Iengleia Harsatna Ei Tuok Hlak Am, Iengtinam Ei Hmasuon Ding?

By:- James P Inbuon

Tuorna le harsatna hi khawvela um a ni leiin thilsiem po po hin an tuok seng a nih (Rom 8:22). Khawvel ei hang thlir a, harsatna tuok lo hmu ding an um nawh. Chuong harsatna hai chu a tuor ve loa ei ngai hai khawm a tuor mek hai lainatna leia lo tuorpui tuhai dam ei ni nawk pei bawk.

Lungril a buoi hlak: Ei Pathien hi Pathien ṭha nisi in iengleia harsatna a min tuor tir hlak am? Thil iengkim thawthei Pathien nisi in iengleia harsatnaa inthawk a nauhai a mi sandam el naw?Ti hai hi ngaituo in hrietthiem harsa ei ti chang a tam hlak.

Krista zui hi harsatna laka inthawka himna ni dinga ringtu dam, taksa damtheina ni dinga ngai dam ei um el am? Amiruokchu, Kristien hai khawm ei damnaw a, ei thi a, harsatna dang dang ei tuor hlak. Kross a Isu Krista tuorna khan harsatna tuor lo dingin a min tlan tina an naw a, harsatna hrethiema tuor thiem dingin a min thuom lem a nih. Nikhat chu tuorna, tapna le lungzingna leia mithli tlakna hai po po hi Lalpa’n a mi la sukbo pek ding a nih. Ringtuhai hin harsatna tuor in la khawm chatuon malsawmna ei dawng ding le hrilkhi tham a ni naw zie hrethar nawk hlak in la nuom a um. (2 Corinthians 4:16-18).

Iengleia tuorna hi a um?

Tlukna khawvel a ni leiin: A tlangpuiin Pathien hin mifelhai chunga ditsakna an langtir a, misuol hai chun hremna an tuok hlak lai zingin, mifel le misuolin harsatna an tuok ve ve hriet ding Bibleah ei hmu a (Job 1–2). Adam le Evi suoksuolna leiin an thlahai le thilsiemhai po po Pathien le inlaichina suksietin a um a. Chuleiin, ei hringnun a hin phingṭamna, damnawna, lungngaina le a tawpkhawk thina chen ei tuok hlak a nih. (Romans 8:18-24; Philippians 2:25-28).

Suol leiin:  Mi thil suksuoltu chu Pathienin a hrem hlaka (Numbers 16:1-38; Joshua 7:1-26; Acts 5:1-11; 12:20-25). Thuthlunghlui hun le Thuthlungthara hai khawm thil indiknaw thawtu le thlang lem tuhai chun an thil thawsuol man an tuor hlak. (Jeremiah 2:19). Nisienkhawm tuorna po po hi thil suoksuol leia tlung chu a ni vawng kher nawh (John 9:1-7).

Siemthatna ding:  Pathien hi ei Pa ṭhatak a ni leiin eini mi thununna ding le ei ṭhatpui nuom leiin ei tuor khawm a phal a nih. (Hebrews 12:7-13). Chem le hriemhrei hai khawm an hung ngeia hmangtlak an nina ding chun meia raw ling hrep hnunga tuia so bawr bawra phum a ṭul hlak. Harsatna, natna le tuorna mei hmangin Lalpa’n ei hringnun hi hmang tlak le ṭangkai lem dingin mi tat ngei a tum chang a um hlak.  Job a hringnun chu fiena in nasataka sukhliemin a um a, Pathien inphat loin a zawng lem a, a tawp a tawpa chun. “Naa hrietna chun nangma chu ka hriet ta che a, Tu ruok hin chu mit ngeiin ka hmu ta che,” (Job 42:5) tiin Pathien anpak a nih. Hi hin, tuorna hin ringtu nun a dawmsang thei a nih

Fiena: (2 Timothy 3:12; 1 Peter 4:12-14; James 1:1-19). Tuorna hi ringnaa ei inṭhangliena Ama Pathien rawngbawlna ei puitling theina dinga Pathien hmangruo a ni ve a nih . Peter chun, “Chun. Lunginsietna po po Pathien, a ropuina chang dinga kotu cheu chun, sawtnawte in tuor hnungin siemṭha famkimin sukdetin, sukhrat a ti cheu” tiin a hril a (1 Peter 5:10). Pathien chun ama ta dinga lawmtlak le mihai ta dinga malsawmna ni dingin ringtu hai hi tuorna hmangin an tuoi thar hlak,

Sukdudana: (John 15:18-26; 16:1-3; Acts 14:21-22; 2 Timothy 1:11-12). Isu Krista hnungzui hi sukdudana le fiena le an tlawn rawp hlak. Paula chun Krista hminga tuor chu thil thlakhla umah a ruot a. “Ama le tuor a, a thina inṭawmpui chu ka thlang a nih,” (Philippians 1:29; 3:10). Tuorna hai hin Krista tuorna inṭawmpuitu ei ni zie suklangtu a nih.

Iengtinam tuorna chu hmasuon ei ta

Tuorna hi iengleia um am ti hi Bible in hril de sien khawm, Ieng leiin am mi hai hin harsatna chi hran hran an tuor am a na, ti dawnna ruokchu awlsamtaka hril thei a tam naw vieu. Joseph chun midang hai suolna leiin a tuor a, a unauhai khan suknat tum hai sienkhawm ama tuornaa inthawka an ta ding thilṭha le mi tamatak hringna sanhimna dinga Lalpa thilthaw a ni lem si a. Ei chansietnaa hin Lalpa sin thaw a nih, ti hi pawm thiem a harsa vieu hlak.  

Bible chun iengleia ei tuor hlak am, ti nekin tuorna chu iengtinam dawngsawngin hmasuon ei ta, ti hi min hmutir a tum lem nin an lang. Ringtuhai chunga thina thuneina chu Kross a khan sukboin a lo um ta a. Sienkhawm tuorna chu ei kuomah a um zing a, thil iengkim siemthar huna chun thina khawm hi sukboin la um a ta, tuorna hai bo tang a ta, thina khawm chu hne zovin a um ding a nih. Anleh, iengtinam tuorna chu hmasuon ei ta?

Ringtuhai chun Kross a khan tuorna chu Isun a lo tuormuolsuoin a hnetah ti ei hriet. Ama Krista ngei chun Kross a khan a lo tuor ta a, Kross a tuonrna chu nang le keiin harsatna, natna le lungzingna hai hi ei khatin ei tuor naw a, ei tuornaa hin Pathien a um a, a min phatsan naw ti min hriettirtu le sukfietu a ni lem a nih. Chuleiin, huoisen takin harsatna hai hi hmasuon ei tiu, Lalpa chu ei kuomah a um si a. 

Kohran hi harsatna tuorhai tuorpuitu hai an nih. Tuorna chun tuortu nun a sukhliem hlak a. Chu hliemna tuom damtu ding chun Lalpa’n ama ringtu, a kohran hai hi a hmang hlak. Harsatna tuorhai hi kohrana u le nau haiin hmangaina leiin ei in ṭawngṭaipek a. Fak le dawn, sum le thilpek dang dang hmangin ei in tuorpui zie ei suklang hlak, chu chu kohran, Krista taksa in a pengpui hai a ngaisak dan ding hrim a nih. Chulai zing chun mani ringtu chanpui hai natna le tuorna hrepui der lo, natpui neka lo lawmtu ni awm hiel a inlang ei um am? in enfieng ei tiu. Chun, mihai ei ngaisak le ei ṭhangpuina kawnga hin sukdamtua inngai sia mani tienga hliemna tuoktu ni thei a nih, chuleiin fimkhurtaka Pathien rawn zinga kalchawi ei ṭul hle

Tuorna chun mi a sukhrat in a suk siet thei ve ve. Harsatna ei tuok hin nun pangngaiin ei um nawk el thei naw a. Ra ditum ansuo ding le ansuo naw ding thua chun a tuortu chunga innghat a ni. Ṭhenkhat chu harsatna lienlema hnuklutin an um a. Ṭhenkhat hai ruok chun Pathien an bela ringnaa inṭhanglienna le hratna an hmu pha a. Mi dang hai laia ringna suk hmutu, seltaka um dinga infuitu le Pathien sinthaw sukhmutu an ni thei lem bawk. (2 Corinthians 4:16-17).

Beiseina ei nei

A tawptaka chun, tuorna hai po po tawpa hringna la hung um ding chu a min thlirtir a nih. Kum tluona harsatna min tuortir zing hi Pathien thiltum a ni naw ti ei hriet a. Chuleiin, hringna la hung um ding, tuornaa inthawka ei zalenna ni, ropuina le hlimna tawplo ei chang hun ding chu a min thlirtir lem a nih. Tirko Paula chun harsatna tamtak a tuor a, “Thlarau Thienghlimin, khuopna le rinumna in a hmuok che, tiin khaetina a min hriettir hlak, chu chau chu ka hriet a nih. Nisienlakhawm, kan tlansiekna lam hmabak suo ding le… thaw zo phawt lang chu, ka hringna khawm thlakhla tlaka ka ruot nawh,” (Acts 20:23-24) tiin a hril a nih.

 Chunglai zing chun eini chu Kross suongtuhai ei ni a, neksawra um hai le suknawmnatna tuor Kristaa u le nau hai thlamuongtu ding hai ei nih. Isu Krista chanchinṭha hi damna, thlamuongna a nih ti hi damnaw le bohmang mek, thina lusun tuortu hai inhriettirtu ding ei nih. Ei ṭapna le ei tuorna hai intuorpui ding ei nih. Chuleiin, Khawtlang le kohrana Krista hminga muongna, damna a um theina dingin sin ei thaw a. Tirko Paula bawkin, “Tulaia ei tuorna hai hi ei chunga ropuina suklanga um ding le chun hrilkhi khawpa ka ruot nawh,” (Rom 8:18) tiin a lo hril a. Chulei chun, harsatna tamtak a tuok hai khawm lawmnaah a ruot lem hlak a nih. Hi beiseina hi a nih, hmatieng fepei ding le ṭi lova hringnun hmang thei dinga mi ṭhuoi hlaktu chu.