Immanuel A Thizam-ah

Home  ›  Sermon  ›  Article  ›  Immanuel A Thizam-ah
Immanuel A Thizam-ah
August 15, 2020 Comments Off on Immanuel A Thizam-ah Article, Sermon EAC

(Thuhriltu Vol. XLVII/No.7&8/July & August Issue)

By:- James P. Inbuon

William Cowper (Cooper) hi November ni 26, 1731 khan Great Berkhampstead khuo, England ah a pieng a. Kum 6 mi chau a ni laiin a nu in a thisan a. Nu, duottaka enkawltu khawm nei mumal lova seilien in, naupang lungsietumtak tak a ni in a hung seilien a. Harsatna tamtak kara seilienin, a nunah chun hlawsamna le beidawngna tamtak  hmasuonin tamtak khawm paltlang a nih.

Chuongchun, kum 1763 lai vel anthawk khan Depression nasa tak a hung nei ta nghe nghe a. St. Alban’s Hospitala enkawl ngaiin a hung ta hiel a ni, tiin a chanchin zieknaah chun ziek in a um a nih. Hieng hun lai vel hin “Amazing Grace, How sweet the sound” (Hmangaina mak rimawi tak chu) tih hla phuoktu, John Newton leh an inhmelhriet tan a, an hung inpawl ngei ta em em el a. Newton-a keithuoina hnuoia chun a Depression khawm chu dam te tein a hung zie um ve ta pei a.

A chanchin ziekna-in tarlang dan chun Depression a nei lai, kum 1771 vel khan  hi hla chuoi thei lo,  

There is a fountain filled with bood,

Drawn from Immanuel’s veins (Imanuela thi zamah, Suol faina tui a luong) tih hla hi a phuok ta a ni. Hi hla thuk mawi le mi hai lungril hne em em el, a thu hmanga mi tamtak haiin piengtharna an lo chang pha na le, an chang mekna hi William Cowper chun Zekariah 13:1 “Chu ni chun inthieng nawna le suolnaa dingin, David sungkuo le Jerusalema chengtuhai ta dingin tuikhur hawngpek ning a tih,” ti Bible chang thangsan-in a phuok a ni.

 “Imanuel a thizamah,

Suolfaina tui a luong

Chu tuikhur chu, misuol ta ding

Suol sawpfaina a nih.”

Lungril sungril taka khawsawtna inthuk tak, harsatna namen lo le beidawng rum rumna ngirhmun le tuorna nasatak kara ni eng hung suok ang el a ni a. Hi hla thu tha le mawi em em le a thluk mawi bawk si hi mihai kuomah Lal Isu thisen thilthawtheina leia beiseina thar petu a hung ni ta a ni!

Ieng anga suol, bawlhlaw le hring tlak lo nia inhrie hai ta ding khawmin thisen zara ngai damna a um a ni, ti a min hriettir a; “A mi la ngaidam thei!” Amen! Hilai chang lem hi chu hnuk ul raka sak hi a awm hlie hlie hrim a nih.

“Mi suol thi ding an hemde khan,

Damna tuikhur a hmu;

Ama angin suol inla khawm,

A mi la ngaidam thei.”

Chu Thisen tuikhur chun a zawnga a pantu taphawt chu ienglai khawmin a lo lawmlut em em zing a; Pathien hmangainain a sip a, misuol faina vadung a ni! Chu Thisen tuikhur  chu chatuon khawmin a kang ta ngai naw ding a na!! A va ropui lawm lawm ngei!

Lawmna leia bienga mitthli luong zawi zawi puma mi’n an lo sak hi a awm hlie hlie a nih-

“Kalvari tlang mawitak a chun,

Damna Vadung a luong;”

Chu tui inthienga kan sil chun

Ka suol sawpfai a tih!”

I suolna le tirdakumna hai po po sawpfaina, Pa Pathien mithuma inthiengtaka inlangtirtu che Hringna tuikhur, faina vadung Krista chu pan la, Ama chun lo sukdam a ti che a, I suolna le bawlhlawna hai a lo sawpfai takzie le Pa Pathien hmabula mithienghlima a lo puong zie che i hrietchieng pha chun, thlamuongna lawmna la hadamna hmu’ng I tih.