekin a hminga ringtu, piengthar silo hai beidawngna chu nasa takin zuol lem a tih. Thutak hrie zing pum a ngaisak nuom lova suol lui tal hai an ni lei le Pathien thu lo hrie teu ta an ni leiin an hmabak rinum ding zie khawm hrie thei nghal an tih. Kristien hming lo put ve upa tak tak nita bawk si thenkhat chu tulai a mi dukdak lo hai  leh in ang rawngin maksan in um an ta. Beidawngna tawpkhawk le lungngaina sumpui hril ruol lo chun chim tang a tih.

Thenkhat chun iengtik lai khawma an en ta ngailo an Bible kha inrang taka la a phetin zawng an ta. Rupture thu inziekna Bible chang hai zawng an ta, I Thessalonika 4:13-17 dam, I Korinth 15:51-58 thu hai dam tiem an ta mithienghlim lawr (Rupture) hun a ni ta ngei ti hrie tang an tih. Chu pha chun, thenkhat chu beidawngin khek suok an ta, thenkhat chu lungngai ta luo leiin muhai angin um an tih. Suolna hmuna khawvel hlimhlap chena iengkhawm hrie phak lova hlim taka innui khek hai khawm khan hi ni a an inhmu khawmna a hin chu innui hmel hmu ta naw ni hai. Intum intuong an ta, sienkhawm a tangkai naw ding zie khawm hril ngai lovin hrie zing an tih.

Chu ni a sungkuo kim dup a la um zing hai chu sungkuo lungsiet um tak ning an tih. Sum inthieng lova In ropuitak tak bawl a, chapo taka khawsa hlak sungkuo tam tak Rupture zo hnunga In ropui taka la cheng hai khawm inhawi muol ah dak ta naw ni hai. Nei le lamah in suk lungawi hlak hai khawmin an thil nei hai a lawmna hrim nei ta naw ni hai. Khawpui dang dang a In le lo neitu mi ropui le hausa hai khawm an thil nei chun umzie nei ta naw bawk a tih. Chu pha chun an hringnun in a mamaw tak chu iem ana ti hrie tang an ta, sienkhawm iengkim anhnu vawng tah ti hrieng an ta, chu chu an ta dingin beidawng le lungngai intanna ni tang a tih.

Zu du lei a piengthar nuom lo hai khawm maksan a an um hnung chun inhnik ti takin Zu dawn nawk ta naw ni hai. An lungngaina le beidawngna a raptlak hle ta ding lei a nih. Tisa chakna, hurna le pawrchena hmun tlakhla leia piengtharna ngaisak nuom nawtu hai khawm in an inkawppui hai chu tirdak tang an tih. Tangka sum ngainat leia Pathien nghatsantu hai khawmin, an sum le pai hai en an ta, Rupture hnunga sum hai chu tha naw takin hmang an ta, Juda Iskariot in Lal Isu a zawrna sum hmangna ding hrie ta lova thiempu hai hma a a va thedar ang el kha ni tang a tih.

Chu ni chun, thenkhat chun beidawngna chau nilovin inzakna nasa tak khawm tuok an tih. Kohran a ngirhmun insang tak tak chel a, tha hun tawka in ngai bek bek hai dam maksan in um an ta, chuong hai chun mihriem dang hai  hmel khawm an hmu ngam ta dim a ni? Maksan a um seng seng lai an ni chu mi dang hai hmusit le nuizat  bur hung ni tang an tih.

Pathien lungsenna dang hung tlung belsa tanaw ding nisienlakhawm maksan a an hang um el khawm chu hremhmun intan lawkna chu a ni ta hrim hrim a nih. Hang ngaituo chieng ta, Pathien tia, hringnun thienghlim le ditum taka lo um hlak hai po po kha an um ta naw ding a na. Chu nia maksan ini chun, I ta dinga tawngtai hlak hai kha va zawng I ta, ngaimaw taka thil tha lo hril hlaktu hai che kha hung ngaina hle tang I ta, sienkhawm chuong hai chu hmu zo ta naw ti nih. Lalpa’n an ni chu a lo thuoi hmang dai ta ding a ni sia. I leng suok  naa chun mihriem tam tak chu la va hmu ngei i tih. Nisienlakhawm, chung hai chu, Lalpa lunginsenna hmasuona buoina huna lut dinga maksan hai ruok ni tang an tih. Tukhawm in thlamuongna thu le thu tha hrim hrim lo hril pek thei ta naw ni hai che. Tawngtai pektu ding che lem chu hmu ta naw hrim hrim i tih. Ava raptlak awm ngei de!

Unau, tuta inthawk hin thanghar la, hun tawite a la um lai hin i Pathien tuok dinga inzo dingin ei Lalpa Isu hmingin ka fiel che.  Ei insung hai relfel a hun lai a nih.